(សៀមរាប)៖ នាព្រឹកថ្ងៃទី២៦ ខែឧសភា ឆ្នាំ២០២៦ ខ្ញុំបាទ បានដឹកនាំកិច្ចប្រជុំពិនិត្យ និងពិភាក្សាលេីការទប់ស្តាក់ការសាងសង់សំណង់ និងការខុសច្បាប់ផ្សេងៗនៅក្នុងភូមិទាំង ១១៤ នៃតំបន់រមណីយដ្ឋានបេតិកភណ្ឌពិភពលោកអង្គរ នៅសាលប្រជុំសាលាខេត្តសៀមរាប។

កិច្ចប្រជុំនេះ ស្ថិតក្នុងវត្តមាន លោក ប្រាក់ សោភ័ណ អភិបាលខេត្តសៀមរាប ដោយមានការចូលរួមពីតំណាងអាជ្ញាធរជាតិអប្សរា​ លោកអភិបាលរង​ នៃគណៈអភិបាលខេត្ត​ នាយក​ នាយករងរដ្ឋបាលសាលាខេត្ត​ កងកម្លាំងប្រដាប់អាវុធទាំង៣ មន្ទីរ-អង្គភាពពាក់ព័ន្ធ​ តំណាងរដ្ឋបាលក្រុង​ ស្រុក​ទាំង៦​ (ក្រុងសៀមរាប​ ក្រុងរុនតាឯកតេជោសែន​ ស្រុកពួក​ ប្រាសាទបាគង​ បន្ទាយស្រី​ និងស្រុកអង្គរធំ)​ អធិការ​ មេឃុំ​ ចៅសង្កាត់​ ភូមិ​ និងទីចាត់ការពាក់ព័ន្ធចំណុះសាលាខេត្ត​។

បន្ទាប់ពីបានពិនិត្យ និងពិភាក្សារួចមក លោក អភិបាលខេត្តបានធ្វើការណែនាំដូចខាងក្រោម៖
១-ប្រជុំផ្សព្វផ្សាយ និងធ្វើបទបង្ហាញពាក់ព័ន្ធនឹងសេចក្តីព្រាងស្តីពីការកំណត់លក្ខខណ្ឌនៃការប្រើប្រាស់ដី និងការគ្រប់គ្រងនគរូបនីយកម្ម និងសំណង់ ក្នុងតំបន់១ និងតំបន់២ នៃរមណីយដ្ឋានបេតិកភណ្ឌពិភពលោកអង្គរ ដល់អាជ្ញាធរក្រុង ស្រុក និងប្រជាពលរដ្ឋក្នុងមូលដ្ឋាន។
២-អាជ្ញាធរមូលដ្ឋាន ត្រូវទប់ស្កាត់ និងហាមឃាត់ដាច់ខាតចំពោះការសាងសង់សំណង់ថ្មីលើទីតាំងថ្មី ការឈូសឆាយដីព្រៃនៅក្នុងតំបន់ក្រហម និងទប់ស្កាត់ការវិលត្រលប់របស់ប្រជាពលរដ្ឋដែលបានស្ម័គ្រចិត្តចាកចេញពីតំបន់អង្គរទៅតំបន់អភិវឌ្ឍន៍រុនតាឯក ដែលស្ថិតក្នុងមូលដ្ឋានរបស់ខ្លួន៕⁩