(សៀមរាប)៖ លោក ង៉ូវ សេងកាក់ អភិបាលរងខេត្តសៀមរាប និងលោក សែត កៅ ប្រធានសមាគមក្លិបទេសចរណ៍សៀមរាប (STC) រួមនឹងភាគីពាក់ព័ន្ធក្នុងវិស័យទេសចរណ៍ នៅរសៀលថ្ងៃទី១៦ ខែឧសភា ឆ្នាំ២០២៦ បានជួបពិភាក្សាគ្នា ដើម្បីរកវីធិសាស្រ្តនានា ក្នុងការជំរុញ និងលើកស្ទួយវិស័យទេសចរណ៍ខេត្តសៀមរាបឲ្យកាន់តែរីកចម្រើន និងមាននិរន្តរភាព។

ថ្លែងក្នុងឱកាសនោះ លោក ង៉ូវ សេងកាក់ បានលើកឡើងថា បន្ទាប់ពីវិបត្តិកូវីដ១៩មក រាជរដ្ឋាភិបាលមានការបន្ថូបន្ថយពន្ធ លើកលែងអាជ្ញាបណ្ណ និងបញ្ហាផ្សេងៗជាច្រើនទៀត ដល់ប្រតិបត្តិករទេសចរណ៍ក្នុងខេត្តសៀមរាប។ យ៉ាងណាដំណាក់កាលបន្ទាប់នេះ ស្របពេលដែលវិស័យទេសចរណ៍ក្នុងខេត្តនេះមិនទាន់ល្អប្រសើរ ប្រតិបត្តិករទេសចរណ៍នៅប្រឈមបញ្ហាផ្សេងៗ ដែលត្រូវការឱ្យរដ្ឋាភិបាលបន្តជួយក្នុងគ្រាដ៏លំបាកនេះ។

លោកបានបន្តថា សម្ពាធដែលផលប៉ះពាល់ពីការថយចុះនៃភ្ញៀវទេសចរនេះ បានធ្វើឲ្យវិស័យសណ្ឋាគារ និងភោជនីយដ្ឋាន ព្រមទាំងសេវាកម្មផ្សេងៗជាច្រើនទៀត ជួបហានិភ័យផងដែរ។ ខេត្តសៀមរាបជាខេត្តទេសចរណ៍ ប្រសិនបើខេត្តសៀមរាបជួបហានីភ័យ នោះវានឹងជះឥទ្ធិពល ទៅគោលដៅទេសចរណ៍ផ្សេងៗទៀតជាក់ជាមិនខាន។

លោកបន្តថា «ដូច្នេះហើយ វិស័យឯកជន និងរដ្ឋ គឺមិនអាចផ្តាច់ចេញពីគ្នាបានទេ។ បើអ្នករកស៊ីសម្បូរសប្បាយ សេដ្ឋកិច្ចខេត្តយើងដើរ អជ្ញាធរខេត្តក៏មានសេចក្តីសប្បាយរីករាយផងដែរ។ ក្នុងពេលអំឡុងដែលយើងមានហានីភ័យ យើងត្រូវរួមគ្នាដោះស្រាយ ក្នុងនោះមានបញ្ហាសណ្តាប់ធ្នាប់ក្នុងក្រុង, ផ្លូវថ្មើរជើង, ការថែទាំសួន និងបញ្ហាផ្សេងៗជាច្រើនទៀត ដែលសុទ្ធសឹងជាអ្វីដែលត្រូវរួមគ្នាដោះស្រាយ និងធ្វើឱ្យវិស័យទេសចរណ៍កាន់តែល្អប្រសើរ»។

លោក ង៉ូវ សេងកាក់ បញ្ជាក់ថា ទោះបីស្ថិតនៅក្នុងស្ថានភាពនេះ គុណភាពសេវា ត្រូវតតែពង្រឹង និងតម្លៃនៃសេវាកម្មទេសចរណ៍នៅក្នុងខេត្ត ក៏ត្រូវសិក្សាគួរដាក់តម្លៃប៉ុណ្ណាទៅតាមខែមានភ្ញៀវទេសចរ និងមិនសូវមានភ្ញៀវទេសចរ ដើម្បីទាក់ទាញទេសចរនៅតាមរដូវកាលនោះ។ ក្នុងនោះអនាម័យ ភាពរួសរាយរាក់ទាក់ និងការបង្កើតផលិតថ្មីៗនៅតាមគោលដៅផ្សេងៗ ក៏ត្រូវគិតគូរឱ្យបានច្រើនផងដែរ ព្រោះទេសចរចង់ចង់កម្សាន្ត និងទស្សនាកន្លែងថ្មីៗ។

ថ្លែងក្នុងពិធីដែលរៀបចំនៅសណ្ឋាគារ NITA BY VO នៅក្នុងក្រុងសៀមរាប លោក សែត កៅ ប្រធានក្លឹប STC បានគូសបញ្ជាក់ថា វិស័យឯកជន និងរដ្ឋ ត្រូវរួមគ្នាជាធ្លុងមួយ ដើម្បីអភិវឌ្ឍន៍វិស័យទេសចរណ៍ ក្នុងខេត្តសៀមរាបឱ្យមាននិរន្តរភាព។ ទោះបីស្ថានការណ៍មិនទាន់ល្អប្រសើរក៏ដោយ ប៉ុន្តែប្រធានក្លឹប STC បានជំរុញឱ្យប្រតិបត្តិករទេសចរណ៍ទាំងអស់ មិនត្រូវបាក់ស្មារតីនោះទេ ត្រូវពុះពារគ្រប់កាលៈទេសៈ ដើម្បីស្តារសេដ្ឋកិច្ចក្នុងខេត្តទេសចរណ៍សៀមរាប ឱ្យរីកចម្រើនទាំងអស់គ្នា៕