(សៀមរាប)៖ នៅព្រឹកថ្ងៃទី៤ ខែឧសភា ឆ្នាំ២០២៦នេះ រដ្ឋបាលខេត្តឧត្ដរមានជ័យ និង​រដ្ឋ​បាលខេត្តសៀមរាប បានសហការគ្នារៀបចំពិធីមង្គលបួងសួងសុំយាង «ព្រះវិស្ណុគង់​លើ​ស្ដេចគ្រុឌ» ដង្ហែចេញពីទឹកដីខេត្តឧត្ដរមានជ័យ មកកាន់ទីតាំងដើមវិញ គឺនៅរង្វង់មូល​មុខ​វិទ្យាល័យសម្តេចឪ ឬរង្វង់មូលអតីតព្រលានយន្តហោះអន្តរជាតិសៀមរាប។

«ព្រះវិស្ណុគង់លើស្ដេចគ្រុឌ» មិនត្រឹមតែជារូបសំណាកសក្ការៈនោះទេ ប៉ុន្តែគឺជាដួង​ព្រលឹង​​ដែលនាំ​មកនូវសេចក្តីសុខសន្តិភាព និងភាពត្រជាក់ត្រជុំដល់ទឹកដី និងប្រជារាស្ត្រខ្មែរ។

រូបសំណាកព្រះវិស្ណុផ្លែងសជិះលើគ្រុឌ ត្រូវបានដកចេញ និងជំនួសរូបសំណាក​ព្រះបាទ​ជ័យ​វរ្ម័នទី៧ នៅអំឡុងឆ្នាំ២០១០ ឬ២០១១ ក្នុងអាណត្តិលោក ស៊ូ ភិរិន្ទ ជាអភិបាល​ខេត្តសៀមរាប ដោយអាជ្ញាធរមិនបានបញ្ជាក់ពីមូលហេតុនោះទេ។ រូបសំណាកព្រះវិណ្ណុ​ផ្លែង​ស​ជិះលើគ្រុឌ ត្រូវបានគេយកទៅដាក់នៅក្បែរ​រង្វង់​មូលរដ្ឋបាល​ខេត្តឧត្តរមានជ័យ។

កំលុងពេលមានសង្គ្រាមថៃឈ្លានពានលើដីខ្មែរ មានប្រជាពលរដ្ឋជាច្រើន បានស្នើឱ្យ​យក​រូបសំណាកនេះ ដាក់នៅទីតាំងដើមវិញ។ ក្រោយមានសំណើបែបនេះ ទើបអាជ្ញាធរខេត្តឧត្តរមានជ័យ និងសៀមរាប សម្រេចយករូបសំណាកមកតម្កល់នៅទីតាំងដើមវិញ។

យោងតាមឯកសារនានា បានរៀបរាប់នូវដំណើររឿងព្រះវិស្ណុ ឬព្រះនារាយណ៍ គង់ប្រថាប់​គង់លើ ស្ដេចគ្រុឌជាយានជំនិះ គឺមានប្រវត្តិទាក់ទងនឹងការសន្យា និងការគោរពចំពោះ​ឫទ្ធា​នុភាព​របស់គ្នាទៅវិញទៅមក ក្នុងទេវកថាព្រហ្មញ្ញសាសនា។ ដំណើររឿងសំខាន់ៗ​ដែលនាំឱ្យមានការផ្សារភ្ជាប់នេះមានដូចជា៖

* ការសង្គ្រោះមាតាពីទាសភាព៖ មាតារបស់​គ្រុឌ (នាងវីនីតា) ត្រូវបានចាញ់​ល្បិចនាង​កា​ឌ្រុ (មាតានៃពួកនាគ) រហូតធ្លាក់ខ្លួនជាទាសី។ ដើម្បីដោះលែង​មាតា គ្រុឌត្រូវទៅយក «ទឹកអម្រឹត» ពីឋានសួគ៌មកប្ដូរ។

* ការជួបជាមួយព្រះវិស្ណុ៖ នៅពេលគ្រុឌដណ្ដើមបានទឹកអម្រឹត ហើយហោះត្រឡប់ មក វិញ ព្រះវិស្ណុបានយាងមកស្កាត់ផ្លូវ។ ព្រះអង្គមានការកោតសរសើរចំពោះគ្រុឌ ដែលមាន ឫទ្ធិខ្លាំងក្លាអាចយកឈ្នះពួកទេវតាបាន ប៉ុន្តែបែរជាមិនព្រមផឹកទឹកអម្រឹតនោះ ដោយ​ខ្លួនឯង ព្រោះតែចង់រក្សាភាពស្មោះត្រង់ដើម្បីដោះលែងមាតា។

* ការផ្ដល់ពរ និងការសន្យា៖ ដោយសារតែគុណធម៌ និងភាពស្មោះត្រង់នេះ ព្រះវិស្ណុបាន ផ្ដល់ពរឱ្យគ្រុឌមានជីវិតអមតៈ (មិនចេះស្លាប់) ទោះបីជាមិនបានផឹកទឹកអម្រឹតក៏ដោយ។ ជាការតបស្នង គ្រុឌក៏បានសន្យាធ្វើជាយានជំនិះថ្វាយព្រះវិស្ណុជារៀងរហូតមក។

* និមិត្តរូបនៃអំណាច៖ ការដែលព្រះវិស្ណុគង់លើ​គ្រុឌ តំណាងឱ្យអំណាច​លើលំហ​អា​កា​ស និងការគ្រប់គ្រងពិភពលោក។ គ្រុឌតំណាងឱ្យល្បឿន និងកម្លាំង ខណៈព្រះវិស្ណុ​តំណាង​ឱ្យការថែរក្សាសន្តិសុខលោក។ ក្រៅពីជាយានជំនិះ គ្រុឌក៏មានវត្តមាននៅលើ ទង់ជ័យ (Banner) របស់ព្រះវិស្ណុផងដែរ ដែលជានិមិត្តរូបនៃជ័យជម្នះ និងយុត្តិធម៌៕