(ភ្នំពេញ)៖ ក្រសួងសុខាភិបាលបានចេញសេចក្តីក្រើនរំលឹកអំពីការកើនឡើងករណីជំងឺពងបែក ដៃ ជើង និងមាត់ (HFMD) ជាពិសេសលើកុមារអាយុក្រោម ៥ឆ្នាំ ដែលតម្រូវឱ្យមានការពិនិត្យព្យាបាលសមស្រប។ ជំងឺឆ្លងនេះបង្កដោយពពួកអង់តេរ៉ូវីរុស ហើយអាចឆ្លងតាមរយៈការប៉ះពាល់ផ្ទាល់ជាមួយវត្ថុរាវនៃផ្លូវដង្ហើម ទឹករងៃពីពងបែក និងលាមកអ្នកជំងឺ។ រោគសញ្ញារួមមានគ្រុនក្តៅ ដំបៅឈឺក្នុងមាត់ និងពងកន្ទួលក្រហមលើបាតដៃ បាតជើង និងកំប៉ះគូទ ដែលភាគច្រើនមានសភាពស្រាល ប៉ុន្តែក៏អាចបង្កផលវិបាកធ្ងន់ធ្ងរដល់ប្រព័ន្ធប្រសាទ និងផ្លូវដង្ហើមផងដែរ។

ដើម្បីបង្ការការឆ្លងរីករាលដាល សាធារណជនត្រូវប្រកាន់ខ្ជាប់នូវការអនុវត្តអនាម័យខ្ជាប់ខ្ជួន លាងសម្អាតដៃឱ្យបានញឹកញាប់ជាមួយសាប៊ូនិងទឹក ព្រមទាំងចៀសវាងការប៉ះពាល់ជិតស្និទ្ធជាមួយអ្នកជំងឺ។ ក្រសួងសុខាភិបាលសូមអំពាវនាវដល់ឪពុកម្តាយ និងអ្នកថែទាំកុមារ ឱ្យអនុវត្តវិធានការបង្ការដូចជា ការប្រើប្រាស់សម្ភារៈបរិភោគដាច់ដោយឡែក រក្សាកុមារឈឺនៅផ្ទះ និងផ្តល់អាហារបំប៉នគ្រប់គ្រាន់។ ឪពុកម្តាយត្រូវយកចិត្តទុកដាក់តាមដានរោគសញ្ញាជំងឺ និងស្វែងរកការពិនិត្យព្យាបាលនៅមណ្ឌលសុខភាព ឬមន្ទីរពេទ្យជាបន្ទាន់ ដើម្បីចៀសវាងផលវិបាក៕