(ភ្នំពេញ)៖ លោកស្រីបណ្ឌិតសភាចារ្យ ភឿង សកុណា រដ្ឋមន្ត្រីក្រសួងវប្បធម៌និងវិចិត្រសិល្បៈ បានលើកឡើងថា អំណាចទន់នៃសិល្បៈភាពយន្តមិនត្រឹមតែផ្តល់នូវ​ការកម្សាន្ត​ប៉ុណ្ណោះទេ ប៉ុន្តែថែមទាំងជាឧបករណ៍​ដ៏មានឥទ្ធិពលក្នុងការផ្សព្វផ្សាយពីសម្រស់​ធម្មជាតិ បេតិកភណ្ឌវប្បធម៌ សិល្បៈ ស្ថាបត្យកម្ម ប្រពៃណី និងទំនៀមទម្លាប់រស់នៅរបស់​ប្រជាជន នៃប្រទេសមួយទៅកាន់ពិភពលោក ដែលរួម​ចំណែក​យ៉ាងសំខាន់ក្នុងការទាក់ទាញ​ភ្ញៀវទេសចរ និងការលើកកម្ពស់កិត្យានុ​ភាព​​​ជាតិ។

លោកស្រីបានលើកឡើងបែបនេះ ក្នុងពិធីប្រគល់ពានរង្វាន់ មហោស្រពភាពយន្តកម្ពុជាអាស៊ីលើកទី៤ នៅសាលសន្និសីទចតុម្មុខ នៅថ្ងៃទី២៧ ខែសីហា ឆ្នាំ២០២៦ ដែលមានការចូលរួមពី នាយិកាគណៈកម្មការរៀបចំមហោស្រពភាពយន្តកម្ពុជាអាស៊ី ប្រធានមេប្រយោគ នៃមហោស្រពភាពយន្តកម្ពុជាអាស៊ីលើកទី៤ សិល្បករ សិល្បការិនី និងភ្ញៀវកិត្តិយសជាតិ អន្តរជាតិជាច្រើនរូប។

លោកស្រី ភឿង សកុណា បានលើកឡើងថា ភាពយន្ត គឺជាសិល្បៈសកលមួយ ដែលអាចឱ្យយើងស្វែងយល់ពីគ្រប់សម័យកាល និងគ្រប់ទីកន្លែង ហើយក៏ជាស្ពានតភ្ជាប់ទំនាក់ទំនងនៃប្រជាជាតិមួយទៅកាន់ពិភពលោក។ ​ជាពិសេសក្នុង​បរិបទនៃការរីកចម្រើនយ៉ាងឆាប់រហ័សនៃបច្ចេកវិទ្យា និងប្រព័ន្ធផ្សព្វផ្សាយភាពយន្តកំពុងក្លាយ​ជាឧបករណ៍ដ៏មានប្រសិទ្ធភាពសម្រាប់ការផ្សព្វ​ផ្សាយ​គោលដៅទេសចរណ៍ បង្កើនភាពទាក់ទាញ និងជំរុញការធ្វើដំណើររបស់ភ្ញៀវទេសចរផងដែរ។

លោស្រីបានបញ្ជាក់យ៉ាងដូច្នេះថា «អំណាចទន់នៃសិល្បៈភាពយន្តមិនត្រឹមតែផ្តល់នូវ​ការកម្សាន្ត​ប៉ុណ្ណោះទេ ប៉ុន្តែថែមទាំងជាឧបករណ៍​ដ៏មានឥទ្ធិពលក្នុងការផ្សព្វផ្សាយពីសម្រស់​ធម្មជាតិ បេតិកភណ្ឌវប្បធម៌ សិល្បៈស្ថាបត្យកម្ម ប្រពៃណី និងទំនៀមទម្លាប់រស់នៅរបស់​ប្រជាជន នៃប្រទេសមួយទៅកាន់ពិភពលោក ដែលរួម​ចំណែក​យ៉ាងសំខាន់ក្នុងការទាក់ទាញ​ភ្ញៀវទេសចរ និងការលើកកម្ពស់កិត្យានុ​ភាព​​​ជាតិ។ ជាមួយ​គ្នានេះ ទេសចរណ៍ភាពយន្ត ក៏ជួយរួមចំណែកដល់​ការ​បង្កើតការងារ និងប្រាក់ចំណូលសម្រាប់សហគមន៍មូលដ្ឋានតាមរយៈ​ការ​ផ្តល់សេវាកម្ម ការស្នាក់នៅ ម្ហូបអាហារ ការដឹកជញ្ជូន មគ្គុទ្ទេសក៍​ទេសចរណ៍ សិប្បកម្ម សិល្បៈទស្សនីយភាព និងផលិតផល​វប្បធម៌ជាដើម»។

សូមជម្រាបថា ដោយពិនិត្យឃើញពី​សារសំខាន់នេះ រាជរដ្ឋាភិបាល​កម្ពុជា ក្រោមការដឹកនាំប្រកបដោយគតិបណ្ឌិត​របស់ សម្តេច​មហាបវរធិបតី ហ៊ុន ម៉ាណែត នាយករដ្ឋមន្រ្តីកម្ពុជា បានបង្កើត​ក្រុមការងារ​អន្តរ​ក្រសួង ដើម្បីសម្របសម្រួលនិងគាំទ្រវិស័យទេសចរណ៍​ភាពយន្ត​នៅ​កម្ពុជា ដោយបានចាត់ទុក​ទេសចរណ៍ភាពយន្ត ជាទម្រង់ទេសចរណ៍បែបច្នៃប្រតិដ្ឋថ្មីមួយ ដែលកំពុងដើរ​តួនាទី​យ៉ាង​សំខាន់ក្នុងសេដ្ឋកិច្ចសកល៕