(កំពង់ស្ពឺ)៖ ដោយក្តីអាណិតអាសូរជាពន់ពេក មាតាមនុស្សធម៌ សម្តេចកិត្តិព្រឹទ្ធបណ្ឌិត ប៊ុន រ៉ានី ហ៊ុនសែន ប្រធានកាកបាទក្រហមកម្ពុជា នៅថ្ងៃទី០៧ ខែមេសា ឆ្នាំ២០២៦ បានចាត់លោកស្រី ម៉ែន នារីសោភ័គ អគ្គលេខាធិការរងទី១ កាកបាទក្រហមកម្ពុជា រួមជាមួយសាខាកាកបាទក្រហមកម្ពុជា ខេត្តកំពង់ស្ពឺ ចុះសួរសុខទុក្ខ និងនាំយកអំណោយមនុស្សធម៌ ជាគ្រឿងឧបភោគបរិភោគ និងថវិកាមួយចំនួន ជូនដល់លោកយាយ ខៀវ អែង អាយុ ៨៨ឆ្នាំ ជាចាស់ជរាគ្មានទីពឹង រស់នៅភូមិអង្គសេរី សង្កាត់រកាធំ ក្រុងច្បារមន ខេត្តកំពង់ស្ពឺ និងលោកតា ប៉ែន ប៉ុន អាយុ១០២ឆ្នាំ រស់នៅក្រុងច្បារមន ខេត្តកំពង់ស្ពឺ។

ក្នុងឱកាសនោះ លោកស្រីអគ្គលេខាធិការរងទី១ កាកបាទក្រហមកម្ពុជា បាននាំយកនូវប្រសាសន៍របស់ សម្តេចកិត្តិព្រឹទ្ធបណ្ឌិត ប៊ុន រ៉ានី ហ៊ុនសែន ដែលបានផ្តាំផ្ញើសួរសុខទុក្ខ ក្តីអាណិតអាសូរ និងការគិតគូរពីជីវភាពរស់នៅរបស់លោកយាយ លោកតា ដ៏សែនកំសត់ទាំងពីរ។

លោកស្រីអគ្គលេខាធិការរងទី១ កាកបាទក្រហមកម្ពុជា បានថ្លែងថា «សម្តេចកិត្តិព្រឹទ្ធបណ្ឌិត ប៊ុន រ៉ានី ហ៊ុនសែន តែងតែតាមដានជាប់ជានិច្ចពីសុខទុក្ខរបស់បងប្អូនប្រជាពលរដ្ឋ ហើយបន្ទាប់ពីបានឃើញព័ត៌មានអំពីករណីដ៏លំបាកមួយរបស់លោកយាយ ខៀវ អែង រស់នៅតែម្នាក់ឯង, ឃើញលោកយាយមានសម្លៀកបំពាក់រហែករយ៉េរយ៉ាក និងផ្ទះដែលលោកយាយរស់នៅមានសភាពចាស់ទ្រុឌទ្រោមជាខ្លាំង ពេលភ្លៀងមកម្តងៗ មានលិចទឹកថែមទៀតនោះ ធ្វើឱ្យសម្តេចកិត្តិព្រឹទ្ធបណ្ឌិត មានអារម្មណ៍ក្តុកក្តួល និងក្តីអាណិតអាសូរ យ៉ាងក្រៃលែង ហើយបានចាត់ឱ្យក្រុមការងារចុះភ្លាមៗដើម្បីជួយសម្រាលការលំបាកក្នុងជីវភាព និងជាការលើកទឹកចិត្តដល់លោកយាយផងដែរ»។

លោកស្រី ម៉ែន នារីសោភ័គ បានថ្លែងឲ្យដឹងទៀតថា ចំពោះករណីលោកតា ប៉ែន ប៉ុន នេះវិញ ដែលមានអាយុ១០២ឆ្នាំ រស់នៅជាមួយកូនប្រសារស្រី និងចៅស្រីដែលមានជីវភាពក្រលំបាក ដោយកូនប្រុសបង្កើតលោកតាបានស្លាប់តាំងពីឆ្នាំ១៩៩៣ មកម្ល៉េះ ។ លោកតាក៏ទទួលបានអំណោយមនុស្សធម៌ពីកាកបាទក្រហមកម្ពុជាដូចគ្នា ហើយនេះជាលើកទី២របស់លោកតាផងដែរ។

លោកស្រីអគ្គលេខាធិការរងទី១ កាកបាទក្រហមកម្ពុជា បានឱ្យដឹងទៀតថា «នេះជាសកម្មភាពមួយ ដែលកាកបាទក្រហមកម្ពុជា ក្រោមការដឹកនាំរបស់ សម្តេចកិត្តិព្រឹទ្ធបណ្ឌិត ប៊ុន រ៉ានី ហ៊ុនសែន ដែលតែងតែ និងត្រូវយកចិត្តទុកដាក់ចំពោះចាស់ឥតទីពឹង ហើយសម្តេចកិត្តិព្រឹទ្ធបណ្ឌិតតែងតែណែនាំដល់កូនចៅនៅទៅតាមសាខា ក៏ដូចជាមន្ត្រីយើងទាំងអស់ឱ្យយកចិត្តទុកដាក់នៅតាមទីកន្លែងណាក៏ដោយ ឱ្យតែបានឃើញប្រទះ ឃើញគឺត្រូវតែធ្វើការដោះស្រាយ»។

លោកស្រីបានបន្ថែមទៀតថា «ការចុះសួរសុខទុក្ខដល់ចាស់ៗដែលឥតទីពឹង ដូចករណីនៅក្នុងថ្ងៃនេះ និងមានសកម្មភាពចុះទៅតាមមណ្ឌលកុមារកំព្រា ក៏ដូចជាសមាគមតន្ត្រីសំនៀងជនពិការ កន្លែងវិទ្យុ ទូរទស្សន៍អ្នកមានពិការភាពភ្នែក និងកុមារកំព្រាមួយចំនួនដែលយើងតែងតែធ្វើនៅក្នុងឱកាសបុណ្យចូលឆ្នាំខ្មែរ ហើយក៏ជាផ្នែកមួយនៃយុទ្ធនាការនៅក្នុងការរកមូលនិធិក្នុងឱកាសទិវា ៨ ឧសភា ដើម្បីបង្ហាញជូនសប្បុរសជនថា ថវិកាដែលយើងបានទទួលពីសប្បុរសជន គឺតែងតែបានទៅដល់ដៃអ្នករងគ្រោះបំផុត»។

សូមជម្រាបថា អំណោយដែលយកមកជូនលោកតាលោកយាយនាពេលនេះមានដូចជា៖ អង្ករ ៥០គីឡូក្រាម, មី ៥កេស, ត្រីខ ១កេស(មាន១០០កំប៉ុង), ឆៃពៅ ៣កំប៉ុង (ស្មើ៣គីឡូក្រាម), ប្រេងឆា ៣ដប(ស្មើ៣គីឡូក្រាម), ទឹកស៊ីអីវ ២យួរ(ស្មើ១២ដប), ភេសជ្ជះវីកូឡា ២កេស, ទឹកបរិសុទ្ធ ២កេស, កន្ទេល ២រាយ, ឃីត ចំនួន២, ថវិកា ៥០០០០០រៀល (ហាសិបម៉ឺនរៀល) និងមានសម្ភារៈផ្សេងៗទៀតផងដែរ។

បន្ទាប់ពីទទួលបានអំណោយមនុស្សធម៌ លោកតាលោកយាយ មានក្តីរំភើបរីករាយឥតឧបមា និងបានថ្លែងអំណរគុណយ៉ាងជ្រាលជ្រៅគោរពជូនចំពោះ សម្តេចកិត្តិព្រឹទ្ធបណ្ឌិត ប៊ុន រ៉ានី ហ៊ុនសែន ដែលបានយកចិត្តទុកដាក់ គិតគូរ មិនឲ្យកូនចៅប្រុសស្រី និងចាស់ៗជរាឥតទីតាំង ឯកាដោយមិនទទួលបានការជួយសង្គ្រោះនោះឡើយ ។នាឳកាសនោះលោកតាលោកយាយ បានលើកដៃប្រណមបួងសួងទេវត្តាឆ្នាំថ្មី សូមតាមថែរក្សាមាតាមនុស្សធម៌ សម្តេចកិត្តិព្រឹទ្ធបណ្ឌិត ប៊ុន រ៉ានី ហ៊ុនសែន និងក្រុមគ្រួសារមានសុខភាពល្អ អាយុយឺនយូរ និងមានសុខសុវត្ថិភាពគ្រប់ទីកន្លែងទាំងអស់៕