(ភ្នំពេញ)៖ សម្តេចមហាបវរធិបតី ហ៊ុន ម៉ាណែត នាយករដ្ឋមន្ត្រីនៃកម្ពុជា បានដឹកនាំ គណៈប្រតិភូជាន់ខ្ពស់ អញ្ជើញត្រឡប់មកដល់កម្ពុជាវិញហើយ នៅរសៀល ថ្ងៃទី២៦ ខែកុម្ភៈ ឆ្នាំ២០២៦នេះ បន្ទាប់ពីចូលរួមកិច្ចប្រជុំដំបូង នៃក្រុមប្រឹក្សាសន្តិភាព នៅសហរដ្ឋអាម៉េរិក និងធ្វើទស្សនកិច្ចនៅអឺរ៉ុប អស់រយៈពេលប្រមាណ១សប្តាហ៍។

សម្តេចមហាបវរធិបតី ហ៊ុន ម៉ាណែត នាយករដ្ឋមន្ត្រីនៃកម្ពុជា បានចាកចេញពីកម្ពុជា កាលពីយប់ ថ្ងៃទី១៥ ខែកុម្ភៈ ឆ្នាំ២០២៦។

កិច្ចប្រជុំលើកដំបូងនៃក្រុមប្រឹក្សាសន្តិភាព បានធ្វើឡើងនៅថ្ងៃទី១៩ ខែកុម្ភៈ ឆ្នាំ២០២៦ នៅវិទ្យាស្ថានសន្តិភាពសហរដ្ឋអាម៉េរិក ដូណាល់ ជេ ត្រាំ។ កិច្ចប្រជុំនេះ ធ្វើឡើងក្រោមអធិបតីភាព លោក ដូណាល់​ ត្រាំ ប្រធានាធិបតីអាមេរិក ដែលជាស្ថាបនិក ក្នុងគោលដៅជំរុញសន្តិភាព និងកិច្ចខិតខំប្រឹងប្រែងឆ្ពោះទៅរកការកសាងឡើងវិញ នៅតំបន់ហ្គាហ្សា។

ក្នុងកិច្ចជុំលើកដំបូងនេះ សហរដ្ឋអាមេរិក បានប្រកាសចូលវិភាគទានចំនួន១០ពាន់លានដុល្លារ សម្រាប់ក្រុមប្រឹក្សាសន្តិភាព ខណៈដែល ប្រទេសសមាជិកដទៃទៀត បានសន្យាថា នឹងចូលរួមវិភាគទានជាង ៧ពាន់លានទៀត សម្រាប់ការកសាងឡើងវិញ និងជំនួយមនុស្សធម៌នៅតំបន់ហ្គាហ្សា។

ការចូលរួមក្រុមប្រឹក្សាសន្តិភាពនេះ ត្រូវបាន សម្តេចមហាបវរធិបតី ហ៊ុន ម៉ាណែត បានថ្លែងថា គឺដើម្បីបង្ហាញពី​ឆន្ទៈ​របស់​កម្ពុជា ក្នុងការគាំទ្រ និងរួមចំណែកដល់ការលើក​កម្ពស់ការរក្សាសន្តិភាពសកល។ សុច្ឆន្ទៈ ស្រឡាញ់សន្តិភាព ការគាំទ្រ និងរួមចំណែកដល់​ការកសាង និងរក្សាសន្តិភាព​គឺជា​គោលការណ៍​ដែលកម្ពុជាតែងតែប្រកាន់ខ្ជាប់ជារៀង​រហូត​មក ជាពិសេសតាមរយៈ​ការ​បញ្ជូន​កងកម្លាំងរក្សាសន្តិភាព ក្រោមឆត្រអង្គការសហ​ប្រជា​ជាតិ​​ទៅ​បំពេញ​បេស​ក​កម្មនៅតាមបណ្តាប្រទេសមួយចំនួនដែលរងគ្រោះដោយ​សារ​សង្គ្រាម។

ក្នុងអំឡុងពេលស្នាក់នៅរដ្ឋធានីវ៉ាស៊ីនតោន សម្តេចធិបតីនាយករដ្ឋមន្ត្រី ក៏បានផ្តល់បទសម្ភាសដល់សារព័ត៌មានអន្តរជាតិធំៗ ដូចជា Fox News និង Reuters ជាដើម។ ក្រៅពីនោះ សម្តេចក៏បានជួបទ្វេភាគីជាមួយឥស្សរជនសហរដ្ឋអាម៉េរិក និងមេដឹកនាំនៃប្រទេសឯទៀតមួយចំនួន ដើម្បីផ្លាស់ប្តូរយោបល់គ្នាលើការ ពង្រឹងទំនាក់ទំនងទ្វេភាគី និងពង្រីកកិច្ចសហប្រតិបត្តិការលើវិស័យនានា។

បន្ទាប់ពីបញ្ចប់កិច្ចប្រជុំលើកដំបូង នៃក្រុមប្រឹក្សាសន្តិភាព សម្តេចធិបតីនាយករដ្ឋមន្ត្រី បានបន្តដំណើរទស្សនកិច្ចការងារទៅកាន់ទ្វីបអឺរ៉ុប រួមទាំងទីក្រុងហ្សឺណែវ និងទីក្រុងព្រុចសែលផងដែរ។ នៅទីនោះ សម្តេចជំនួបជាមួយថ្នាក់ដឹកនាំ និងអ្នកពាក់ព័ន្ធសំខាន់ៗ ដើម្បីបង្កើនភាពជាដៃគូ និងកិច្ចសហការបន្ថែមទៀត៕