(កូរ៉េខាងត្បូង)៖ លោក ឃួន ផុនរតនៈ ឯកអគ្គរាជទូតកម្ពុជាប្រចាំសាធារណរដ្ឋកូរ៉េ និងសហការី នៅថ្ងៃទី១៧ ខែមីនា ឆ្នាំ២០២៦ បានចុះជួបសួរសុខទុក្ខ និងសំណេះសំណាលជាមួយបងប្អូនសហគមន៍ខ្មែរ នៅភោជនីយដ្ឋានយូរ៉ាម្ហូបខ្មែរក្នុងទីក្រុងក្វាងជូធំ និងបងប្អូនពលករ-ពលការីនី ដែលកំពុងស្នាក់នៅបណ្ដោះអាសន្ននៅមជ្ឈមណ្ឌលឆុនណាំក្វាងជូ ក្នុងអំឡុងពេលរង់ចាំស្វែងរកការងារថ្មី។

ឆ្លៀតក្នុងឱកាសនោះដែរ លោកឯកអគ្គរាជទូត បានផ្ដល់ការលើកទឹកចិត្តដល់ប្អូនៗឱ្យមានការអត់ធ្មត់ ខិតខំតស៊ូ ក្នុងខណៈពេលដ៏លំបាកនេះ និងខិតខំអភិវឌ្ឍខ្លួនដោយឆ្លៀតពេលរៀនភាសាកូរ៉េបន្ថែម។

លោកឯកអគ្គរាជទូត ក៏បានឧបត្ថម្ភថវិកាមួយចំនួនទុកសម្រាប់ប្អូនៗប្រើប្រាស់ក្នុងពេលស្នាក់នៅបណ្ដោះអាសន្ននេះផងដែរ៕