(ភ្នំពេញ)៖ កម្លាំងសមត្ថកិច្ចនគរបាលរបស់ក្រុមការងារ Hotline Scam 24/7 នៃអគ្គស្នងការដ្ឋាននគរបាលជាតិ សហការអធិការដ្ឋាននគរបាលខណ្ឌបឹងកេងកង បានឃាត់ខ្លួនជនសង្ស័យឈ្មោះ ហ.ស.ប ភេទប្រុស អាយុ៣៦ឆ្នាំ ជាម្ចាស់ក្រុមក្រុមហ៊ុនទេសចរណ៍ VR SMILE TOUR AND TRAVEL Co.,Ltd ពាក់ព័ន្ធនឹងការឆបោកប្រាក់ពីជនរងគ្រោះជាច្រើន។

ការឃាត់ខ្លួននេះ ធ្វើឡើងដោយទទួលបានការអនុញ្ញាតពីនាយឧត្តមសេនីយ៍ ស ថេត អគ្គស្នងការនគរបាលជាតិ និងដឹកនាំបញ្ជាផ្ទាល់ពីលោកឧត្តមសេនីយ៍ឯក ជា ពៅ អគ្គស្នងការរង និងជាប្រធានក្រុមការងារ Hotline Scam 24/7 ដោយមានការសម្របសម្រួលពីលោក តូច ឧត្តម ព្រះរាជអាជ្ញារង នៃអយ្យការអមសាលាដំបូងរាជធានីភ្នំពេញ។

សូមបញ្ជាក់ថា សមត្ថកិច្ចទទួលបានពាក្យបណ្តឹងពីជនរងគ្រោះប្រមាណជាង២០បណ្តឹង ដែលបានប្តឹងម្ចាស់ក្រុមហ៊ុនទេសចរណ៍ VR SMILE TOUR AND TRAVEL Co.,Ltd ដែលមានអាសយដ្ឋានស្ថិតនៅសង្កាត់បឹងកេងកង៣ ខណ្ឌបឹងកេងកង រាជធានីភ្នំពេញ បានឆបោកប្រាក់ពីជនរងគ្រោះដែលជាអតិថិជន ក្រោមរូបភាពទទួលប្រាក់ ដើម្បីរៀបចំដំណើរកម្សាន្ដក្នុង-ក្រៅប្រទេស ប៉ុន្តែជាក់ស្តែងពុំបំពេញកាតព្វកិច្ចរៀបចំដំណើរកម្សាន្ដជូនអតិថិជន។

បច្ចុប្បន្នជនសង្ស័យត្រូវបានសមត្ថកិច្ចបញ្ជូនទៅឃុំនៅពន្ធនាគារ តាមដីកាបង្គាប់ឲ្យឃុំរបស់ចៅក្រមស៊ើបសួរ នៃសាលាដំបូងរាជធានីភ្នំពេញ៕