(បាត់ដំបង)៖ គម្រោងសាកល្បងញែកសំរាម សំណល់រឹងតាមលំនៅឋាន ក្នុងក្រុងបាត់ដំបង ត្រូវបានប្រកាសចាប់ផ្តើមនៅថ្ងៃទី១៨ ខែសីហា ឆ្នាំ២០២៦ នាសាលាក្រុងបាត់ដំបង ខេត្តបាត់ដំបង។

ពិធីនេះប្រព្រឹត្តទៅក្រោមអធិបតីភាពលោក សាបូ អូហ្សាណូ រដ្ឋលេខាធិការក្រសួងបរិស្ថាន លោក សុខ លូ អភិបាលខេត្តបាត់ដំបង និងលោក Frank Jattke ប្រធានក្រុមការងារអាស៊ាននៃទីភ្នាក់ងារអាល្លឺម៉ង់សម្រាប់កិច្ចសហប្រតិបត្តិការអន្តរជាតិ (GIZ) រួមជាមួយអ្នកចូលរួមជាច្រើនរូប។

លោក សុខ លូ បានថ្លែងស្វាគមន៍ និងបានលើកឡើងពីការកើនឡើងនៃបរិមាណសំណល់នៅក្រុងបាត់ដំបង។ លោកសង្ឃឹមថា គម្រោងនេះនឹងជួយគ្រប់គ្រងសំណល់បានត្រឹមត្រូវ ការពារការបំពុលបរិស្ថាន ប៉ះពាល់ដល់សុខភាពសាធារណៈ និងសោភ័ណភាពទីក្រុង។

លោកបានសង្កត់ធ្ងន់ពីសារៈសំខាន់នៃការចូលរួមពីប្រជាពលរដ្ឋក្នុងការផ្លាស់ប្តូរទម្លាប់ចោលសំរាម ទៅជាការទុកដាក់ និងញែកសំរាមប្រកបដោយចីរភាព។

លោក Frank Jattke បានបញ្ជាក់ថា ក្រសួងបរិស្ថាន និង GIZ កំពុងអនុវត្តគម្រោងគំនិតផ្តួចផ្តើមកំណើនបៃតងសម្រាប់សេដ្ឋកិច្ចចក្រាសម្រាប់ការគ្រប់គ្រងសំណល់ប្រកបដោយចីរភាព (GGI4CE) ដើម្បីដោះស្រាយបញ្ហាសំរាម និងដាក់បញ្ចូលគោលការណ៍សេដ្ឋកិច្ចចក្រាទៅក្នុងប្រព័ន្ធគ្រប់គ្រងសំណល់នៅកម្ពុជា។

លោក សាបូ អូហ្សាណូ បានគូសបញ្ជាក់ថា ការចាប់ផ្តើមគម្រោងសាកល្បងនេះ មិនមែនត្រឹមតែជាវិធីសាស្ត្រថ្មីក្នុងការគ្រប់គ្រងសំរាមប៉ុណ្ណោះទេ ប៉ុន្តែជាការចាប់ផ្តើមនៃការផ្លាស់ប្តូរទម្លាប់ និងឥរិយាបថរបស់ប្រជាពលរដ្ឋចំពោះសំណល់ ដោយចាប់ផ្តើមពីលំនៅឋាន និងគ្រួសារផ្ទាល់។ ក្រសួងបរិស្ថានកំពុងផ្តោតសំខាន់លើការញែកសំរាមនៅនឹងប្រភព ដែលនឹងជួយកាត់បន្ថយបរិមាណសំណល់ បង្កើនការកែច្នៃ និងប្រើប្រាស់ធនធានឡើងវិញ ព្រមទាំងកាត់បន្ថយការចំណាយក្នុងការប្រមូល និងដឹកជញ្ជូន។

គម្រោងសាកល្បងនេះនឹងផ្តោតលើប្លុកទី២ (ផ្លូវលេខ១, ១.៥, ២, ២.៥, និងផ្លូវលេខ៣) ដែលជាតំបន់ពាណិជ្ជកម្មមានដង់ស៊ីតេប្រជាជនខ្ពស់ និងប្លុកទី៣ (សហគមន៍កំពង់ក្របី) ដែលជាសហគមន៍រស់នៅបែបប្រមូលផ្តុំ។ ការសាកល្បងនេះនឹងណែនាំប្រព័ន្ធញែកសំរាមជាបីប្រភេទ រួមមានសំរាមសរីរាង្គ សំរាមកែច្នៃឡើងវិញ និងសំរាមផ្សេងៗ ដើម្បីឆ្ពោះទៅរកបរិស្ថានស្អាត បៃតង និងចីរភាពនៅកម្ពុជា៕