(កណ្តាល)៖ កុមារាជាបងប្អូនភ្លោះបង្កើតនឹងគ្នា អាយុ១៣ឆ្នាំ បានលង់ទឹកស្លាប់យ៉ាងសោកសៅ កាលពីថ្ងៃទី២៥ ខែសីហា ឆ្នាំ២០២៦ នៅចំណុចបឹងព្រែកចិន ស្ថិតក្នុងភូមិទេពអរជូន ឃុំកោះខែល ស្រុកស្អាង ខេត្តកណ្តាល។ ហេតុការណ៍ដ៏រន្ធត់នេះ បានបង្កការភ្ញាក់ផ្អើល និងសោកស្តាយយ៉ាងខ្លាំងដល់ក្រុមគ្រួសារ និងអ្នកភូមិ។

ជនរងគ្រោះទាំងពីរនាក់ជាសិស្ស និងមានទីលំនៅជាមួយគ្នាក្នុងភូមិឃុំកើតហេតុ។ តាមការបំភ្លឺពីលោកស្រី ហឿង សុខខៃ អាយុ៤០ឆ្នាំ ដែលត្រូវជាម្តាយ បានឱ្យដឹងថា នៅមុនពេលកើតហេតុ គាត់បាននាំកូនប្រុសទាំង៣នាក់ ទៅលេងទឹកនៅដីចំការព្រែកចិន ដែលមានជម្រៅត្រឹមចង្កេះ។

ខណៈពេលដែលគាត់រវល់មើលកូនប្រុសម្នាក់ទៀត ស្រាប់តែងាកមករកកូនប្រុសភ្លោះទាំងពីរ ក៏បាត់មិនឃើញ។ ទោះខំស្រែកហៅក៏មិនឮឆ្លើយតប រួចម្តាយក៏បានទៅរាវរកត្រង់កន្លែងដែលកូនលេងទឹកនោះ ក៏បានប៉ះកូនប្រុសម្នាក់ ហើយក៏ស្រង់កូនឡើងលើគោក។

បន្ទាប់មក លោកស្រីក៏បានរត់ទៅហៅប្តីនៅឯភូមិ និងអ្នកជិតខាងមកជួយរាវរកកូនប្រុសម្នាក់ទៀត។ ក្រោយពីរាវរកឃើញហើយ ក៏លើកកូនទាំងពីរដាក់លើម៉ូតូផាស់អាប់ ដឹកបញ្ជូនទៅមណ្ឌលសុខភាព ហើយក្រុមលោកគ្រូពេទ្យក៏បានជួយបញ្ជូនបន្តទៅមន្ទីរពេទ្យស្រុកកោះធំ។

ជាអកុសល ពេលទៅដល់មន្ទីរពេទ្យ ក្រុមគ្រូពេទ្យបានប្រាប់ថា កូនភ្លោះទាំងពីរនាក់បានស្លាប់បាត់ទៅហើយ។ ក្រោយមក ម្តាយក៏បានស្នើសុំឱ្យរថយន្តពេទ្យដឹកសពកូនទាំងពីរមកលំនៅឋានវិញ ដើម្បីរៀបចំធ្វើបុណ្យតាមប្រពៃណី។ ហេតុការណ៍នេះជាមេរៀនមួយសម្រាប់មាតាបិតាគ្រប់រូប ឱ្យបង្កើនការប្រុងប្រយ័ត្នខ្ពស់ចំពោះកូនៗនៅពេលលេងទឹក ដើម្បីចៀសវាងនូវសោកនាដកម្មដែលមិនគួរកើតមានឡើង៕