(ភ្នំពេញ)៖ នៅរសៀលថ្ងៃសៅរ៍ ០៥រោច ខែមាឃ ឆ្នាំម្សាញ់ សប្តស័ក ព.ស.២៥៦៩ ត្រូវនឹងថ្ងៃទី០៧ ខែកុម្ភៈ ឆ្នាំ២០២៦ សាកលវិទ្យាល័យភូមិន្ទនីតិសាស្ត្រ និងវិទ្យាសាស្ត្រសេដ្ឋកិច្ចបានរៀបចំកម្មវិធី អបអរសាទរកម្មវិធីជួបជុំអតីតនិស្សិត និស្សិត និងសាស្ត្រាចារ្យ អបអរសាទរនិស្សិតជ័យលាភីដែលបានបញ្ចប់ការសិក្សានៃមហាវិទ្យាល័យរដ្ឋបាលសាធារណៈ ថ្នាក់បរិញ្ញាបត្រទំនាក់ទំនងអន្តរជាតិ (ជំនាន់១៣) និងថ្នាក់បរិញ្ញាបត្រនីតិសាស្ត្រខ្មែរ-ចិន(ជំនាន់៣) ក្រោមអធិបតីភាព លោក ថោង ចន្ត្រា សាកលវិទ្យាធិការរង តំណាងដ៏ខ្ពង់ខ្ពស់ ឯកឧត្តមសាស្ត្រាចារ្យបណ្ឌិត លុយ ចណ្ណា សាកលវិទ្យាធិការនៃសាកលវិទ្យាល័យភូមិន្ទនីតិសាស្ត្រ និងវិទ្យាសាស្ត្រសេដ្ឋកិច្ច។

សូមជម្រាបថា កម្មវិធីនេះត្រូវបានរៀបចំឡើងដោយដេប៉ាតឺម៉ង់ទំនាក់ទំនងអន្តរជាតិ មហាវិទ្យាល័យរដ្ឋបាលសាធារណៈ មួយឆ្នាំម្តង។​ ឆ្នាំនេះគឺជារដូវកាលទី៤ ក្នុងគោលបំណងជួបជុំនិស្សិត អតីតនិស្សិត និងសាស្ត្រាចារ្យ ដើម្បីបង្កើតនូវសាមគ្គីភាព រក្សាទុកនូវអនុស្សាវរីយ៍ល្អៗតាមរយៈការប្រកួតទេពកោសល្យសម្តែងសិល្បៈរបស់និស្សិតបរិញ្ញាបត្រនៅក្នុងមហាវិទ្យាល័យរដ្ឋបាលសាធារណៈនេះ។​

នៅក្នុង​មហាវិទ្យាល័យ​រដ្ឋបាលសាធារណៈ​មាន​បរិញ្ញាបត្រ​ចំនួន៣​គឺ​ បរិញ្ញាបត្រ​រដ្ឋបាលសាធារណៈ​ បរិញ្ញាបត្រ​ទំនាក់ទំនង​អន្តរជាតិ​ និង​បរិញ្ញាបត្រ​នីតិសាស្ត្រ​ខ្មែរ​-ចិន​។​ សម្រាប់​បរិញ្ញាបត្រ​ទំនាក់ទំនង​អន្តរជាតិ​សិក្សា​ជាភាសា​អង់គ្លេស​ដែលបាន​បង្កើត​ឡើង​តាំងឆ្នាំ២០១០ មាន​និស្សិត​ខ្មែរ​និង​និស្សិត​បរទេស ដែលមានដូចជានិស្សិត​ជនជាតិ​ឡាវ​ ជនជាតិ​បារាំងបានចុះឈ្មោះចូលរៀនឬក្រោម​គម្រោង​កម្មវិធី​ផ្លាស់ប្ដូរ​កម្មវិធី​សិក្សា។ ចំពោះ​បរិញ្ញាបត្រ​នីតិសាស្ត្រ​ខ្មែរ​-ចិន​(២+២)បាន​បង្កើត​ឡើង​នៅឆ្នាំ២០១៩​សិក្សា​ជាភាសា​ខ្មែរ​និងចិន​ និស្សិត​ខ្មែរ​សិក្សា​២ឆ្នាំនៅ​ស.ភ.ន.វ.ស. និង២ឆ្នាំ​សាកលវិទ្យាល័យ​វិទ្យាសាស្ត្រ​នយោបាយ​និង​នីតិសាស្ត្រ​ភាគ​និរតី នៅទីក្រុងឆុងឈីងប្រទេសចិន។​

ចំពោះរបៀបវារៈនៃកម្មវិធីពេញមួយរសៀលនេះ ត្រូវបានរៀបចំឡើងយ៉ាងសម្រិតសម្រាំងបំផុត ដែលដំបូងឡើយគឺការថ្លែងនូវរបាយការណ៍បូកសរុបលទ្ធផលការងារប្រចាំឆ្នាំ២០២៥ និងការលើកទិសដៅការងារបន្តសម្រាប់ឆ្នាំ២០២៦ ដោយលោកសាស្ត្រាចារ្យជំនួយបណ្ឌិត ព្រុំ រិទ្ធី ប្រធានដេប៉ាតឺម៉ង់ទំនាក់ទំនងអន្តរជាតិ។ បន្ទាប់មក កម្មវិធីក៏បានឈានដល់មតិសំណេះសំណាលប្រកបដោយអត្ថន័យពីសំណាក់ លោកបណ្ឌិត ឃឹម គីរី ព្រឹទ្ធបុរសរងមហាវិទ្យាល័យរដ្ឋបាលសាធារណៈ រួមជាមួយការប្រកាសបើកកម្មវិធីជាផ្លូវការដោយ លោក ថោង ចន្ត្រា សាកលវិទ្យាធិការរង។ ក្នុងឱកាសនោះដែរ តំណាងនិស្សិតជ័យលាភីគឺ លោក ណាន សុវណ្ណវិរៈបុត្រ និង កញ្ញា អេងថង កេសីយ៉ា ក៏បានឡើងថ្លែងសុន្ទរកថាបង្ហាញពីចំណាប់អារម្មណ៍ និងការតាំងចិត្តបន្ទាប់ពីបញ្ចប់ការសិក្សាពីថ្នាក់បរិញ្ញាបត្រនីតិសាស្ត្រខ្មែរ-ចិន និងបរិញ្ញបត្រទំនាក់ទំនងអន្តរជាតិ។ កាន់តែពិសេសជាងនេះទៅទៀត សាកលវិទ្យាល័យក៏បានអញ្ជើញ ឯកឧត្តមបណ្ឌិត ធិន វុត្ថា នាយករងខុទ្ទកាល័យឧបនាយករដ្ឋមន្ត្រី រដ្ឋមន្ត្រីក្រសួងយុត្តិធម៌ និងជាសាស្ត្រាចារ្យនៃសាកលវិទ្យាល័យ ដើម្បីផ្តល់កិត្តិយសចែករំលែកនូវចំណេះដឹង បទពិសោធន៍សិក្សា និងវិថីអាជីពការងារក្នុងវិស័យច្បាប់ និងទំនាក់ទំនងអន្តរជាតិ ជូនដល់ប្អូនៗនិស្សិតទុកជាទុនសម្រាប់ការងារទៅថ្ងៃអនាគត។

លើសពីនេះ កម្មវិធីក៏បានញ៉ាំងឱ្យបរិយាកាសកាន់តែអធិកអធម និងសប្បាយរីករាយតាមរយៈផ្ទាំងទស្សនីយភាពសិល្បៈជាច្រើន ដែលសម្តែងដោយនិស្សិតនៃដេប៉ាតឺម៉ង់ទាំងពីរ រួមមាន៖ ការដើរម៉ូតឈុតសម្លៀកបំពាក់ប្រពៃណីខ្មែរ៧ថ្ងៃ ការបកស្រាយចម្រៀង និងរបាំប្រពៃណីឡាវ (ដោយនិស្សិតឡាវ) ការសម្តែងឈុតឆាករឿង "កុលាបប៉ៃលិន" ការសម្តែងហនុមាន ការបកស្រាយចម្រៀងសម័យ ការសម្តែងរឿង "ទុំទាវ ២០២៦" និងការបង្ហាញក្បាច់គុនល្បុក្កតោ ដែលសុទ្ធសឹងតែបង្ហាញពីភាពច្នៃប្រឌិតខ្ពស់របស់និស្សិត។

និស្សិត​ជ័យលាភីទទួលបានលិខិតបញ្ជាក់ការសិក្សាដែលបានបញ្ចប់ការសិក្សាពីថ្នាក់បរិញ្ញាបត្រទំនាក់ទំនងអន្តរជាតិ (ជំនាន់១៣) និងថ្នាក់បរិញ្ញាបត្រនីតិសាស្ត្រខ្មែរ-ចិន (ជំនាន់៣)។ ទន្ទឹមនឹងនោះ គណៈអធិបតីក៏បានប្រគល់លិខិតថ្លែងអំណរគុណ និងរង្វាន់លើកទឹកចិត្តជូនដល់ក្រុមសម្តែង ក្រុមស្នូល និងក្រុមការងារស្ម័គ្រចិត្តទាំងអស់ ដែលបានលះបង់កម្លាំងកាយចិត្ត និងពេលវេលាដ៏មានតម្លៃក្នុងការរៀបចំកម្មវិធីទាំងមូលឱ្យទទួលបានជោគជ័យ និងប្រព្រឹត្តទៅយ៉ាងរលូនគួរជាទីមោទនក្រៃលែង៕