(ភ្នំពេញ)៖ បញ្ហាព្រំដែនរវាងកម្ពុជា និងថៃ មិនត្រូវបានកប់ទុកចោលនោះឡើយ ហើយនៅតែស្ថិត​ក្នុង​កិច្ចការចម្បងរបស់សម្តេចមហាបវរធិបតី ហ៊ុន ម៉ាណែត នាយករដ្ឋមន្ត្រីកម្ពុជា។ សម្តេចប្រមុខ​រាជរដ្ឋាភិបាល នៅតែបន្តរំលេចនូវបញ្ហាព្រំដែនរវាងកម្ពុជា និងថៃ ក្នុងពេលជួបជា​មួយ​ភ្ញៀវនៃ​ប្រទេស​ជាមិត្ត។

នៅព្រឹកថ្ងៃអង្គារ ទី២៦ ខែឧសភា ឆ្នាំ២០២៦នេះ ក្នុងជំនួបជាមួយលោក Pedro ZWAHLEN ឯកអគ្គរដ្ឋទូតប្រទេសស្វីសប្រចាំកម្ពុជា ដែលចប់​អាណត្តិ​ការងារនោះ សម្តេចមហាបវរធិបតី បាន​លើកពីការវិវត្តថ្មីៗ នៃស្ថាន​ភាព​ព្រំដែនកម្ពុជា-ថៃ។ សម្តេចមហាបវរធិបតី ក៏បានគូស​បញ្ជាក់​អំពី​ការ​ប្តេជ្ញាចិត្ត និងជំហររបស់កម្ពុជាក្នុង​ការដោះ​ស្រាយ​បញ្ហាព្រំដែននេះ ដោយសន្តិវិធី ផ្អែកលើ​ច្បាប់​អន្តរជាតិ និងអនុលោមតាមអនុសញ្ញា, សន្ធិ​សញ្ញា និងកិច្ចព្រមព្រៀងដែលមាន​ស្រាប់​រវាង​កម្ពុជា និងថៃ។

ឆ្លើយតបទៅនឹងបញ្ហាព្រំដែលកម្ពុជា និងថៃ ដែលសម្តេចមហាបវរធិបតី បានលើកឡើងនេះ លោកឯកអគ្គរដ្ឋទូតប្រទេសស្វី បានគូសបញ្ជាក់ថា​ រដ្ឋាភិបាលស្វីសគាំទ្រការបន្តអនុវត្តបទ​ឈប់​បាញ់របស់ភាគីទាំងពីរ និង​ការដោះស្រាយបញ្ហាព្រំដែន​ដោយសន្តិវិធី អនុលោមតាម​ច្បាប់​អន្តរ​ជាតិ​ និងសណ្តាប់ធ្នាប់អន្តរជាតិផ្អែកលើច្បាប់។

សូមបញ្ជាក់ថា បើទោះបីមានជំនួបត្រីភាគីរវាងមេដឹកនាំកម្ពុជា ថៃ និងហ្វីលីពីន នៅក្នុងកិច្ចប្រជុំ​កំពូលអាស៊ាននៅកោះសេប៊ូ ប្រទេសហ្វីលីពីន កាលពីដើមខែឧសភានេះយ៉ាងណាក្តី តែដំណោះ​ស្រាយលើបញ្ហាព្រំដែនរវាងកម្ពុជា និងថៃ មិនទាន់មានការវិវត្តជាវិជ្ជមាននៅឡើយទេ។ ផ្ទុយទៅ​វិញក្នុងប៉ុន្មានថ្ងៃចុងក្រោយនេះ នៅតាមបន្ទាប់ព្រំដែនរវាងប្រទេសទាំងពីរមានសេចក្តីរាយការណ៍​បន្តបន្ទាប់នៃការផ្ទុះសំឡេងអាវុធ។ ភាគីថៃ បានព្យាយាមចោទថាសំឡេងផ្ទុះបង្កពីខាងកម្ពុជា តែ​ត្រូវក្រសួងការពារជាតិកម្ពុជា ចេញមកច្រានចោលជាបន្តបន្ទាប់៕