(បរទេស)៖ អង់គ្លេស នឹងមិនទាន់វិលត្រឡប់ទៅផ្ទះវិញភ្លាមៗទេ ក្រោយជ្រុះចេញពីព្រឹត្តិការណ៍បាល់ទាត់ពិភពលោក FIFA World Cup 2026 ក្រោមថ្វីជើងរបស់អាហ្សង់ទីន ដោយត្រូវរង់ចាំលេងទល់នឹងបារាំង ដើម្បីដណ្តើមចំណាត់ថ្នាក់លេខ៣ បន្តទៀត។

ក្តីសង្ឃឹមរបស់ក្រុមតោកំណាចអង់គ្លេស ក្នុងការឡើងវគ្គផ្តាច់ព្រ័ត្រ World Cup ជាលើកដំបូង ក្នុងរយៈពេល ៦០ឆ្នាំ ត្រូវបានរលាយដូចអំបិលត្រូវទឹក បន្ទាប់ពីប្រធានក្រុម Lionel Messi បានបញ្ជូនបាល់ឱ្យ Lautaro Martinez តែតបញ្ចូលទីបានសម្រេចនៅនាទី៩០+២ បន្ទាប់ពីពួកគេជាក្រុមនាំមុខ ១គ្រាប់មុនតាំងពីចាប់ផ្តើមលេងវគ្គទី២ បាន ១០នាទីមក។

ពួកគេត្រូវប្រឈមមុខនឹងក្រុមនៅតំបន់អឺរ៉ុបដូចគ្នា គឺមាន់គកបារាំង អតីតក្រុមរងជើងឯក World Cup 2022 នៅប្រទេសកាតា ក្នុងការប្រកួតប្រជែងយកចំណាត់ថ្នាក់លេខ៣ និងជាការប្រកួតលើកទី១០៣ ក្នុងចំណោម ៤៨ប្រទេស នៅ World Cup ជំនាន់ទី២៣ ដែលមានសហរដ្ឋអាមេរិក មិចស៊ិក និងកាណាដា ធ្វើម្ចាស់ផ្ទះរួមគ្នា។

អង់គ្លេស អតីតក្រុមជើងឯក World Cup តែ ១លើកកាលឆ្នាំ១៩៦៦ និងកំពុងឈរនៅលេខ៤ ក្នុងតារាងចំណាត់ថ្នាក់ពិភពលោក FIFA World Ranking ត្រូវតតាំងនឹងបារាំង ដែលឈរនៅលេខរៀងទី១ ពិភពលោក និងជាអតីតម្ចាស់ពាន World Cup ឆ្នាំ១៩៩៨ និងឆ្នាំ២០១៨ នឹងធ្វើឡើងនារាត្រីម៉ោង ៤ទៀបភ្លឺ ឈានចូលព្រឹកថ្ងៃអាទិត្យ ទី១៩ ខែកក្កដា (ម៉ោងនៅកម្ពុជា)៕