(ត្បូងឃ្មុំ)៖ នៅថ្ងៃទី១៧ ខែសីហា ឆ្នាំ២០២៦ នេះ លោកឧត្តមសេនីយ៍ត្រី រ័ត្ន ចាន់ណា មេបញ្ជាការ កងរាជអាវុធហត្ថខេត្តត្បូងឃ្មុំ បានដឹកនាំរៀបចំពិធីផ្សព្វផ្សាយអប់រំចិត្តសាស្ត្រ ជូនដល់នាយទាហាន នាយទាហានរង និងពលទាហាន ស្ថិតនៅសាលប្រជុំធំ នៃអគារសេនាធិការដ្ឋានបញ្ជាការដ្ឋានកងរាជអាវុធហត្ថខេត្ត ព្រមទាំងបួងសួងសេចក្តីសុខ ដល់កងកម្លាំងទាំងអស់ផងដែរ។

ការរៀបចំកម្មវិធីអប់រំចិត្តសាស្ត្រនាពេលនេះ ធ្វើឡើងក្នុងគោលបំណងពង្រឹងស្មារតី ឆន្ទៈ ម្ចាស់ការ វិន័យ និងក្រមសីលធម៌ក្នុងការអនុវត្តភារកិច្ច ព្រមទាំងលើកកម្ពស់ចំណេះដឹង បំផុសស្មារតីស្រឡាញ់ជាតិ និងភាពស្មោះត្រង់របស់កងកម្លាំងអាវុធហត្ថ ក្នុងការបម្រើជាតិ និងប្រជាជនឱ្យកាន់តែមានប្រសិទ្ធភាពខ្ពស់។

មានប្រសាសន៍សំណេះសំណាលក្នុងឱកាសនោះ លោកឧត្តមសេនីយ៍ត្រី រ័ត្ន ចាន់ណា បានពាំនាំនូវការសួរសុខទុក្ខពីសំណាក់ថ្នាក់ដឹកនាំគ្រប់ជាន់ថ្នាក់ និងបានថ្លែងនូវការកោតសរសើរ ដឹងគុណចំពោះស្មារតីលះបង់ និងការខិតខំប្រឹងប្រែងបំពេញភារកិច្ចនាពេលកន្លងមករបស់កងកម្លាំងទាំងអស់។

ជាមួយគ្នានេះ លោកមេបញ្ជាការបានផ្តល់នូវអនុសាសន៍ណែនាំ និងលើកទឹកចិត្តសំខាន់ៗដល់កងកម្លាំង រួមមាន៖
ពង្រឹងវិន័យ និងក្រមសីលធម៌៖ ត្រូវប្រកាន់ខ្ជាប់នូវបទបញ្ជាផ្ទៃក្នុង វិន័យកងទ័ព និងសីលធម៌រស់នៅឱ្យបានខ្ជាប់ខ្ជួន ដើម្បីធ្វើជាគំរូដ៏ល្អក្នុងសង្គម។
ស្មោះត្រង់ និងម្ចាស់ការ៖ ត្រូវមានស្មារតីស្មោះត្រង់ដាច់ខាតចំពោះជាតិ សាសនា ព្រះមហាក្សត្រ និងរាជរដ្ឋាភិបាល ព្រមទាំងមានម្ចាស់ការខ្ពស់លើការងារការពារសន្តិសុខ សុវត្ថិភាព និងរក្សារៀបរយសាធារណៈជូនប្រជាពលរដ្ឋ។
ពង្រឹងសមត្ថភាព និងសាមគ្គីភាព៖ ត្រូវខិតខំដុសខាត់ចំណេះដឹង សមត្ថភាពបន្ថែមជាប្រចាំ និងរក្សាសាមគ្គីភាពផ្ទៃក្នុងឱ្យបានរឹងមាំដូចបងប្អូន ដើម្បីរួមគ្នាតស៊ូជះឥទ្ធិពលវិជ្ជមាន និងជម្នះគ្រប់ឧបសគ្គក្នុងការបំពេញបេសកកម្មជូនជាតិមាតុភូមិ។

បន្ថែមពីនេះ លោកមេបញ្ជាការក៏បានគូសបញ្ជាក់យ៉ាងម៉ឺងម៉ាត់ថា កងកម្លាំងគ្រប់រូបត្រូវត្រៀមលក្ខណៈសម្បត្តិរួចជាស្រេចទាំងកម្លាំងកាយ ចិត្ត និងមធ្យោបាយ ដើម្បីឆ្លើយតបបានទាន់ពេលវេលារាល់បទបញ្ជា និងការងារដែលថ្នាក់លើប្រគល់ជូន ប្រកបដោយទំនួលខុសត្រូវខ្ពស់បំផុត៕