(ភ្នំពេញ)៖ លោកអភិសន្ដិបណ្ឌិត ស សុខា ឧបនាយករដ្ឋមន្ដ្រី រដ្ឋមន្ដ្រីក្រសួងមហាផ្ទៃ នឹងបណ្ដេញមន្ដ្រីចំណុះក្រសួងមហាផ្ទៃរូបណា ដែលផឹកស៉ីស្រវឹងហើយបង្កគ្រោះថ្នាក់ចរាចរណ៍ ឬបង្កភាពអសីលធម៌នៅក្នុងសង្គម ដោយមិនទាន់បូកបញ្ចូលការទទួលខុសត្រូវផ្សេងៗទៀតនោះទេ។ នេះបើតាមការឲ្យដឹងពីលោកបណ្ឌិត ទូច សុឃៈ អ្នកនាំពាក្យរងក្រសួងមហាផ្ទៃ នៅថ្ងៃទី២៦ ខែសីហា ឆ្នាំ២០២៦។

អ្នកនាំពាក្យរងក្រសួងមហាផ្ទៃរូបនេះ បានអះអាងទៀតថា ក្រៅពីការបង្កគ្រោះថ្នាក់ចរាចរណ៍ មន្ដ្រីទាំង៣ប្រភេទចំណុះក្រសួងមហាផ្ទៃ រួមមាន មន្ដ្រីនគរបាលជាតិ មន្ដ្រីរដ្ឋបាលស៉ីវិល និងមន្ដ្រីពន្ធនាគាររូបណា ដែលទទួលទានគ្រឿងស្រវឹងហើយទៅបង្កបញ្ហាដាក់អ្នកដទៃ ឬបង្កភាពអសីលធម៌ក្នុងសង្គមតាមទីសាធារណៈ ក៏ប្រឈមនឹងការបណ្ដេញចេញពីក្របខ័ណ្ឌដូចគ្នា។

លោក ទូច សុឃៈ បានថ្លែងយ៉ាងដូច្នេះថា «ក្នុងក្របខ័ណ្ឌក្រសួងមហាផ្ទៃ មន្ដ្រីទាំង៣ប្រភេទដែលមាន រដ្ឋបាលស៉ីវិល នគរបាលជាតិ និងមន្ដ្រីពន្ធនាគារ ដែលទទួលទានគ្រឿងស្រវឹង ហើយបើកបរបង្កគ្រោះថ្នាក់ចរាចរណ៍តាមដងផ្លូវ នឹងប្រឈមការបណ្ដេញចេញពីក្របខ័ណ្ឌ។ នេះមិនទាន់គិតដល់ការទទួលខុសត្រូវផ្សេងៗនៅឡើយទេ។ ហើយដូចគ្នា មន្ដ្រីទាំង៣ប្រភេទនេះ បើសិនជាទទួលទានគ្រឿងស្រវឹង ហើយទៅរករឿងអ្នកដទៃ ទៅបង្កភាពអសីលធម៌ក្នុងសង្គមតាមទីសាធារណៈនានា គឺការប្រឈមមុខការបណ្ដេញចេញពីក្របខ័ណ្ឌដូចគ្នា ដោយមិនទាន់គិតពីការទទួលខុសត្រូវផ្សេងផងដែរ»។

គោលការណ៍ដឹកនាំបែបនេះរបស់លោកអភិសន្ដិបណ្ឌិត ស សុខា ឧបនាយករដ្ឋមន្ដ្រី រដ្ឋមន្ដ្រីក្រសួងមហាផ្ទៃ គឺបានធ្វើឡើងនៅក្នុងកិច្ចប្រជុំមួយ នាថ្ងៃទី២៦ ខែសីហា ឆ្នាំ២០២៦នេះតែម្ដង។ នេះបើតាមអ្វីដែលលោក ទូច សុឃៈ បានគូសបញ្ជាក់៕