(កំពង់ធំ)៖ លោក ជុំ សុភមករា អគ្គនាយករង និងជាអ្នកនាំពាក្យអាជ្ញាធរជាតិអប្សរា បានទទួលមរណភាពក្នុងហេតុការណ៍គ្រោះថ្នាក់ចរាចរណ៍ដ៏គួរឱ្យរន្ធត់នៅតាមបណ្តាយផ្លូវជាតិលេខ៦អា ស្រុកកំពង់ស្វាយ ខេត្តកំពង់ធំ។

យោងតាមរបាយការណ៍របស់សមត្ថកិច្ច បានឱ្យដឹងថា នៅម៉ោង ១១៖៤០នាទីថ្ងៃទី១ ខែមិថុនា ឆ្នាំ២០២៦ នៅលើផ្លូវជាតិលេខ៦​ ចន្លោះ​គីឡូម៉ែត្រ​លេខ183-184 ចំណុចភូមិព្រៃប្រស់​ ឃុំត្បែង ស្រុកកំពង់ស្វាយ ខេត្តកំពង់ធំ។

របាយការណ៍បានបញ្ជាក់ថា រថយន្តបង្ក​ម៉ាកហ៊ី​យ៉ាន់ដាយ​ V1 ​ពណ៌ប្រផេះ​ ពាក់​ផ្លាក​លេខ​កំពង់​ចាម 3A-7674​ សណ្ដោង​រឺ​មីរឺម៉ក​ព្រះសីហនុ ​4A-3890​ អ្នកបើកបរមិនស្គាល់ អត្តសញ្ញាណ ព្រោះបានរត់គេចខ្លួនពីកន្លែងកើតហេតុបាត់។

ជនរងគ្រោះលោក ជុំ សុភមករា អាយុ៤៤ឆ្នាំ បើករថយន្តម៉ាក​ Ford Ranger ពណ៌ប្រផេះ ពាក់ផ្លាកលេខ​រដ្ឋ 18-2345 រស់នៅភូមិទ្វីខាងជើង សង្កាត់​អណ្ដូងខ្មែរ​ ក្រុង​កំពត ខេត្តកំពត។ គាត់បានស្លាប់​នៅ​នឹង​កន្លែង​កើត​ហេតុ​។

បើតាមរបាយការណ៍របស់សមត្ថកិច្ច, មុនពេលកើតហេតុរថយន្តបង្កបើកក្នុងទិសដៅពីសៀមរាប​-ភ្នំពេញ ពេលមកដល់ចំណុចកើតហេតុ ស្រាប់តែរេចង្កូតទៅឆ្វេងដៃបណ្ដាលឱ្យទៅបុករថយន្ត របស់ជនរងគ្រោះកំពុងបើកបញ្ច្រាសគ្នា។

សពជនរងគ្រោះ​បាន​ប្រគល់ជូនក្រុមគ្រួសារយកទៅធ្វើបុណ្យតាមប្រពៃណី។ ចំពោះវត្តុតាងត្រូវយកមករក្សាទុកនៅអធិការដ្ឋាននគរបាលស្រុកកំពង់ស្វាយ។

គ្រួសារជនរងគ្រោះ និងមជ្ឈដ្ឋានជាច្រើន សូមសំណូមពរដល់លោកឧត្តមសេនីយ៍ទោ ហេង សុផល ស្នងការនគរបាលខេត្តកំពង់ធំ ធ្វើការស្រាវជ្រាវតាមចាប់អ្នកបើករថយន្តបង្ក មកទទួលខុសត្រូវតាមច្បាប់ជាធរមាន៕