(បន្ទាយមានជ័យ)៖ កម្លាំងកងរាជអាវុធហត្ថខេត្តបន្ទាយមានជ័យ នៅរសៀលថ្ងៃទី២៨ ខែសីហា ឆ្នាំ២០២៦ បានបញ្ជូនជនសង្ស័យចំនួន៣នាក់ ទៅកាន់សាលាដំបូងខេត្ត ដើម្បីអនុវត្តតាមនីតិវិធីច្បាប់ ពាក់ព័ន្ធករណីរំលោភលើទំនុកចិត្ត (ខ្ចីម៉ូតូ) និងប្រើប្រាស់ដោយខុសច្បាប់នូវសារធាតុញៀន។

ករណីនេះបានកើតឡើងបន្ទាប់ពីកម្លាំងជំនាញមូលដ្ឋានកងរាជអាវុធហត្ថក្រុងសិរីសោភ័ណ បានទទួលពាក្យបណ្តឹងពីជនរងគ្រោះឈ្មោះ ជួប តុងជឺ កាលពីថ្ងៃទី២១ ខែសីហា ឆ្នាំ២០២៦ ស្តីពីការបាត់បង់ម៉ូតូដែលជនសង្ស័យបានខ្ចី។

ក្រោយការស្រាវជ្រាវ កម្លាំងជំនាញបានឃាត់ខ្លួនជនសង្ស័យ២នាក់ គឺឈ្មោះ សុខ វ៉ាន់ណា និងឈ្មោះ យក់ យួង នៅថ្ងៃទី២៥ ខែសីហា ឆ្នាំ២០២៦។ តាមរយៈចម្លើយសារភាពរបស់ជនសង្ស័យទាំងពីរ កម្លាំងអាវុធហត្ថបានបន្តស្រាវជ្រាវ និងរកឃើញម៉ូតូរបស់ជនរងគ្រោះដែលត្រូវបានយកទៅបញ្ចាំ។

ជាបន្តបន្ទាប់ កម្លាំងអាវុធហត្ថបានឃាត់ខ្លួនជនសង្ស័យម្នាក់ទៀត ឈ្មោះ សុខ គិមសង ដែលពាក់ព័ន្ធនឹងការបញ្ចាំម៉ូតូនោះ។ ក្រោយការសួរនាំ និងធ្វើតេស្តទឹកនោម ជនសង្ស័យទាំង៣នាក់ ត្រូវបានរកឃើញថាមានសារធាតុញៀនក្នុងខ្លួន។

លោកវរសេនីយ៍ត្រី សុខ ឡេង មេបញ្ជាការមូលដ្ឋានកងរាជអាវុធហត្ថក្រុងសិរីសោភ័ណ បានបញ្ជាក់ថា ករណីនេះពិតជាមានការស៊ីសង្វាក់គ្នារវាងបទល្មើសរំលោភលើទំនុកចិត្ត និងការប្រើប្រាស់សារធាតុញៀន។ ប្រតិបត្តិការនេះក៏ទទួលបានការអនុញ្ញាតពីលោកឧត្តមសេនីយ៍ត្រី បោន ប៊ិន មេបញ្ជាការកងរាជអាវុធហត្ថខេត្ត និងមានការសម្របសម្រួលនីតិវិធីពីលោក កើត វណ្ណារ៉េត ព្រះរាជអាជ្ញាអមសាលាដំបូងខេត្តផងដែរ។ បច្ចុប្បន្ន វត្ថុតាងម៉ូតូត្រូវបានប្រគល់ជូនម្ចាស់ដើមវិញហើយ៕