(ភ្នំពេញ)៖ លោក ហ្សង់ ហ្វ្រង់ស្វ័រតាន់ រដ្ឋមន្ដ្រីប្រតិភូអមនាយករដ្ឋមន្ដ្រី បានលើកឡើងថា ក្នុងជំនួបជាមួយមេដឹកនាំចិន សម្ដេចមហាបវរធិបតី ហ៊ុន ម៉ាណែត នាយករដ្ឋមន្ដ្រីនៃកម្ពុជា បានគូសបញ្ជាក់អំពីការប្ដេជ្ញាចិត្តរបស់រាជរដ្ឋាភិបាលកម្ពុជា ក្នុងការបន្ដសហការជាមួយរដ្ឋាភិបាលចិន ក្នុងការបង្ក្រាប និងបោសសម្អាតបទល្មើសឆបោកតាមប្រព័ន្ធបច្ចេកវិទ្យា (Online Scams)។

ការឲ្យដឹងពីសំណាក់លោក ហ្សង់ ហ្វ្រង់ស្វ័រតាន់ បែបនេះធ្វើឡើងក្នុងសន្និសីទសារព័ត៌មានបង្ហាញអំពីលទ្ធផល នៃការបំពេញទស្សនកិច្ចការងាររបស់សម្ដេចមហាបវរធិបតី ហ៊ុន ម៉ាណែត ទៅកាន់សាធារណរដ្ឋប្រជាមានិតចិន នាយប់ថ្ងៃទី១៧ ខែកក្កដា ឆ្នាំ២០២៦។

លោក ហ្សង់ ហ្វ្រង់ស្វ័រតាន់ បានថ្លែងយ៉ាងដូច្នេះថា «ក្នុងជំនួបជាមួយមេដឹកនាំចិន កម្ពុជាប្ដេជ្ញាថានឹងបន្ដសហការជាមួយចិន ក្នុងការបង្ក្រាប និងបោសសម្អាត​ការឆបោកតាមប្រព័ន្ធបច្ចេកវិទ្យា ដើម្បីពង្រឹងទំនុកចិត្ត ជាពិសេសរវាងប្រជាជនកម្ពុជា និងប្រជាជនចិន»។

ក្រៅពីការប្ដេជ្ញាចិត្តបង្ក្រាបបទល្មើសនេះ ក្នុងជំនួបជាមួយមេដឹកនាំចិន លោក ហ្សង់ ហ្វ្រង់ស្វ័រតាន់ បានអះអាងថា កម្ពុជា-ចិន ប្ដេជ្ញាបន្ដធ្វើការជាមួយគ្នាដើម្បីពង្រឹងជំនឿទុកចិត្តនយោបាយ ឲ្យកាន់តែរឹងមាំបន្ថែមទៀត។ កម្ពុជា-ចិន ប្រកាសរួមគ្នាតម្លើងកិច្ចសន្ទនាយុទ្ធសាស្ដ្រ២បូក២ ពោលគឺរវាងរដ្ឋមន្ដ្រីការបរទេស និងរដ្ឋមន្ដ្រីការពារជាតិនៃប្រទេសទាំងពីរ ទៅជាកិច្ចសន្ទនាយុទ្ធសាស្ដ្រ៣បូក៣ ដោយបន្ថែមរដ្ឋមន្ដ្រីក្រសួងមហាផ្ទៃ (កម្ពុជា) និងរដ្ឋមន្ដ្រីក្រសួងសន្ដិសុខជាតិ (ចិន)។

បើតាមលោករដ្ឋមន្ដ្រីប្រតិភូអមនាយករដ្ឋមន្ដ្រី ហ្សង់ ហ្វ្រង់ស្វ័រតាន់, កម្ពុជា-ចិន វាយតម្លៃខ្ពស់ចំពោះវឌ្ឍនភាពនៃការទំនាក់ទំនងរវាងគ្នា ក្នុងនាមជាដៃគូយុទ្ធសាស្ដ្រគ្រប់ជ្រុងជ្រោយ។ កម្ពុជា-ចិន ប្ដេជ្ញាបន្ដពង្រឹងទំនាក់ទំនងរវាងគ្នាឲ្យបានរឹងមាំថែមទៀត ដោយពង្រឹងមិត្តភាពដែកថែប និងកិច្ចសហប្រតិបត្តិការត្ប​ូងពេជ្រ និងដោយបន្ដអនុវត្តជាក់ស្ដែងការកសាងសហគមន៍ជោគវាសនារួមកម្ពុជា-ចិន គ្រប់រដូវកាលក្នុងយុគសម័យថ្មី។

ចិន បានចាត់ទុកទំនាក់ទំនងជាមួយកម្ពុជាថា ជាអាទិភាពនៃការទូតរបស់ចិន រីឯកម្ពុជា ប្រកាន់ខ្ជាប់ឥតងាករេនូវគោលការណ៍ចិនតែមួយ៕