(ភ្នំពេញ)៖ លោក សួស យ៉ារ៉ា ប្រធានគណៈកម្មការកិច្ចការបរទេស សហប្រតិបត្តិការអន្តរជាតិ និងព័ត៌មាន នៃរដ្ឋសភា បានចាត់ទុកសន្និសីទប្រធានសភា នៃអន្តរសភាលើកទី២ (ISC-2) ដែលកម្ពុជាធ្វើជាម្ចាស់ផ្ទះ គឺជាសង្គ្រាមការពារកេរ្ដិ៍ឈ្មោះប្រទេសកម្ពុជា ដែលប្រទេថៃបានយកបញ្ហាស្កេមអនឡាញ ធ្វើជាលេសដើម្បីឈ្លានពានទឹកដីប្រទេសកម្ពុជា។

ក្នុងសន្និសីទសារព័ត៌មានបង្ហាញអំពីលទ្ធផល «ដំណើរការសន្និសីទប្រធានសភានៃអន្តរសភាលើកទី២ (ISC-2)» នៅថ្ងៃទី២៨ ខែសីហា ឆ្នាំ២០២៦នេះ លោក សួស យ៉ារ៉ា បានអះអាងថា សង្គ្រាមការពារកេរ្ដិ៍ឈ្មោះនេះ គឺបានស្ដារឡើងវិញនូវកេរ្ដិ៍របស់កម្ពុជានៅលើឆាកអន្ដរជាតិ និងស្ដែងកាន់តែច្បាស់ទៅកាន់ពិភពលោកថា ប្រទេសថៃ មិនមែនយកបញ្ហាស្កេមអនឡាញ ដើម្បីឈ្លានពានឡើយ។

លោកបានថ្លែងយ៉ាងដូច្នេះថា «រឿងធំរបស់យើងជាងគេ គឺសង្គ្រាមការពារកេរ្ដិ៍ឈ្មោះ ចឹងសង្គ្រាមមិនសំខាន់តែលើអាវុធទេ តែសង្គ្រាមការពារគេឈ្មោះធំណាស់ អញ្ចឹងគេមិនមកបំផ្លាញកេរ្ដិ៍ឈ្មោះរបស់យើងបានទេ នៅពេលដែលយើងមានការប្រជុំកម្រិតប្រធានសភាសកលហើយ អញ្ចឹងគេដឹងថា កម្ពុជាតើជាកន្លែងស្កេម ហើយអ្នកឯងមិនមែនយកស្កែម ដើម្បីឈ្លានពានប្រទេសទេ»។

ផ្ទុយទៅវិញ យុទ្ធនាការបង្ក្រាបស្កេមអនឡាញ និងឆន្ទៈរបស់រាជរដ្ឋាភិបាលកម្ពុជា ក៏ត្រូវបានបង្ហាញទៅកាន់វេទិកាដ៏សំខាន់នេះ។ ជាក់ស្ដែង តំបន់ខ្លះក៏ត្រូវបង្ហាញថាប្រតិបត្តិការបង្ក្រាបទទួលបានជោគជ័យ នឹងគ្មានវត្តមានស្កេមអនឡាញនៅលើទឹកដីប្រទេសកម្ពុជា ខណៈសមត្ថកិច្ចជំនាញក៏កំពុងបន្ដធ្វើការងារនេះយ៉ាងសស្រាក់សស្រាំ។ នេះបើតាមការគូសបញ្ជាក់របស់លោក សួស យ៉ារ៉ា ទៅកាន់អ្នកសារព័ត៌មានជាតិ និងអន្ដរជាតិ។

បើតាមលោក សួស យ៉ារ៉ា, លទ្ធផលនៃការធ្វើជាម្ចាស់ផ្ទះនេះ ក៏បង្ហាញអំពីការសាមគ្គីភាពអន្ដរស្ថាប័ន ទាំងរដ្ឋាភិបាល ទាំងសភា យើងហៅថាចលនារួមគ្នា ដើម្បីប្រឆាំងច្បាប់ព្រៃ អ្នកខ្លាំងឈ្នះ ហើយអ្នកតូចចាញ់។ ដូច្នេះការប្រើប្រាស់ច្បាប់ព្រៃ មិនជោគជ័យទេ បើសិនជាជួបជុំគ្នាតាមរយៈវេទិកានេះ មានគណនេយ្យភាព នៃស្ថាប័ន និងដំណោះស្រាយផ្លូវច្បាប់។

មួយវិញទៀត អ្វីដែលកម្ពុជាទទួលបាន គឺសន្និសីទប្រធានសភានៃអន្តរសភាលើកទី២ (ISC-2) នឹងឈានទៅបង្កើតបានយន្ដការមួយដែលមានតួនាទីសង្កេតការណ៍បទឈប់បាញ់កម្រិតសភាសកល គ្រាដែលបច្ចុប្បន្ននេះ គឺមានតែយន្ដការ AOT របស់អាស៊ានតែប៉ុណ្ណោះ ដែលចុះទៅសង្កេតការណ៍ផ្ទៀតផ្ទាត់នៅតំបន់ជម្លោះ។ តម្លៃនេះ យន្ដការសង្កេតការណ៍បទឈប់បាញ់កម្រិតសភាសកលនេះ ក៏មានការទទួលស្គាល់ពីលោក បាន គីមមូន អតីតអគ្គលេខាធិការអង្គការសហប្រជាជាតិផងដែរ។

លោក សួស យ៉ារ៉ា បានបន្ដថា ចលនាដើម្បីសង្កេតការមើលរកបទឈប់បាញ់ ឬក៏ធ្វើជាអ្នកសម្រាប់សម្រួលជម្លោះ ដោយយកច្បាប់ជាធំ គឺត្រូវបានលើកឡើងលើកទីមួយនៅក្នុងចលនា ISC។ ក្នុងនាមយើងជាប្រទេសមួយក្រោមការដឹកនាំ និងចក្ខុវិស័យរបស់សម្ដេចតេជោ ហ៊ុន សែន យើងមានវិធីច្រើនណាស់ ដើម្បីការពារអធិបតេយ្យ ក្រៅពីលើកចុងកំណុង ដើម្បីដណ្ដើមមុខដីមកវិញ ប៉ុន្តែយើងនឹងបានសេចក្តីថ្លៃថ្នូរ និងការទទួលស្គាល់ជាអន្តរជាតិ ហើយប្រទេសណាដែលធ្វើការងាររំលោភច្បាប់អន្តរជាតិ ពិបាកនឹងថយក្រោយណាស់៕