(កំពង់ស្ពឺ)៖ កម្លាំងកងរាជអាវុធហត្ថខេត្តកំពង់ស្ពឺ បានធ្វើការបង្ក្រាប និងឃាត់ខ្លួនក្រុមក្មេងទំនើងចំនួន ០៣ក្រុម ដែលមានគ្នាសរុប ១៦នាក់ បន្ទាប់ពីពួកគេបានធ្វើសកម្មភាពបង្ហោះម៉ូតូ អូសជន្ទុលម៉ូតូ និងជិះម៉ូតូជ្រែក បង្កការរំខានយ៉ាងអនាធិបតេយ្យលើដងផ្លូវសាធារណៈ ធ្វើឱ្យប៉ះពាល់យ៉ាងធ្ងន់ធ្ងរដល់សណ្តាប់ធ្នាប់សង្គម និងសុវត្ថិភាពអ្នកធ្វើដំណើរ។

ការបង្ក្រាបនេះធ្វើឡើងតាមរយៈការប្តឹងរបស់ប្រជាពលរដ្ឋតាមរយៈលេខទូរស័ព្ទអន្តរាគមន៍ Hotline 1292។

ប្រតិបត្តិការនេះបានអនុវត្តតាមគោលការណ៍ដឹកនាំរបស់នាយឧត្តមសេនីយ៍ សៅ សុខា អគ្គមេបញ្ជាការរង កងយោធពលខេមរភូមិន្ទ មេបញ្ជាការ កងរាជអាវុធហត្ថលើផ្ទៃប្រទេស ព្រមទាំងមានការណែនាំដោយផ្ទាល់ពីសំណាក់លោកបណ្ឌិត ជាម ច័ន្ទសោភ័ណ អភិបាលខេត្តកំពង់ស្ពឺ ក្រោមការដឹកនាំបញ្ជាយ៉ាងម៉ឺងម៉ាត់ពីសំណាក់លោក ឧត្តមសេនីយ៍ត្រី ម៉េង ស្រ៊ុន មេបញ្ជាការ កងរាជអាវុធហត្ថខេត្តកំពង់ស្ពឺ។

ក្រុមក្មេងទំនើងទាំងនេះ ត្រូវបាននាំយកមកអប់រំណែនាំ ធ្វើកិច្ចសន្យាបញ្ឈប់សកម្មភាពខុសច្បាប់ និងដកហូតម៉ូតូទុកជាបណ្តោះអាសន្ន នៅទីបញ្ជាការកងរាជអាវុធហត្ថខេត្តកំពង់ស្ពឺ។
ក្នុងចំណោមអ្នកដែលត្រូវបានឃាត់ខ្លួនមានឈ្មោះ ធុល ជរា ភេទប្រុស អាយុ ១៧ឆ្នាំ មុខរបរកម្មកររោងចក្រ ដែលប្រព្រឹត្តនៅចំណុចវិមានឯករាជ្យ ក្រុងច្បារមន កាលពីថ្ងៃទី១២ ខែកក្កដា ឆ្នាំ២០២៦។ ចំណែកក្រុមទីពីរមាន ០៨នាក់ ដែលប្រព្រឹត្តនៅចំណុចផ្សារកំពង់ស្ពឺ ផ្លូវលេខ១៤៣ កាលពីថ្ងៃទី១១ ខែកក្កដា ឆ្នាំ២០២៦។

សកម្មភាពបង្ក្រាបនេះ បង្ហាញពីការប្តេជ្ញាចិត្តខ្ពស់របស់កងកម្លាំងមានសមត្ថកិច្ច ក្នុងការរក្សាសន្តិសុខ សណ្តាប់ធ្នាប់សាធារណៈ និងសុវត្ថិភាពសង្គម ព្រមទាំងជាសារដាស់តឿនដល់យុវជនទាំងអស់ឲ្យបញ្ឈប់រាល់សកម្មភាពដែលនាំឱ្យខូចខាតដល់ខ្លួនឯង គ្រួសារ និងសង្គមជាតិ៕