(កំពង់ស្ពឺ)៖ ក្មេងទំនើងមួយក្រុមដែលនិយមចូលចិត្ត​បង្ហោះម៉ូតូតាមដងផ្លូវសាធារណៈ ត្រូវ​បានកម្លាំងកងរាជ​អាវុធហត្ថ​ខេត្ត​កំពង់ស្ពឺ​ ​បង្ក្រាប និងឃាត់ខ្លួន​បាន​​៧​នាក់​ យកមកអប់រំណែនាំធ្វើកិច្ចសន្យាបញ្ឈប់ និងដកហូតម៉ូតូ ទុកជាបណ្តោះអាសន្ន​​៣ខែ នៅទីបញ្ជាការកងរាជអាវុធហត្ថខេត្តកំពង់ស្ពឺ។

ប្រតិបត្តិការបង្ក្រាបនេះធ្វើឡើងដោយ​អនុវត្តតាមគោលការដឹកនាំរបស់នាយ​ឧត្តម​សេនីយ៍​ សៅ​ សុខា​​​ អគ្គ​មេបញ្ជាការ​រង​កងយោធពល​ខេមរភូមិន្ទ និង​មេបញ្ជាការ​កង​រាជ​អាវុធហត្ថ​លើ​ផ្ទៃ​ប្រទេស​ ព្រមទាំង​មាន​ការណែនាំ​ដោយ​ផ្ទាល់ពីសំណាក់​លោកបណ្ឌិត ជាម ច័ន្ទសោភ័ណ អភិបាលខេត្ត​កំពង់ស្ពឺ​​​ ក្រោម​ការដឹកនាំ​បញ្ជា​ដោយផ្ទាល់យ៉ាងម៉ឺងម៉ាត់របស់លោកឧត្តមសេនីយ៍ត្រី ម៉េង ស្រ៊ុន មេបញ្ជាការកងរាជអាវុធហត្ថខេត្តកំពង់ស្ពឺ។

ប្រតិបត្តិការបង្ក្រាបនេះបានធ្វើឡើងកាលពីវេលាម៉ោង ២៣៖៣០នាទី ថ្ងៃទី២៤ ខែឧសភា ឆ្នាំ២០២៦ ភូមិធ្លក ឃុំត្រពាំងគង ស្រុកសំរោងទង ខេត្តកំពង់ស្ពឺ កម្លាំងអង្គភាពនគរបាលយុត្តិធម៌ បានធ្វើការបង្ក្រាប​និងឃាត់ខ្លួន​​ ក្រុម​ក្មេង​ទំនើង​បាន​ចំនួន៧នាក់។

​ក្រុម​ក្មេង​ទំនើង​មួយ​ក្រុម​នេះបានធ្វើសកម្មភាពបង្ហោះម៉ូតូនៅចំណុចភូមិធ្លក ឃុំត្រពាំងគង ស្រុកសំរោងទង ខេត្តកំពង់ស្ពឺ ដែល​បង្កឱ្យមាបភាពអ​នា​ធិប​តេយ្យ​ ប៉ះពាល់ដល់សុខ សុវត្តិភាព និងបង្កការភ័យខ្លាចដល់ពលរដ្ឋក្នុងមូលដ្ឋាន​​​​​​​​និងធ្វើឲ្យបាត់បង់នូវសីលធម៌ គុណធម៌ វិន័យ និងច្បាប់ទម្លាប់ ថែមទៀតផង។ ​

ក្មេង​ទំនើង​ទាំង ០៧នាក់នេះរួមមាន៖ (១)ឈ្មោះ ដូង ថុនា ភេទប្រុស អាយុ១៦ឆ្នាំ (២) ឈ្មោះ ផាន មេសា ភេទប្រុស អាយុ១៧ឆ្នាំ (៣) ឈ្មោះ ត្រា មិនា ភេទប្រុស អាយុ១៦ឆ្នាំ (៤) ឈ្មោះ ពុំ សុខហេង ភេទប្រុស អាយុ១៩ឆ្នាំ (៥) ឈ្មោះ ឈិន កាតិប ភេទប្រុស អាយុ១៩ឆ្នាំ (៦) ឈ្មោះ ដា ឧត្តម ភេទប្រុស អាយុ ១៨ឆ្នាំ និង (៧) ឈ្មោះ ហៀង និត ភេទប្រុស អាយុ ១៦ឆ្នាំ ។ វត្ថុតាងចាប់យករួមមាន ម៉ូតូ ចំនួន ០៤គ្រឿង (ម៉ាក Honda Dream C125 ពណ៌ខ្មៅ ឆ្នាំ២០២៦ ផ្លាកលេខ ភ្នំពេញ 1MI-3082, ម៉ាក Honda Dream C125 ពណ៌ខ្មៅ ឆ្នាំ២០២៥ ផ្លាកលេខ ភ្នំពេញ 1LU-7642, ម៉ាក Honda Dream C125 ពណ៌ខ្មៅ ឆ្នាំ២០២២ ផ្លាកលេខ កំពង់ស្ពឺ 1Y-7780, ម៉ាក Honda Dream C125 ពណ៌ខ្មៅ ឆ្នាំ២០១៩ ផ្លាកលេខ កំពង់ស្ពឺ 1M-5895), ទូរស័ព្ទ ចំនួន០៦គ្រឿង។

បច្ចុប្បន្នក្មេងទំនើងដែលបង្ហោះម៉ូតូទាំងនេះ ត្រូវបានកម្លាំងកងរាជអាវុធហត្ថខេត្តកំពង់ស្ពឺ យកមកអប់រំណែនាំ​ និងធ្វើកិច្ចសន្យាចំពោះមុខ ម្តាយ​ ឪពុក​​​និង​អាណាព្យាបាល​ ដើម្បីបញ្ឈប់រាល់ឆសកម្មភាពទំនើងទាំងនេះ ដែលនាំឱ្យប៉ះពាល់​ ជាហេតុដែលបំផ្លាញទ្រព្យសម្បត្តិក៏ដូចជាកិត្តិយសគ្រួសារ ព្រមទាំងបង្ករការភ័យខ្លាចដល់អ្នកជុំវិញ បង្កភាពអនាធិបតេយ្យក្នុងសង្គម ចំណែកម៉ូតូត្រូវដកហូតយកទៅរក្សាទុករយៈពេល ០៣ខែ នៅទីបញ្ជាការកងរាជអាវុធហត្ថខេត្តកំពង់ស្ពឺ៕

ទស្សនាវិដេអូ៖ https://t.me/freshnewsasia/285912