(ភ្នំពេញ)៖ ក្រសួងសេដ្ឋកិច្ច និងហិរញ្ញវត្ថុ បានសហការជាមួយធនាគារអភិវឌ្ឍន៍អាស៊ី (ADB) បានរៀបចំសិក្ខាសាលាផ្ទៀងផ្ទាត់ស្តីពី «ការវិភាគតម្រូវការស្ថាប័ន និងការធ្វើអត្តសញ្ញា​ណកម្ម​គម្រោងសក្តានុពល ដើម្បីរៀបចំផែនការមេ សម្រាប់អនុវត្តគម្រោងភាពជាដៃគូរវាងរដ្ឋ និង​ឯកជន (PPP Masterplan)»។

សិក្ខាសាលាធ្វើឡើងនាព្រឹកថ្ងៃអង្គារ ទី២ ខែមិថុនា ឆ្នាំ២០២៦នេះ បានប្រព្រឹត្តទៅ ក្រោមអធិបតីភាពលោក មាស សុខសេនសាន រដ្ឋលេខា​ធិការក្រសួងសេដ្ឋកិច្ច និងហិរញ្ញវត្ថុ ជាតំណាងដ៏ខ្ពង់ខ្ពស់របស់អគ្គបណ្ឌិតសភាចារ្យ អូន ព័ន្ធ​មុនីរ័ត្ន ឧបនាយករដ្ឋមន្ដ្រី រដ្ឋមន្ដ្រីក្រសួងសេដ្ឋកិច្ច និងហិរញ្ញវត្ថុ និងលោកស្រី Yasmin Siddiqi នាយិកាធនាគារអភិវឌ្ឍន៍អាស៊ីប្រចាំកម្ពុជា ដោយមានការចូលរួមពីតំណាងក្រសួង ស្ថាប័នពាក់ព័ន្ធចំនួន១០ និងជំនាញការ ADB សរុបប្រមាណ ៨០រូប។

សិក្ខាសាលានេះ មានគោលបំណង៖ ១) ផ្ទៀងផ្ទាត់ និងពិភាក្សាលើចន្លោះប្រហោង និងបញ្ហា​ប្រឈម ដែលត្រូវបានរកឃើញ តាមរយៈការវិភាគតម្រូវការស្ថាប័ន, ២) កំណត់តម្រូវការគាំទ្រ​អាទិភាពសម្រាប់ជំរុញការរៀបចំ និងការអនុវត្តគម្រោង PPP និង៣) ពង្រឹងកិច្ចសហការជា​មួយ​ក្រសួង ស្ថាប័នពាក់ព័ន្ធ ក្នុងការជំរុញការអភិវឌ្ឍគម្រោង PPP នៅកម្ពុជា។

ក្នុងអំឡុងសិក្ខាសាលានេះ តំណាងក្រសួងពាក់ព័ន្ធ បានចូលរួមធ្វើបទបង្ហាញ​អំពីគម្រោង​ហេដ្ឋា​រចនាសម្ព័ន្ធសក្តានុពល ដើម្បីអភិវឌ្ឍក្រោមក្របខណ្ឌ PPP ព្រមទាំងបញ្ហាប្រឈម និងកិច្ចការ​អាទិភាពដែលត្រូវការកិច្ចគាំទ្របន្ថែម។

កិច្ចពិភាក្សានេះ ក៏បានផ្តោតសំខាន់លើឧបសគ្គដែលរាំងស្ទះដល់ការរៀបចំអនុវត្តគម្រោង PPP ក៏ដូចជាការពង្រឹងយន្តការសម្របសម្រួលរវាងក្រសួងសេដ្ឋកិច្ច និងហិរញ្ញវត្ថុ និងក្រសួង ស្ថាប័ន ដើម្បីគាំទ្រដល់ការអភិវឌ្ឍគម្រោង PPP ប្រកបដោយប្រសិទ្ធភាព និងចីរភាព ស្រប​តាម​យុទ្ធសាស្ត្របញ្ចកោណ ដើម្បីសម្រេចបានចក្ខុវិស័យកម្ពុជា ឆ្នាំ២០៥០។

ធាតុចូល និងអនុសាសន៍ដែលទទួលបានពីសិក្ខាសាលានេះ នឹងចូលរួមចំណែកយ៉ាងសំខាន់​ក្នុងការរៀបចំ PPP Masterplan ដែលនឹងដើរតួជាផែនទីបង្ហាញផ្លូវផ្នែកយុទ្ធសាស្ត្រ និងប្រតិ​បត្តិការ សម្រាប់ពង្រឹងការអភិវឌ្ឍហេដ្ឋារចនាសម្ព័ន្ធ និង​ ផ្គត់ផ្គង់សេវាសាធារណៈនៅកម្ពុជា តាម​រយៈ​យន្តការ PPP ក្នុងរយៈពេលមធ្យម និងវែងខាងមុខ៕