(សៀមរាប)៖ កម្លាំងនគរបាលខេត្តសៀមរាប សហការជាមួយកម្លាំងនគរបាលខេត្តកំពង់ចាម បានឃាត់ខ្លួនជនសង្ស័យ ចំនួន០២នាក់ ពាក់ព័ន្ធបទល្មើសជាក់ស្តែង រំលោភលើទំនុកចិត្ត បន្ទាប់ពីពួកគេបានខ្ចីម៉ូតូគេស៊ីដាច់។

កាលពីថ្ងៃទី១៨ ខែកុម្ភៈ ឆ្នាំ២០២៦ វេលាម៉ោង៨យប់ នៅចំណុចភូមិគោកធ្លក ឃុំ កណ្ដែក ស្រុកប្រាសាទបាគង ខេត្តសៀមរាប ជនសង្ស័យឈ្មោះ ចាន់ ភារិន បានសុំខ្ចីម៉ូតូ ម៉ាកហុងដា ទ្រីម ពណ៍ខ្មៅ ផ្លាកលេខ 1KRភ្នំពេញ 7189 របស់ឈ្មោះ ភា សុខភាព ភេទស្រី អាយុ១៩ ឆ្នាំ(ជាជនរងគ្រោះ) និងម្ដាយឈ្មោះ សាយ សាលឿត អាយុ៤២ឆ្មាំ ដោយនិយាយកុហកថា ខ្ចីម៉ូតូ ទៅយកប្រពន្ធមួយភ្លែត។ពេលខ្ចីបាន ជនសង្ស័យ ខាងលើបានទៅយកប្រពន្ធឈ្មោះ ឃុត សុភ័គ្គ (ជាជនសង្ស័យ)នៅផ្ទះ ឈ្មោះថា ភេទស្រីរស់នៅភូមិឃុំកើតហេតុខាងលើ។ ក្រោយមកជនសង្ស័យ និងប្រពន្ធ បានបើកម៉ូតូឌុបគ្នា គេចខ្លួនបាត់ ។

បន្ទាប់ពីទទួលបាន ពាក្យបណ្តឹងរបស់ជនរងគ្រោះ និង អនុវត្តន៍តាមការចង្អុលបង្ហាញពី លោកឧត្តមសេនីយ៍ទោហួត សុធី ស្នងការនៃស្នងការដ្ឋាននគរបាលខេត្តសៀមរាប កម្លាំងនគរបាលស្រុកប្រាសាទបាគង សហការជាមួយនគរបាលផែនការងារព្រហ្មទណ្ឌខេត្តសៀមរាប បានបើកការស្រាវជ្រាវ និងសហការជាមួយ កម្លាំងនគរបាល នៃអធិការដ្ឋាននគរបាលស្រុកព្រៃឈរ ខេត្តកំពង់ចាម បានឃាត់ខ្លួន ជនសង្ស័យ ទាំង០២ នាក់មកសាកសួរនាំ។

ជនសង្ស័យទាំងពីរនេះ រួមមាន៖០១. ឈ្មោះ ចាន់ ភារិន ភេទប្រុស អាយុ ៤៦ឆ្នាំមុខរបរ ធ្វើកម្មករ មានស្រុកកំណើតនៅភូមិ អូរបេង ឃុំមេសូជ្រៃ ស្រុកស្ទឹងត្រង់ ខេត្តកំពង់ចាម និងទីលំនៅបច្ចុប្បន្នភូមិក្រាំង ឃុំសុកចិត្ត ស្រុកសណ្ដាន់ ខេត្តកំពង់ធំ (ប្រវត្តិទោសគ្មាន)។

ទី.២.ឈ្មោះ ឃុត សុភ័គ្គ ភេទស្រី អាយុ ៣១ឆ្នាំមុខរបរកម្មករ មានស្រុកំណើត និងទីលំនៅបច្ចុប្បន្នភូមិ ក្រាំង ឃុំសុកចិត្ត ស្រុកសណ្ដាន់ខេត្តកំពង់ធំ(ប្រវត្តិទោសគ្មាន)។

នៅចំពោះមុខសមត្ថកិច្ច ជនសង្ស័យ បានឆ្លើយសារភាពថា បន្ទាប់ពីខ្ចីម៉ូតូ របស់ជនរងគ្រោះបានហើយ ជនសង្ស័យបានជិះម៉ូតូទៅឌុបប្រពន្ធ នាំគ្នាជិះឆ្ពោះទៅ ទិសខាងកើត ដើម្បីយកម៉ូតូ ទៅរកកន្លែងលក់(ស៊ីដាច់) ពេលជិះទៅដល់ផ្សារកំពង់ក្ដីស្រុកជីក្រែង ជនសង្ស័យ ទាំងពីរនាក់ខាងលើបានកាក់រថយន្តក្រុង ដាក់ម៉ូតូ និងជិះរថយន្តទៅភ្នំពេញ។ ពេលទៅដល់ភ្នំពេញខ្លួន និងប្រពន្ធ បានជួលផ្ទះសំណាក់ដេក ក្រោយមកក៏ធ្វើដំណើរត្រឡប់ មកខេត្តកំពង់ចាម ដល់ចំណុច(ព្រៃទទឹង)ក្នុងស្រុកព្រៃឈរ ខេត្តកំពង់ចាម នាថ្ងៃទី១៩ ខែកុម្ភៈ ឆ្នាំ២០២៦ ក៏ជិះចូលផ្ទះរបស់ឈ្មោះ ដំ ភេទប្រុស ដែលត្រូវជាមិត្តភក្តិ ដើម្បីដោះផ្លាកលេខម៉ូតូ ដោយជនសង្ស័យ(ប្ដី)ជាអ្នកដោះ បន្ទាប់មក ក៏បន្តរដំណើរ បានប្រហែល៤ គីឡូម៉ែត្រ ហួសសាលាស្រុកព្រៃឈរ ក៏ត្រូវកម្លាំងសម្ថតកិច្ចឃាត់ខ្លួនបានតែម្ដង។

វត្ថុតាងដកហូត មានម៉ូតូចំនួន១គ្រឿង ម៉ាកហុងដាទ្រីម ពណ៌ខ្មៅ ផ្លាកលេខ 1-kR-7189 ប្រគល់ជូនជនរងគ្រោះវិញ។

ចំណែកជនសង្ស័យ និងវត្ថុតាង ត្រូវបាននគរបាលជំនាញ កសាងសំណុំរឿង បញ្ជូនទៅតុលាការ ដើម្បីចាត់ការ តាមនីតិវិធីច្បាប់៕