(បាត់ដំបង)៖ វេទិកាសម្ព័ន្ធសង្គមស៊ីវិល (វ.ស.ស.) នៃទីស្តីការ​​គណៈរដ្ឋមន្រ្តី បានសហការជាមួយរដ្ឋបាលខេត្តបាត់ដំបង រៀបចំ​វេទិកាសន្ទនា ក្រោមប្រធានបទស្ដីពី​ «ការពង្រឹងសមត្ថភាពអង្គការសង្គមស៊ីវិលក្នុងយុគសម័យ​​ឌីជីថល» នាព្រឹកថ្ងៃទី១៩ ខែសីហា ឆ្នាំ២០២៦ នៅខេត្តបាត់ដំបង។

អង្គវេទិកានេះបានប្រព្រឹត្តទៅក្រោមអធិបតីភាព​​លោក ប៉ៃ សំបូរ​ អគ្គលេខាធិការ ​នៃអគ្គលេខាធិការដ្ឋាន​​ វ.ស.ស. តំណាងលោក កឹមរ័ត្ន វិសិដ្ឋ នាយករង​​ខុទ្ទកាល័យសម្តេចមហាបវរធិបតី ហ៊ុន ម៉ាណែត នាយករដ្ឋមន្រ្តីនៃកម្ពុជា និងជាប្រធាន​​ក្រុមប្រឹក្សា​​​ភិបាល វ.ស.ស. លោក យឹម សៀប អភិបាលរងខេត្តបាត់ដំបង លោក ឈឿន ក្រៃយ៉ុង អភិបាលរងខេត្តបន្ទាយមានជ័យ និងលោក ងួន លីណា អភិបាលរងខេត្តប៉ៃលិន ដោយ​មានការចូលរួម​ពីតំណាង​អង្គការ​​សង្គមស៊ីវិលនិងមន្ទីរជំនាញ រួមទាំងរដ្ឋបាលក្រុង-ស្រុកជាច្រើននាក់មកពី​ខេត្តបាត់ដំបង ខេត្តបន្ទាយមានជ័យ និងខេត្តប៉ៃលិន។

ថ្លែងក្នុងអង្គវេទិកាសន្ទនានាព្រឹកនេះ លោក ប៉ៃ សំបូរ​ ​បានកោតសរសើរនិងវាយតម្លៃខ្ពស់​ចំពោះកិច្ចសហការយ៉ាងជិតស្និទ្ធរវាងអង្គការសង្គមស៊ីវិលក្នុងខេត្តទាំង៣ ជាមួយអាជ្ញាធរមូលដ្ឋាន​នៃខេត្តនីមួយៗ ក្នុងការជំរុញការ អភិវឌ្ឍសេដ្ឋកិច្ច-សង្គម​នៅថ្នាក់មូលដ្ឋានប្រកបដោយបរិយាបន្ន។

ឆ្លៀតក្នុងឱកាសនេះ លោកបានលើកទឹកចិត្តឱ្យយុវជនពង្រឹងសមត្ថភាពតាមរយៈការចូលរៀនវគ្គបណ្តុះបណ្តាលវិជ្ជាជីវៈនៅវិទ្យាស្ថាន​ជាតិពហុបច្ចេកទេសក្នុងខេត្តនីមួយៗ ដើម្បីទទួលបានឱកាសការងារនៅតាមក្រុមហ៊ុន សហគ្រាសក្នុងមូលដ្ឋាន ដែលអាចជួយបង្កើនប្រាក់ចំណូលសម្រាប់គ្រួសារនិងលើកកម្ពស់ជីវភាពរស់នៅកាន់តែល្អប្រសើរ ស្របតាមអាទិភាពគន្លឹះនៃយុទ្ធសាស្ត្រ​បញ្ចកោណ ដំណាក់កាលទី១ របស់រាជរដ្ឋាភិបាល នីតិកាលទី៧ នៃរដ្ឋសភា ក្រោមការដឹកនាំ​ប្រកបដោយគតិ​បណ្ឌិត​របស់សម្តេចមហាបវរធិបតី ហ៊ុន ម៉ាណែត នាយករដ្ឋមន្ត្រីនៃកម្ពុជា។

ជាងនេះទៀត លោក​​អគ្គលេខាធិការ​ក៏បានជំរុញ​ឱ្យអង្គការសង្គមស៊ីវិល បន្តយកចិត្តទុកដាក់ខ្ពស់ក្នុងការពង្រឹងសមត្ថភាពផ្នែកឌីជីថល ដើម្បីឈ្វេងយល់ឱ្យបានស៊ីជម្រៅអំពីសុវត្ថិភាព​​តាម​ប្រព័ន្ធ​បច្ចេកវិទ្យា និងពង្រឹងប្រសិទ្ធភាព ការងាររបស់ខ្លួន សំដៅ​ចូលរួមចំណែកជាមួយរាជរដ្ឋាភិបាលក្នុងជំរុញ​បរិវត្តកម្មឌីជីថល និងការកសាងសង្គមឌីជីថល​​ ដើម្បីលើកកម្ពស់​ការអភិវឌ្ឍសង្គមជាតិប្រកបដោយបរិយាបន្ន ក៏ដូចជា​ចូលរួម​ទប់ស្កាត់ព័ត៌មាន​ក្លែង​ក្លាយក្នុងសហគមន៍ផងដែរ។​

ក្នុងឱកាសនេះដែរ លោក យឹម សៀប បានកោតសរសើរ​ចំពោះការចូលរួមយ៉ាងសកម្ម​របស់អង្គការសង្គមស៊ីវិលជាមួយអាជ្ញាធរមូលដ្ឋានគ្រប់លំដាប់ថ្នាក់ ក្នុងការចូលរួមអភិវឌ្ឍ​លើគ្រប់វិស័យ ដោយឈលើមូលដ្ឋានសុខសន្តិភាព សុវត្ថិភាព និងនិរន្តរភាព។ លោកក៏បានលើកទឹកចិត្តឱ្យអង្គការ​​សង្គមស៊ីវិល​ទាំងអស់បន្តចូលរួមជាមួយអាជ្ញាធរមូលដ្ឋានដោយស្មោះត្រង់និងមានតម្លាភាព និងត្រូវអនុវត្តតួនាទីនិងភារកិច្ច​ស្របតាមលក្ខន្តិកៈនិងបទបញ្ជាផ្ទៃក្នុងរបស់ខ្លួន ក៏ដូចជាត្រូវប្រកាន់ខ្ជាប់នូវការគោរពច្បាប់និងបទដ្ឋានគតិយុត្តជាធរមាន ដើម្បីចូលរួមលើកកម្ពស់នីតិរដ្ឋ និងជំរុញវឌ្ឍនភាពសង្គមប្រកបដោយបរិយាបន្ន។ ​

សូមជម្រាបជូនថា ដើម្បីចូលរួមចំណែកពង្រឹងសមត្ថភាពរបស់អង្គការ​សង្គម​ស៊ីវិលឱ្យបានឈ្វេងយល់អំពី​បរិវត្តកម្ម​​​ឌីជីថល និងការយល់ដឹងអំពី​គោលនយោបាយសេដ្ឋកិច្ចនិងសង្គម​ឌីជីថលកម្ពុជា ២០២១-២០៣៥ វ.ស.ស. បានរៀបចំឱ្យមាន​បទបង្ហាញក្រោមប្រធានបទ «ការយល់ដឹងអំពីអក្ខរកម្ម​ឌីជីថលនិងសុវត្ថិភាព​តាម​ប្រព័ន្ធ​បច្ចេកវិទ្យា​សម្រាប់អង្គការសង្គមស៊ីវិល» ដែលបានធ្វើបទបង្ហាញដោយលោក ហ៊ាង សុបញ្ញា អ្នកជំនាញមកពីបណ្ឌិត្យសភា​​​​បច្ចេកវិទ្យា​ឌីជីថលកម្ពុជាផងដែរ៕