(ភ្នំពេញ)៖ បន្ទាប់ពីបើកដំណើរការរយៈពេលជាង២ឆ្នាំនៅកម្ពុជា រោងចក្រតូយ៉ូតា បាន​បោះ​ជំហានយ៉ាងរឹងមាំ ហើយនៅថ្ងៃនេះបន្ត​ទៅកាន់វឌ្ឍនភាពថ្មីជាមួយការសម្ពោធដាក់ឱ្យដំណើរ​ការការផ្គុំ និងដំឡើងរថយន្តស៊េរីថ្មី TOYOTA HILUX TRAVO ដែលជា​រថ​យន្ត​ផ្គុំ និង​ដំឡើង​ដោយវិស្វករខ្មែរសុទ្ធសាធ។

ពិធីសម្ពោធដាក់ឱ្យដំណើរការការផ្គុំ​ និងដំឡើងរថយន្តស៊េរីថ្មីរបស់ក្រុមហ៊ុនតូយ៉ូតា ត្រូវបាន ប្រា​រព្ធ​ឡើងយ៉ាងមហោឡារិកនាព្រឹកថ្ងៃព្រហស្បតិ៍ ទី២ ខែកក្កដា ឆ្នាំ២០២៦នេះ នៅទីតាំង​រោង​​ចក្រ​តូ​យ៉ូ​តា ស៊ុយស៊ូ មេនូហ្វេកឆឺរីង ស្ថិតនៅតំបន់សេដ្ឋកិច្ចពិសេសរ៉ូយ៉ាល់គ្រុបភ្នំពេញ​របស់​អ្នកឧកញ៉ា គិត ម៉េង។ ពិធីនេះប្រព្រឹត្តទៅក្រោមអធិបតីភាពលោកឧបនាយករដ្ឋមន្ត្រី ស៊ុន ចាន់ថុល អនុ​ប្រ​ធាន​ទី១ ក្រុមប្រឹក្សាអភិវឌ្ឍន៍កម្ពុជា និងលោក អ៊ូអិណុ អាត់ស៊ូស៊ី ឯក​អគ្គ​រាជ​ទូតជប៉ុន​ប្រចាំនៅ​កម្ពុជា ព្រមទាំងមានការអញ្ជើញចូលរួមពីលោក ហែម វណ្ឌី រដ្ឋមន្ត្រី​ក្រសួង​ឧស្សាហកម្ម វិទ្យា​សាស្ត្រ បច្ចេកវិទ្យា និងនវានុវត្តន៍ មន្ត្រីជាន់ខ្ពស់ពីបណ្តាក្រសួង ស្ថាប័ននានា នៃរាជរដ្ឋា​ភិ​បាល​កម្ពុជា ថ្នាក់ដឹកនាំក្រុមហ៊ុន និងភ្ញៀវកិត្តិយសជាច្រើនរូប​ផ្សេង​ទៀត។

រោងចក្រផ្គុំ និងដំឡើងរថយន្តរបស់ក្រុមហ៊ុនតូយ៉ូតា បានចាប់ផ្តើមដំណើរការជាផ្លូវការ​នៅ​កម្ពុជា កាល​ពីខែឧសភា ឆ្នាំ២០២៤ ក្រោមអធិបតីភាពរបស់សម្តេចមហាបវរធិបតី ហ៊ុន ម៉ាណែត នាយក​រដ្ឋ​មន្ត្រី។ ក្រោយបើកសម្ពោធ ដោយមានគាំពារយ៉ាងខ្លាំងក្លាពីរាជរដ្ឋាភិបាល​កម្ពុជា រោងចក្រ​តូ​យ៉ូ​តា បានក្លាយទៅជារោងចក្រដ៏សកម្មក្នុងច្រវាក់ផលិត​កម្មរថយន្តនៅ​កម្ពុជា​ជាមួយ​ការ​ផ្គុំ និង​ដំឡើង​​រថយន្តប្រភេទ SUV ម៉ាក Toyota Fortuner និងប្រភេទមួយ​បាំង​កន្លះ Pick-up truck ម៉ាក Toyota Hilux។​ ដោយមានការគាំទ្រពីអតិថិជននៅកម្ពុជានោះ ក្រុម​ហ៊ុន​តូយ៉ូតា បាន​បន្តបោះជំហានយ៉ាងស្វាហាប់ជាមួយការផ្គុំ និងដំឡើងរថយន្តស៊េរីថ្មី​ប្រភេទ​​មួយបាំងកន្លះ Pick-up truck ម៉ាក Toyota Hilux Travo ដែលជារថយន្ត​ស៊េរីថ្មី​ផ្គុំ និង​ដំឡើង​​ផ្ទាល់ដៃ​របស់​វិស្វករជំនាញរបស់កម្ពុជា។

លោក ហែម វណ្ឌឌី រដ្ឋមន្ត្រីក្រសួងឧស្សាហកម្ម វិទ្យាសាស្ត្រ បច្ចេកវិទ្យា និងនវានុវត្តន៍ បាន​ចាត់រថយន្តស៊េរីថ្មីរបស់តូយ៉ូតា ដែលផ្គុំ និងដំឡើងនៅកម្ពុជានេះ ជាវឌ្ឍនភាពដ៏សំខាន់ថ្មីមួយ​ទៀត ដែលបង្ហាញយ៉ាងច្បាស់ពីទំនុកចិត្តរបស់ក្រុមហ៊ុន​តូយ៉ូតា លើស្ថិរភាពនយោបាយ បរិយា​កាសវិនិយោគ និងទិសដៅអភិវឌ្ឍឧស្សាហកម្មរបស់កម្ពុជា។ សមិទ្ធផលនេះ ក៏ឆ្លើយតប​នឹង​យុទ្ធ​សាស្ត្របញ្ចកោណដំណាក់កាលទី១ ពិសេសគោលនយោបាយជាតិស្តីពីការអភិវឌ្ឍយាន​យន្ត២០២៤-២០៣០ ដែលមានគោលដៅអភិវឌ្ឍកម្ពុជាឱ្យក្លាយជាមជ្ឈមណ្ឌលផលិតកម្ម និង​ជា​​ផ្នែកមួយនៃខ្សែច្រវាក់តម្លៃឧស្សាហកម្មយានយន្តក្នុងតំបន់។

លោកឧបនាយករដ្ឋមន្ត្រី ស៊ុន ចាន់ថុល អនុប្រធានទី១ ក្រុមប្រឹក្សាអភិវឌ្ឍន៍កម្ពុជា បាន ចូល​រួម​អបអរសាទរ និងវាយតម្លៃខ្ពស់ចំពោះក្រុមហ៊ុនតូយ៉ូតា ដែលបានសម្រេចចិត្តវិនិយោគផ្គុំ​ដំ​ឡើង​រថយន្តម៉ូដែលថ្មីនៅកម្ពុជា ដែលបានបង្ហាញពីជំនឿចិត្តយ៉ាងមុតមាំរបស់ក្រុមហ៊ុន មក​លើ​សក្តានុពលសេដ្ឋកិច្ចរបស់កម្ពុជា។

លោកឧបនាយករដ្ឋមន្ត្រីបន្ថែមថា ការផ្គុំដំឡើងរថយន្តម៉ូដែលថ្មី ដោយវិស្វករខ្មែរនាថ្ងៃនេះ ជា​សក្ខីភាពបង្ហាញថាធនធានមនុស្សរបស់កម្ពុជា មានសមត្ថភាពអាចចាប់យកជំនាញបច្ចកវិទ្យា
កម្រិតខ្ពស់បានយ៉ាងល្អ ប្រសិនបើទទួលបានការបណ្តុះបណ្តាលត្រឹមត្រូវ។ នេះជាគំរូវិនិយោគ​យុទ្ធសាស្ត្រ ដែលរាជរដ្ឋាភិបាលកម្ពុជា តែងតែផ្តល់អាទិភាព និងស្វាគមន៍យ៉ាងកក់ក្តៅបំផុត ដែលមិនត្រឹមតែជាការមកបណ្តាក់ទុនបង្កើតរោងចក្រប៉ុណ្ណោះ​ទេ ប៉ុន្តែបានចូលរួមយ៉ាង​សកម្ម​ក្នុង​ការកសាងប្រព័ន្ធអេកូឡូស៊ីឧស្សាហកម្ម បណ្តុះបណ្តាលមូលធនមនុស្ស និងកសាង​អនា​គត​​រួមជាមួយកម្ពុជាក្នុងរយៈពេលវែង។

លោកឧបនាយករដ្ឋមន្ត្រី ស៊ុន ចាន់ថុល តាមរយៈការបង្ហាញនូវផលិតថ្មីរបស់ក្រុមហ៊ុនតូយ៉ូតា ដែលជាក្រុមហ៊ុនរថយន្តដ៏ល្បីរបស់ជប៉ុន ក៏នឹងក្លាយជាចលករជួយទាក់ទាញក្រុមហ៊ុន​ដទៃ​របស់ជប៉ុន ឱ្យមកវិនិយោគនៅកម្ពុជាថែមទៀត។

សូមបញ្ជាក់ថា គិតចាប់ពីថ្ងៃសម្ពោធរោងចក្រផ្គុំ និងដំឡើងរថយន្តនៅកម្ពុជាកាលពីឆ្នាំ២០២៤ រហូតមកដល់ពេលបច្ចុប្បន្ននេះ ក្រុមហ៊ុនតូយ៉ូតា ស៊ុយស៊ូ មេនូហ្វេកឆឺរីង ដែលជាតួអង្គសំខាន់​មួយក្នុងវិស័យយានយន្ត បានដំឡើងរថយន្តទាំងពីរប្រភេទ គឺ Fortuner និង Hilux សរុបចំនួន ៦ ២៥០គ្រឿង។ កាន់តែពិសេសទៀតនោះ ក្រុមហ៊ុនតូយ៉ូតា បានបង្កើនការប្រើប្រាស់គ្រឿងផ្គុំ និងបំណែករថយន្តកាន់តែច្រើនពីក្រុមហ៊ុនក្នុងស្រុក។ របាយការណ៍របស់ក្រុមហ៊ុនតូយ៉ូតា គឺមានការកើនឡើងប្រមាណ ២០ភាគរយ ដែលនេះជាសញ្ញាវិជ្ជមានមួយ ដែលបង្ហាញថា ការវិនិយោគរបស់ក្រុមហ៊ុនតូយ៉ូតា កំពុងផ្តល់អត្ថប្រយោជន៍កាន់តែទូលំទូលាយដល់សេដ្ឋកិច្ចកម្ពុជា តាមរយៈការពង្រឹងឧស្សាហកម្មគាំទ្រ និងការបង្កើនតម្លៃបន្ថែមក្នុងស្រុក។

ចក្ខុវិស័យរបស់ក្រុមហ៊ុនតូយ៉ាតា សម្រាប់រថយន្តជាតិរបស់កម្ពុជា តាមរយៈ​រថយន្ត Hilux ស៊េរីថ្មីនេះ ក្រុមហ៊ុនតូយ៉ូតា មានគោលបំណងផ្តល់លើសពីរថយន្តមួយគ្រឿង។ ដោយឈរ​លើទស្សនវិជ្ជា «ស្នាដៃយើង សម្រាប់ជាតិយើង (From Our Hands, For Our Homeland )» ក្រុមហ៊ុនតូយ៉ូតា ប្តេជ្ញាផលិតរថយន្តលំដាប់ពិភពលោក ដែលត្រូវបានផលិត​ដោយមោទនភាពដោយប្រជាជនកម្ពុជា សម្រាប់ប្រជាជនកម្ពុជា។ តាមរយៈការគាំទ្រការងារ គ្រួសារ និងជីវភាពរស់នៅប្រចាំថ្ងៃរបស់ប្រជាពលរដ្ឋ ក្រុមហ៊ុនតូយ៉ូតា មានបំណងឱ្យរថយន្ត Hilux ស៊េរីថ្មីនេះ ក្លាយជារថយន្តដែលប្រជាជនកម្ពុជាទុកចិត្ត ជានិមិត្តរូបនៃការរីកចម្រើន និងវឌ្ឍនភាពរបស់ប្រទេសកម្ពុជា៕