(ភ្នំពេញ)៖ ក្នុងរយៈពេលចុងក្រោយនេះ តួនាទីរបស់សង្គមស៊ីវិលនៃប្រទេសចិន បានក្លាយជាកម្លាំងចលករយ៉ាងសំខាន់ ក្នុងការរឹតចំណងមិត្តភាពរវាងប្រជាជន និងប្រជាជន កម្ពុជា-ចិន។ តាមរយៈសកម្មភាពមនុស្សធម៌ដែលចុះផ្ទាល់ដល់មូលដ្ឋាន សង្គមស៊ីវិលចិនមិនត្រឹមតែនាំមកនូវជំនួយសម្ភារៈប៉ុណ្ណោះទេ ប៉ុន្តែថែមទាំងបានផ្ដល់នូវ "ជីវិតថ្មី" និងសេចក្ដីសង្ឃឹមដល់ ក្រុមគ្រួសារកម្ពុជាជាច្រើននៅតាមតំបន់ដាច់ស្រយាល។

លោកបណ្ឌិត ជា មុនីឫទ្ធិ ប្រធានសមាគមអ្នកស្រាវជ្រាវវឌ្ឍនភាពកម្ពុជាចិនបានមានប្រសាសន៍ថា សង្គមស៊ីវិលរបស់ប្រទេសចិន កំពុងមានតួនាទីកាន់តែសំខាន់និងកាន់តែសកម្មក្នុងការពង្រឹងទំនាក់ទំនងប្រជាជននិងប្រជាជន កម្ពុជានិងចិន តាមរយៈសកម្មភាពជាក់ស្តែង ដែលឆ្លើយតបទៅនឹងតម្រូវការរបស់សហគមន៍មូលដ្ឋាន។ សកម្មភាពទាំងនេះមិនត្រឹមតែ ផ្តល់អត្ថប្រយោជន៍ផ្ទាល់ប៉ុណ្ណោះទេ ប៉ុន្តែថែមទាំងបង្កើនការយល់ដឹង ការជឿទុកចិត្ត និងមិត្តភាពរឹងមាំដូចដែកថែបរវាង ប្រជាជននិងប្រទេសយើងទាំងពីរថែមទៀតផង។

លោកបណ្ឌិតបន្តថា ក្នុងវិស័យសុខាភិបាល ក្រុមគ្រូពេទ្យចិនបានប្រើប្រាស់រថយន្តពេទ្យចល័ត ដែលគ្រប់គ្រងដោយ សមាគមមិត្តភាព កម្ពុជា-ចិន ដើម្បីចូលទៅពិនិត្យ និងព្យាបាលជំងឺបេះដូងចំហជូនកុមារកម្ពុជា ដល់ខេត្តកំពត។ សកម្មភាពនេះ បានផ្តល់ឱកាសរស់រានមានជីវិតថ្មីដល់កុមារកម្ពុជាជាច្រើន និងបង្ហាញពីមនុស្សធម៌ដ៏ជ្រាលជ្រៅរបស់មិត្តចិន។

ក្នុងវិស័យអប់រំ និងវប្បធម៌ មិត្តចិនបានចូលរួមជួយកែលម្អសោភណភាពបណ្ណាល័យនៅតាមជនបទ បង្កើនលទ្ធភាពឲ្យសិស្សានុសិស្ស អាចចូលដំណើរការប្រភពចំណេះដឹងបានកាន់តែងាយស្រួល។ វាជាជំហានសំខាន់ ក្នុងការបើកបង្អួចពុទ្ធិ និងបណ្តុះបណ្តាលធនធានមនុស្សសម្រាប់អនាគត។ លើសពីនេះទៀត ការផ្តល់ចង្ក្រានបង្កើនថាមពល ជួយកាត់បន្ថយការប្រើប្រាស់ឥន្ធនៈ និងការបំពុលបរិស្ថាន ខណៈដែលការផ្តល់ធុងសំរាម និងការចូលរួមសកម្មភាពអនាម័យបរិស្ថាន បានរួមចំណែកលើកកម្ពស់សុខភាពសាធារណៈ និងបរិស្ថានរស់នៅឲ្យកាន់តែល្អប្រសើរ។ ជាពិសេស ការចូលរួមជាចំណែកគាំទ្របេសកកម្មរបស់ CMAC ក្នុងសកម្មភាពបោសសម្អាតមីន ក៏ជាការជួយសង្គ្រោះជីវិត និងបង្កើនសុវត្ថិភាពសម្រាប់ប្រជាជនកម្ពុជានៅតំបន់ ដែលរងផលប៉ះពាល់ពីសង្គ្រាមកន្លងមក។

ជារួម សកម្មភាពរបស់សង្គមស៊ីវិលចិនទាំងនេះ គឺជាសមិទ្ធផលជាក់ស្តែងនៃការអភិវឌ្ឍទំនាក់ទំនងប្រជាជននិងប្រជាជន កម្ពុជា-ចិន ដែលផ្អែកលើគោលការណ៍មិត្តភាព សហការណ៍ និងការចែករំលែកអត្ថប្រយោជន៍រួម។ វាបានក្លាយជាស្ពានមនុស្សធម៌មួយ ដែលភ្ជាប់បេះដូងប្រជាជនទាំងពីរប្រទេសឲ្យកាន់តែជិតស្និទ្ធ និងរឹងមាំ។

លោកបណ្ឌិតជាមុនីឫទ្ធិបានបញ្ជាក់ថា សកម្មភាពទាំងអស់នេះគឺជាសមិទ្ធផលជាក់ស្តែង នៃការអភិវឌ្ឍទំនាក់ទំនង ប្រជាជននិងប្រជាជន ដែលផ្អែកលើគោលការណ៍មិត្តភាព និងការចែករំលែក។ វាមិនមែនគ្រាន់តែជាជំនួយបច្ចេកទេសនោះទេ ប៉ុន្តែវាគឺជា "ស្ពានមនុស្សធម៌" ដែលភ្ជាប់បេះដូងប្រជាជននៃប្រទេសទាំងពីរឱ្យកាន់តែជិតស្និទ្ធ រឹងមាំ និងមានទំនុកចិត្តលើគ្នាទៅវិញទៅមក ក្នុងនាមជាបងប្អូន និងជាដៃគូអភិវឌ្ឍន៍ដ៏ស្មោះត្រង់៕

វិទ្យុមិត្តភាពកម្ពុជាចិន