(ភ្នំពេញ)៖ ប្រតិបត្តិករចំនួន៥៤អង្គភាព-ស្ថាប័ន និងមន្ត្រីឧទ្យានុរក្សចំនួន៩៩រូប បានទទួលបណ្ណមេត្រីបរិស្ថាន ឆ្នាំ២០២៦ ដោយផ្ទាល់ពីលោកបណ្ឌិត អ៊ាង សុផល្លែត រដ្ឋមន្រ្តីក្រសួងបរិស្ថាន បន្ទាប់ពីក្រសួងបរិស្ថានពិនិត្យ និងវាយតម្លៃឃើញថាបានអនុវត្តសកម្មបានល្អ ឆ្លើយតបទៅនឹងយុទ្ធសាស្ត្រចក្រាវិស័យបរិស្ថានតាមរយៈការអនុវត្ត «ភាពស្អាត» «ភាពបៃតង» និង «ចីរភាព» ដើម្បីធានាបាននូវចីរភាពបរិស្ថាននៅកម្ពុជា។

ក្នុងឱកាសនោះ លោករដ្ឋមន្រ្តីបានថ្លែងវាយតម្លៃខ្ពស់ចំពោះ ប្រតិបត្តករមេត្រីបរិស្ថានទាំងអស់ ដែលបានអនុវត្តសកម្មភាពនាពេលកន្លងមក ក្នុងការចូលរួមចំណែកដ៏សំខាន់ សម្រេចបាននូវការលើកកម្ពស់ចំណេះដឹងអំពីបរិស្ថាន ដើម្បីផ្លាស់ប្ដូរផ្នត់គំនិតសាធារណជន ឱ្យចូលរួមប្រតិបត្តិមេត្រីបរិស្ថាន ជាពិសេសជួយលើកកម្ពស់ចំណេះដឹង ដល់សិស្ស និស្សិត យុវជន និងសាធារណជនទូទៅ ឱ្យយល់ដឹងកាន់តែច្បាស់អំពីបញ្ហាបរិស្ថាន សុខភាព អនាម័យបរិស្ថាន និងចូលរួមអភិវឌ្ឍន៍ប្រទេសជាតិ ប្រកបដោយភាពរុងរឿង ប្រែក្លាយទៅជាប្រទេសមានបរិស្ថានស្អាត ស្អាតក្នុងទឹក ស្អាតលើដី និងស្អាតក្នុងខ្យល់ ដើម្បីការអភិវឌ្ឍន៍សេដ្ឋកិច្ចសង្គមប្រកបដោយចីរភាព។

សូមបញ្ជាក់ថា ក្រុមការងារនាយកដ្ឋានរង្វាន់និងលើកទឹកចិត្ត នៃអគ្គនាយកដ្ឋានចំណេះដឹងនិងព័ត៌មានបរិស្ថាន សហការជាមួយ ក្រុមការងារវាយតម្លៃគុណវុឌ្ឍិមេត្រីបរិស្ថាន របស់មន្ទីរបរិស្ថានរាជធានី ខេត្ត បានធ្វើការវាយតម្លៃ និងជ្រើសរើសរូបវន្តបុគ្គល និងនីតិបុគ្គល ទាំងវិស័យសាធារណៈ និងវិស័យឯកជន ដែលបានប្រតិបត្តិមេត្រីបរិស្ថានបានល្អប្រសើរ ឆ្លើយតបទៅនឹងយុទ្ធសាស្ត្រចក្រាវិស័យបរិស្ថាន តាមរយៈការអនុវត្ត «ភាពស្អាត» «ភាពបៃតង» និង «ចីរភាព» ដើម្បីធានាបាននូវចីរភាពបរិស្ថាននៅកម្ពុជា បានចំនួន ៥០៣បណ្ណ និងប្រតិបត្តិករចំនួន៥៤អង្គភាព-ស្ថាប័ន និងមន្ត្រីឧទ្យានុរក្សចំនួន ៩៩រូប បានទទួលក្នុងឆ្នាំ២០២៦។

លោក ឡេង ជីវិន អគ្គនាយក អគ្គនាយកដ្ឋានចំណេះដឹងនិងព័ត៌មានបរិស្ថាន បានឱ្យដឹងថា កម្មវិធីលើកទឹកចិត្តប្រតិបត្តិកមេត្រីនាពេលនេះជំរុញស្មារតីប្រជាពលរដ្ឋ និងសាធារណៈជនទូទៅចូលរួមសម្អាតភូមិឋាន សហគមន៍ ស្ថាប័នរបស់ខ្លួន តាមទីសាធារណៈ និងផ្លូវជាតិគ្មានសំរាម និងសំណល់ផ្លាស្ទិក ដើម្បីធានាបាន កម្ពុជាស្អាត និងបៃតង ដែលជាការទាក់ទាភ្ញៀវទេសចរជាតិ និងអន្តជាតិ និងការរស់នៅប្រកបដោយសុខមាលភាព៕