(ភ្នំពេញ)៖ គណៈប្រតិភូធុរកិច្ចមកពីហុងកុង ក្វាងទុង និងម៉ាកាវ បានបង្ហាញ​ចំណាប់អារម្មណ៍មានបំណងវិនិយោគនៅកម្ពុជាលើវិស័យមានសក្តានុពលមួយចំនួន។

បំណងចង់វិនិយោគរបស់គណៈប្រតិភូធុរកិច្ចមកពីហុងកុង ក្វាងទុង និងម៉ាកាវ ស្តែងឡើងក្នុងជំនួបជាមួយសម្តេចមហាបវរធិបតី ហ៊ុន ម៉ាណែត នាយករដ្ឋមន្ត្រី​កម្ពុជា នៅរសៀលថ្ងៃសុក្រ ទី៧ ខែសីហា ឆ្នាំ២០២៦នេះ។

នៅរសៀលថ្ងៃនេះ សម្តេចមហាបវរធិបតី បានអនុញ្ញាតឱ្យគណៈប្រតិភូ​សភា​ពា​ណិជ្ជ​កម្មចិនប្រចាំទីក្រុងហុងកុង (CGCC) និងសម្ព័ន្ធសហគ្រិនតំបន់​ឆ្នេរ​សមុទ្រ​​ក្វាង​ទុង-ហុងកុង-ម៉ាកាវ (GBA Alliance) ដែលមានចំនួនប្រមាណជា ២០ក្រុមហ៊ុន ដឹកនាំដោយលោក Jonathan K.S. Choi ប្រធានក្រុមហ៊ុន Sunwah Group, ប្រធាន CGCC និងជាប្រធាន GBA Alliance ចូលជួបសម្តែងការគួរសម និងពិភាក្សាការងារ នៅវិមានសន្តិភាព។

ក្នុងជំនួបនេះ គណៈប្រតិភូCGCC និង GBA Alliance បានសម្ដែងចំណាប់​អារម្មណ៍ និងវាយតម្លៃខ្ពស់ចំពោះភាពរីកចម្រើនយ៉ាងឆាប់រហ័ស​លើគ្រប់​វិស័យ​នៅកម្ពុជា និងបានបង្ហាញជំនឿទុកចិត្តយ៉ាងមុតមាំចំពោះឱកាស​ការវិនិយោគ​នៅកម្ពុជា។ គណៈប្រតិភូ បានជម្រាបជូនសម្ដេចមហាបវរធិបតីថា ដំណើរ​ទស្ស​ន​​កិច្ចធុរកិច្ចមកកាន់កម្ពុជានាឱកាសនេះ គឺដើម្បីស្វែងយល់ពីកាលានុវត្តភាព​ក្នុង​ការវិនិយោគលើវិស័យសក្ដានុពលសំខាន់ៗជាច្រើននៅកម្ពុជា ដែលរួមមាន៖ ហេដ្ឋា​រចនាសម្ព័ន្ធ និងអចលនទ្រព្យ, ធនាគារ និងហិរញ្ញវត្ថុ, បច្ចេកវិទ្យា, បញ្ញា​សិប្បនិម្មិត,ពាណិជ្ជកម្មតាមប្រព័ន្ធអេឡិចត្រូនិក (e-Commerce), ថាមពល, ការដឹកជញ្ជូននិងឡូជីស្ទីក, អាកាសចរណ៍, កសិកម្ម, អប់រំ និងបណ្តុះបណ្តាល​វិជ្ជាជីវៈ និងសុខាភិបាល។

សម្តេចមហាបវរធិបតីនាយករដ្ឋមន្ត្រី បានស្វាគមន៍ចំពោះចំណាប់អារម្មណ៍​របស់​គណៈប្រតិភូ ក្នុងការស្វែងរកឱកាសវិនិយោគលើវិស័យសក្តានុពលនៅកម្ពុជា។ សម្តេចប្រមុខរាជរដ្ឋាភិបាល បានគូសរំលេចអំពីការដាក់ចេញ​គោលនយោបាយ និងវិធានការចាំបាច់នានារបស់រាជរដ្ឋាភិបាល ក្នុងការលើកទឹកចិត្តដល់​វិនិយោ​គិន, ការកែទម្រង់ស្ថាប័ន, ការធ្វើសាមញ្ញកម្មនីតិវិធីនានា ព្រមទាំងការផ្តល់​ការ​លើកចិត្តផ្នែកពន្ធដារលើវិស័យសក្តានុពលមួយចំនួន សំដៅធានាភាពរីក​ចម្រើន និងជោគជ័យរបស់វិនិយោគិននៅកម្ពុជា។ ជាមួយគ្នានេះ សម្ដេចមហាបវរធិប​តី​បានបន្តថា រាជរដ្ឋាភិបាលប្ដេជ្ញានឹងបន្តអភិវឌ្ឍហេដ្ឋារចនាសម្ព័ន្ធតភ្ជាប់​ ទាំង​ផ្លូវ​គោក ផ្លូវទឹក ផ្លូវដែកឱ្យកាន់តែប្រសើរឡើង ក៏ដូចជាការតភ្ជាប់ផ្លូវអាកាស​ជាមួយ​អន្តរជាតិ​ សំដៅកាត់បន្ថយថ្លៃដើម នៃការដឹកជញ្ជូន។

សម្ដេច​មហាបវរ​ធិបតី បានសង្កត់ធ្ងន់ថា ការវិនិយោគនៅកម្ពុជា គឺជាឱកាស​ក្នុង​ការ​បោះជំហានឈានចូលទៅក្នុងខ្សែច្រវាក់ផ្គត់ផ្គង់ផលិតផលទៅកាន់តំបន់ និង​ពិភពលោក ដោយសារកម្ពុជាមានកិច្ចព្រមព្រៀងពាណិជ្ជកម្មសេរីទ្វេភាគី និង​តំបន់។ សម្ដេចមហាបវរធិបតី ក៏បានគូសបញ្ជាក់ពីការប្ដេជ្ញាចិត្ត​របស់រាជ​រដ្ឋាភិ​បាលក្នុងការធានានូវបរិយាកាសវិនិយោគនៅកម្ពុជា ប្រកបដោយភាពធន់, ភាព​ប្រកួតប្រជែង, និងសុខសុវត្ថិភាព។

សម្ដេចមហាបវរធិបតី ហ៊ុន ម៉ាណែត បានលើកទឹកចិត្តគណៈប្រតិភូCGCC និង GBA Alliance ឱ្យបន្តផ្សារភ្ជាប់ទំនាក់ទំនងឱ្យ​កាន់តែជិត​ស្និទ្ធ​ជាមួយ​ក្រសួង-ស្ថាប័នកម្ពុជា ដើម្បីចាប់យកឱកាសក្នុងការវិនិយោគជាក់​ស្ដែងនៅ​កម្ពុជា៕