ដីឧទ្យានជាតិគិរីរម្យ រងការទន្ទ្រានយកធ្វើជាកម្មសិទ្ធិឯកជនជាបន្តបន្ទាប់, ការទន្ទ្រានកាន់កាប់ដីឧទ្យានជាតិជាទង្វើខុសច្បាប់
11-02-2026 14:28
(កំពង់ស្ពឺ)៖ ដីឧទ្យានជាតិជាតិគិរីរម្យដីលម្ហែកម្សាន្តដ៏ទាក់ទាញមួយនៅឃុំចំបក់ ស្រុកភ្នំស្រួច ខេត្តកំពង់ស្ពឺ កំពុងមានជនខិលខូចលួចកាប់ទន្ទ្រានយកធ្វើជាកម្មសិទ្ធិឯកជនជាបន្តបន្ទាប់។
កាលពីខែកញ្ញា ឆ្នាំ២០២៥ សំណង់ជាច្រើនត្រូវបានមន្ត្រីឧទ្យានុរក្សប្រទះឃើញមានការលួចសាងសង់នៅឧទ្យានជាតិព្រះសិរាម្រឹតកុសុមៈគិរីរម្យនេះ ហើយក៏ត្រូវបានរុះរើចេញវិញ។ មកដល់ពេលនេះ គេមិនទាន់ដឹងថា តើជនដែលលួចសាងសង់សំណង់បំណងកាន់កាប់ជាកម្មសិទ្ធិឯកជននេះត្រូវបានវែកមុខ ឬចាត់វិធានការច្បាប់យ៉ាងណានោះទេ?
លុះថ្ងៃទី១០ ខែកុម្ភៈ ឆ្នាំ២០២៦ មន្ត្រីឧទ្យានុរក្សនៃឧទ្យានជាតិព្រះសិរាម្រឹតកុសុមៈគិរីរម្យ ពេលចុះល្បាតបានប្រទះឃើញការបោះបង្គោលរបងហ៊ុមព័ទ្ធយកដីនៅឧទ្យានេះបន្តទៀត ក្នុងគោលបំណងយកធ្វើជាកម្មសិទ្ធិដោយគ្មានការអនុញ្ញាតនៅចំណុចព្រហ្មមុខបួន ត្រង់និយាមកា ៣៩៦១៩៣-១២៥៣០៨៦។
មន្ត្រីឧទ្យានុរក្ស បានដកហូតវត្ថុតាងរួមមានលួសសំណាញ់ចំនួន៨ដុំ ស៊ីម៉ងតិ៍ ចំនួន១៣បេ ធុងទឹកចំណុះ៥,០០០លីត្រចំនួន១ កាមេរ៉ាសុវត្ថិភាពចំនួន៤គ្រាប់ សូឡាចំនួន៣ផ្ទាំង និងដែកវែងខ្លីជិត៤០០ដើមទៀត។ វត្ថុតាងទាំងអស់ ត្រូវបានមន្ត្រីឧទ្យានុរក្សយក ទៅរក្សាទុកនៅទីស្នាក់ការ និងកំពុងបន្តស្រាវជ្រាវរកជនដែលប្រព្រឹត្តចាត់ការតាមនីតិវិធី ក្រមបរិស្ថាន និងធនធានធម្មជាតិ។
បើតាមមន្ត្រីជាន់ខ្ពស់របស់ក្រសួងបរិស្ថាន បានឱ្យដឹងថា នៅឧទ្យានជាតិព្រះសិរាម្រឹតកុសុមៈគិរីនេះ ក្រៅពីការលបលួចកាន់កាប់ដោយជនខិលខូចហើយនោះ បច្ចុប្បន្នក៏មានក្រុមហ៊ុនកំពុងគ្រប់គ្រងដោយខុសច្បាប់ផងដែរ។
ឧទ្យានជាតិ ជាទ្រព្យសម្បត្តិសាធារណៈរបស់រដ្ឋ ត្រូវបានរាជរដ្ឋាភិបាលប្រគល់តួនាទីភារកិច្ចគ្រប់គ្រងដោយក្រសួងបរិស្ថាន។ ឧទ្យានជាតិ មិនអនុញ្ញាតឱ្យជនណាកាប់ទន្ទ្រានយកទៅធ្វើជាកម្មសិទ្ធិឯកជននោះឡើយ។
យោងតាមក្រមបរិស្ថាន និងធនធានធម្មជាតិ ឆ្នាំ២០២៣ បុគ្គលទាំងឡាយណាដែលធ្វើសកម្មភាពទន្ទ្រានកាន់កាប់លើដីតំបន់ការពារធម្មជាតិនឹងត្រូវផ្តន្ទាទោសដាក់ពន្ធ និងពិន័យជាប្រាក់ថែមទៀតផង។
លោក អ៊ាង សុផល្លែត រដ្ឋមន្ត្រីក្រសួងបរិស្ថាន បានប្រាប់ Fresh News ថា លោកបានចាត់ឱ្យមន្ត្រីរបស់ក្រសួង ព្រមទាំងស្នើទៅសមត្ថកិច្ចនៅក្នុងខេត្តកំពង់ស្ពឺ តាមវែករកមុខជនដែលបានលបលួចធ្វើសកម្មភាពកាន់កាប់ដោយខុសច្បាប់នៅឧទ្យានជាតិព្រះសិរាម្រឹតកុសុមៈគិរីរម្យ ហើយនឹងចាត់វិធានការទៅច្បាប់ដោយគ្មានលើកលែងនោះឡើយ។
ជាមួយគ្នានេះ លោករដ្ឋមន្ត្រី ក៏បានអំពាវនាវដល់ប្រជាពលរដ្ឋកុំឱ្យធ្វើសកម្មភាពទន្ទ្រានកាន់កាប់ដីឧទ្យានជាតិ ឬតំបន់ការពារធម្មជាតិដទៃទៀត ព្រោះជាទង្វើខុសច្បាប់ ហើយនាំឱ្យប្រឈមនឹងផ្លូវច្បាប់ និងមានទោសទណ្ឌ៕
