(សៀមរាប)៖ លោកស្រីវេជ្ជបណ្ឌិត យក់ សម្បត្តិ រដ្ឋលេខាធិការក្រសួងសុខាភិបាល និងជានាយកគម្រោងលើកកម្ពស់គុណភាព និងសមធម៌សុខាភិបាល បានអញ្ជើញបិទសិក្ខាសាលាស្តីពី «ការត្រួតពិនិត្យតាមដានវឌ្ឍនភាពការងារផ្អែកលើសមិទ្ធិផល នៃគម្រោងលើកកម្ពស់គុណភាព និងសមធម៌សុខាភិបាល ដំណាក់កាលទី២» នាថ្ងៃទី២១ ខែសីហា ឆ្នាំ២០២៦នេះ នៅសណ្ឋាគារ រ៉ូយ៉ាល់អង្គររីសត ខេត្តសៀមរាប។

ថ្លែងក្នុងឱកាសនោះ លោកស្រីវេជ្ជបណ្ឌិត យក់ សម្បត្តិ បានសម្តែងនូវសេចក្តីសោមនស្សរីករាយយ៉ាងជ្រាលជ្រៅ ដែលបានចូលរួមក្នុងពិធីបិទសិក្ខាសាលាស្តីពី «ការត្រួតពិនិត្យតាមដានវឌ្ឍនភាពការងារផ្អែកលើសមិទ្ធផល នៃគម្រោងលើកកម្ពស់គុណភាព និងសមធម៌សុខាភិបាល ដំណាក់កាលទី២ (H-EQIP 2)» ដែលបានរៀបចំឡើងរយៈពេល ៣ថ្ងៃ ចាប់ពីថ្ងៃទី១៩ ដល់ថ្ងៃទី២១ ខែសីហា ឆ្នាំ២០២៦។

អង្គសិក្ខាសាលារយៈពេល ៣ថ្ងៃនេះ បានពិនិត្យវឌ្ឍនភាព បញ្ហាប្រឈម និងការអនុវត្តបន្ត។ គម្រោង H-EQIP 2 នេះ បានអនុវត្តមកដល់ឆ្នាំទីបួន ដែលទទួលបានលទ្ធផលគួរជាទីមោទនៈ រួមមាន៖ ការអនុវត្តផែនការវិនិយោគហេដ្ឋារចនាសម្ព័ន្ធសុខាភិបាល (HIIP) ការពិនិត្យស្រាវជ្រាវ និងគ្រប់គ្រងមហារីកមាត់ស្បូន ការពង្រីកសេវាពិនិត្យ និងគ្រប់គ្រងជំងឺទឹកនោមផ្អែម និងលើសសម្ពាធឈាម ការអនុវត្តសកម្មបញ្ជ្រាបយ៉េនឌ័រ និងបរិយាបទសង្គម ការកែលម្អគុណភាពសេវាសុខាភិបាល ការប្រើប្រាស់មូលនិធិសមធម៌សុខាភិបាល ការបញ្ចូលទិន្នន័យប្រព័ន្ធ Full EMR និងការប្រើប្រាស់ថវិកាឱ្យមានប្រសិទ្ធភាព។

លោកស្រីវេជ្ជបណ្ឌិត បានលើកឡើងពីលទ្ធផលដែលទទួលបានជោគជ័យ រួមមាន៖

* ការយល់ដឹងរួមអំពីវឌ្ឍនភាព សមិទ្ធផល និងបញ្ហាប្រឈមនៃការអនុវត្តគម្រោង H-EQIP
* កំណត់បានបញ្ហាអាទិភាព និងដំណោះស្រាយជាក់ស្តែងសម្រាប់សកម្មភាពដែលនៅសេសសល់
* ឯកភាពលើផែនការសកម្មភាព និងអាទិភាពសម្រាប់រយៈពេលដែលនៅសល់របស់គម្រោង
* ពង្រឹងការសម្របសម្រួល និងកិច្ចសហការរវាងអង្គភាពអនុវត្ត និងដៃគូពាក់ព័ន្ធ
* រៀបចំផែនការប្រើប្រាស់ថវិកាដែលនៅសល់ឱ្យមានប្រសិទ្ធភាព និងបញ្ចប់សកម្មភាពតាមកាលកំណត់។

លោកស្រីវេជ្ជបណ្ឌិត ក៏បានលើកពីបញ្ហាប្រឈមខ្លះៗ ដែលត្រូវធ្វើការលម្អ និងអនុវត្តបន្ត។ ជាពិសេសជំរុញនូវការងារអាទិភាពសំខាន់ៗ ជាសកម្មភាពដែលត្រូវអនុវត្តឱ្យបានចប់ជាស្ថាពរ មុនបំណាច់ឆ្នាំ២០២៧ ដែលជាឆ្នាំចុងក្រោយ នៃការអនុវត្តគម្រោង H-EQIP 2។

ជាមួយនេះ លោកស្រីវេជ្ជបណ្ឌិត បានផ្តាំផ្ញើជូនគ្រប់ភាគីពាក់ព័ន្ធទាំងអស់ បន្តរក្សាស្មារតីសាមគ្គីភាព កិច្ចសហការ និងការទទួលខុសត្រូវរួមគ្នា ដើម្បីឱ្យគម្រោង H-EQIP 2 អាចសម្រេចបាននូវលទ្ធផលដែលបានកំណត់៕