(ពោធិ៍សាត់)៖ វេទិកាការងារ សន្តិសុខសង្គម និងបណ្តុះបណ្តាលវិជ្ជាជីវៈ ជាមួយឱកាសការងារចំនួន ៨២ ៨១៣កន្លែងនៅទូទាំងប្រទេស និងព័ត៌មានដ៏មានសារៈសំខាន់ពីអត្ថប្រយោជន៍ ប.ស.ស. ត្រូវបានប្រារព្ឋធ្វើឡើងនៅក្នុងបរិវេណវិទ្យាល័យ ហ៊ុន សែន កណ្តៀង ក្នុងស្រុកកណ្តៀង ខេត្តពោធិ៍សាត់ នាព្រឹកថ្ងៃសៅរ៍ ទី២៨ ខែកុម្ភៈ ឆ្នាំ២០២៦ ក្រោមអធិបតីលោក ងុយ រិទ្ធ រដ្ឋលេខាធិការ តំណាងដ៏ខ្ពង់ខ្ពស់លោក ហេង សួរ រដ្ឋមន្ត្រីក្រសួងការងារ និងបណ្ដុះបណ្ដាលវិជ្ជាជីវៈ។

ជាមួយនឹងការផ្សព្វផ្សាយ និងចុះឈ្មោះចូលរៀនវគ្គអប់រំបណ្តុះបណ្តាលបច្ចេកទេស និងវិជ្ជាជីវៈ ជាពិសេស កម្មវិធីបណ្តុះបណ្តាលជំនាញវិជ្ជាជីវៈនិងបច្ចេកទេស សម្រាប់យុវជនមកពីគ្រួសារក្រីក្រ និងគ្រួសារងាយរងហានិភ័យ (១,៥លាននាក់), វេទិកានេះជាឱកាសដ៏មានតម្លៃ ដែលបានផ្សាភ្ជាប់ដោយផ្ទាល់ដល់មូលដ្ឋាន រវាងអ្នករកការងារប្រមាណជា​៧០០នាក់ និងតំណាងក្រុមហ៊ុន រោងចក្រ សហគ្រាសចំនួន ១២ ដែលកំពុងត្រូវការកម្លាំងពលកម្មសរុប ៣ ៨១៥នាក់។

នាឱកាសនោះ លោក ងុយ រិទ្ធ បានពន្យល់យ៉ាងក្បោះក្បាយដល់បងប្អូនអ្នកចូលរួម អំពីអត្ថប្រយោជន៍ដ៏ច្រើនលើសលប់នៃការងារនៅក្នុងស្រុក ដែលមិនត្រឹមតែទទួលបានប្រាក់ឈ្នួលសមរម្យជាមួយនឹងលក្ខខណ្ឌការងារល្អ បានរស់នៅជួបជុំគ្រួសារ មើលថែទាំកូន និងឪពុកម្ដាយ និងជៀសផុតពីការកេងប្រវ័ញ្ចកម្លាំងពលកម្មខុសច្បាប់នៅក្រៅប្រទេសប៉ុណ្ណោះទេ ប៉ុន្តែថែមទាំងទទួលបាននូវអត្ថប្រយោជន៍ពីបេឡាជាតិសន្តិសុខសង្គម (ប.ស.ស.) ដូចជា៖ ផ្នែកថែទាំសុខភាព ផ្នែកសោធននិវត្ត និងផ្នែកហានិភ័យការងារ។

ទន្ទឹមនេះ លោកក៏បានលើកទឹកចិត្តឱ្យយុវជន ជាពិសេសបងប្អូនដែលត្រឡប់មកពីប្រទេសថៃចាប់យកការបណ្ដុះបណ្ដាលជំនាញបច្ចេកទេស ដើម្បីបង្កើនសមត្ថភាព និងទទួលបានប្រាក់ចំណូលកាន់តែខ្ពស់ផងដែរ ដែលក៏ជាគ្រឹះដ៏រឹងមាំមួយសម្រាប់កសាងសេដ្ឋកិច្ចគ្រួសារ និងសេដ្ឋកិច្ចជាតិ ដោយឯកឧត្តមបានគូសបញ្ជាក់ថា ការផ្ដល់ឱកាសការងារ និងការបង្កើតមុខរបរក្នុងស្រុកជូនប្រជាពលរដ្ឋ គឺជាអាទិភាពចម្បងមួយដែលរាជរដ្ឋាភិបាលកម្ពុជាយកចិត្តទុកដាក់ខ្ពស់ ដើម្បីធានាបាននូវជីវភាពសមរម្យ និងសន្តិសុខសង្គមជូនពលរដ្ឋគ្រប់រូបយ៉ាងកក់ក្ដៅបំផុតក្នុងគ្រប់កាលៈទេសៈ។

សូមជម្រាបដែរថា សម្រាប់បងប្អូនប្រជាពលរដ្ឋដែលមានបំណងសាកសួរព័ត៌មានបន្ថែមអំពីឱកាសការងារ និងអត្ថប្រយោជន៍ផ្សេងៗ សូមទាក់ទងមកកាន់លេខទូរស័ព្ទ Hotline ១២៩៧ សម្រាប់ផ្នែកការងារ និងលេខ ១២៨៦ ដើម្បីទទួលបានព័ត៌មានលម្អិតអំពីអត្ថប្រយោជន៍ ប.ស.ស.៕