(កំពង់ស្ពឺ)៖ លោក អ៊ាង សុផល្លែត រដ្ឋមន្ត្រីក្រសួងបរិស្ថាន បានបង្ហាញក្តីរំពឹងថា ភ្នំខ្នង​ផ្សារ​តំបន់ទេសចរណ៍ធម្មជាតិដ៏ស្រស់បំព្រង នឹងទាក់ទាញអ្នកទេសចរណ៍កាន់តែច្រើន ក្រោយការអភិវឌ្ឍន៍សម្រេចជាស្ថាពរតាមការចង្អុលបង្ហាញរបស់សម្តេចមហាបវរធិបតី ហ៊ុន ម៉ាណែត នាយករដ្ឋមន្ត្រីកម្ពុជា ខណៈពេលបច្ចុប្បន្នផ្លូវ និងហេដ្ឋារចនាសម្ព័ន្ធ​ជា​ច្រើនហើយ ត្រូវបានសាងសង់ និងរៀបចំ។

កាលពីថ្ងៃទី៨ ខែមីនា ឆ្នាំ២០២៥កន្លងទៅនេះ សម្តេចមហាបវរធិបតី ហ៊ុន ម៉ាណែត បានលបលួចធ្វើដំណើរទៅកាន់ភ្នំខ្នងផ្សារ។ ដំណើរនេះ មិនមែនជា​ដំ​ណើរ​​ ដើម្បីតែគយ​គន់​​សម្រស់ភ្នំខ្នងផ្សារនោះទេ តែជាដំណើរមួយដើម្បីពិនិត្យពិច្ច័យកែខៃច្នៃ​ឱ្យទីឋាន​ធម្ម​ជាតិ​​ដ៏ពិសិដ្ឋភ្នំខ្នងផ្សារឱ្យក្លាយទៅជាកន្លែងកម្សាន្ត និងទាញយកប្រយោជន៍​សេដ្ឋ​កិច្ច​ដល់ប្រជាពលរដ្ឋនៅតំបន់នោះផងដែរ។

ដំណើរអមដោយ​លោក អ៊ាង សុផល្លែត រដ្ឋមន្ត្រីក្រសួងបរិស្ថាន លោក ហួត ហាក់ រដ្ឋ​មន្ត្រី​ក្រសួងទេសចរណ៍ និងលោក ជាម ច័ន្ទសោភ័ណ អភិបាលខេត្តកំពង់ស្ពឺផងនោះ សម្តេច​មហាបវរធិបតី បានជ្រើសយកថ្មើរជើងចាប់ពីជើងភ្នំ រហូតដល់កំពូលភ្នំ។ ការ​ជ្រើស​យកការធ្វើដំណើរដោយថ្មើរជើងចាប់ពីជើងភ្នំ ដល់កំពូលភ្នំ ដើម្បីសម្តេចពិនិត្យ​ពិច្ច័យ និងចាត់ចែងលើការរៀបចំហេដ្ឋារចនាសម្ព័ន្ធ រួមនិងកិច្ចការមួយចំនួន ដើម្បី​សម្រួលដល់ការធ្វើដំណើររបស់អ្នកទេសចរ និងការធានាបានផលប្រយោជន៍​សម្រាប់​ប្រជាពលរដ្ឋនៅក្នុងសហគមន៍។

ក្រោយដំណើរទស្សនកិច្ចទៅកាន់ភ្នំខ្នងផ្សារ សម្តេចមហាបវរធិបតី ហ៊ុន ម៉ាណែត បានណែនាំឱ្យក្រសួងបរិស្ថាន ក្រសួងទេសចរណ៍ ក្រសួងប្រៃសនីយ៍ និងទូរគមនាគមន៍ ក្រសួងអភិវឌ្ឍន៍ជនបទ ក៏ដូចជាអាជ្ញាធរខេត្តកំពង់ស្ពឺ រៀបចំកែលំអហេដ្ឋា​រចនា​សម្ព័ន្ធ​រួម​មានផ្លូវ ចំណតយានយន្ត បន្ទប់ទឹក ទីស្នាក់អាស្រ័យ និងដំឡើងប្រព័ន្ធចាប់សេវា​ទូរស័ព្ទ​ជាដើម។ ជាពិសេសសម្តេចមហាបវរធិបតី បានដកហូតសិទ្ធិក្រុមហ៊ុនឯកជន ដែលមាន​បំណង​វិនិយោគនៅតំបន់នោះ ធ្វើឱ្យបាត់ប្រយោជន៍ប្រជាសហគមន៍ ហើយជំនួសដោយ​ការ​ពង្រឹងសមត្ថភាពបដិសណ្ឋារកិច្ចជូនប្រជាសហគមន៍វិញ ដើម្បីរួមចំណែកលើកកម្ពស់​របស់​ប្រជាសហគមន៍។

ក្រោយពីដាក់ចេញនូវផែនការដ៏ច្បាស់លាស់របស់ប្រមុខរាជរដ្ឋាភិបាលហើយនោះ ក្រសួង​​​ទាំង៣ និងអាជ្ញាធរខេត្តកំពង់ស្ពឺ បានចាប់ផ្តើមបំពេញកិច្ចការរបស់ខ្លួនរៀងៗខ្លួន ដោយមិនបង្អង់នោះឡើយ។ ៦៦ថ្ងៃក្រោយដំណើររបស់សម្តេចមហាបវរធិបតី ពោល​នៅ​ថ្ងៃ​ទី១៦ ខែឧសភា ឆ្នាំ២០២៥ លោក អ៊ាង សុផល្លែត រដ្ឋមន្ត្រីក្រសួងបរិស្ថាន ក៏បាន​បើក​ការដ្ឋានសាងសង់ផ្លូវ ហើយហេដ្ឋារចនាសម្ព័ន្ធនានា ក៏បានចាប់ផ្តើមសាង​សង់ជាបន្ត​បន្ទាប់​ផងដែរ។

រយៈពេលជិត៣០០ថ្ងៃ មកដល់ត្រឹមដើមខែមករា ឆ្នាំ២០២៦នេះ មានសមិទ្ធ​ផល​ជា​ច្រើន​​នៅទីតាំងជើងភ្នំខ្នងផ្សារ ដែលគេហៅថា ដំណាក់ដំរីនោះ បានសាងសង់រួច​រាល់​ និងជួយ​បង្កើនការទាក់ទាញអ្នកទេសចរណ៍បន្ថែមមួយកម្រិតទៀតឱ្យទៅលេងភ្នំខ្នងផ្សារ។

នៅថ្ងៃសៅរ៍ ទី៣១ ខែមករា ឆ្នាំ២០២៦ លោក អ៊ាង សុផល្លែត រដ្ឋមន្ត្រីក្រសួងបរិស្ថាន លោក ថោ ជេដ្ឋា រដ្ឋមន្ត្រីក្រសួងធនធានទឹក និងឧតុនិយម ព្រមទាំងថ្នាក់ និងមន្ត្រី​នៃ​ក្រ​សួងបរិស្ថាន, ក្រសួងធនធានទឹក និងឧតុនិយម បានធ្វើដំណើរចុះទៅដល់ភ្នំខ្នងផ្សារ ដើម្បីពិនិត្យសមិទ្ធផលដែលសម្រេចបាន ព្រមទាំងបានធ្វើដំណើរដោយថ្មើរជើងឡើងភ្នំ​ខ្នង​ផ្សារ ដើម្បីពិនិត្យផែនការដែលត្រូវអភិវឌ្ឍបន្ត។

លោក អ៊ាង សុផល្លែត បានឱ្យដឹងថា ក្រោយពេលទទួលបានផែនការពីសម្តេចប្រមុខ​រាជ​រដ្ឋាភិបាល ក្រសួងបរិស្ថានដែលជាអ្នកមុខការលើកិច្ចអភិវឌ្ឍន៍នៅភ្នំខ្នងផ្សារ បាន​អនុ​វត្ត​ន៍​ការងារជាបន្តបន្ទាប់មិនបង្អង់នោះឡើយ។

បើតាមលោករដ្ឋមន្ត្រី សមិទ្ធផលដែលសម្រេចបាននាពេលនេះ រួមមាន ផ្លូវលំក្រាលគ្រួស​តភ្ជាប់​​ពីភូមិតាំងបំពង់ ទៅកាន់ជើងភ្នំ ដែលពីមុនផ្លូវនេះលំបាកធ្វើដំណើរខ្លាំង ហើយត្រូវ​ចំណាយពេលយូរក្នុងការធ្វើដំណើរ។ ប៉ុន្តែបច្ចុប្បន្នអាចបើករថយន្តបាន ហើយធ្វើដំណើរ​បានលឿន។ នៅពេលខាងមុខផ្លូវនេះ នឹង​បន្តក្រាលកៅស៊ូ​ដោយ​ក្រសួងអភិវឌ្ឍន៍​ជន​បទ។

នៅជើងភ្នំបានរៀបចំទីសំចត រួមមានមណ្ឌលព័ត៌​មាន​ជាមួយទីសង្គ្រោះបន្ទាន់ ផ្សារ​សហ​គមន៍ ហាង​កាហ្វេសសហគមន៍ ចំណតរថយន្ត​ក្រុង រថយន្តទេសចរណ៍ ទោចក្រយាន​យន្ត ប្រព័ន្ធ​ទឹក​អណ្ដូង​អនាម័យ​ដើរដោយថាមពល​ពន្លឺ​ព្រះអាទិត្យ ប្រព័ន្ធអគ្គិសនីដើរ​ដោយ​ថាម​ពល​ពន្លឺព្រះអាទិត្យ សួនច្បារ បន្ទប់ងូតទឹក​ប្រុស-ស្រី បន្ទប់អនាម័យ ប្រុស-​ស្រី-ជនពិការ ផ្ទះ​ស្នាក់នៅរបស់ប្រជាសហគមន៍​ដែល​ជា​អ្នកគ្រប់គ្រងគោលដៅ​លម្ហែ​បៃ​តង។

លោករដ្ឋមន្ត្រីបរិស្ថាន បានឱ្យដឹងទៀតថា ក្រៅពីនេះ ក្រសួងក៏បានរៀបចំផ្លូវថ្មើរជើង​ឡើងភ្នំថ្មី ពីជើងភ្នំ ទៅដល់ទីតាំងដានព្រះអង្គចម្ងាយប្រមាណជា៤គីឡូម៉ែត្រ ដោយ​មាន​កន្លែងដាក់សំរាម និងកន្លែងអង្គុយសម្រាកតាម​ដង​​ផ្លូ​វក្រោមម្លប់ឈើ​ដ៏ត្រឈឹង​ត្រឈៃ​ផង​ដែរ។

លោក អ៊ាង សុផល្លែត បានឱ្យដឹងផងដែរថា ក្រៅពីសមិទ្ធផលដែលបានរៀបរាប់នេះទៅ ជាជំហានបន្ទាប់ ក្រសួងបរិស្ថាន នឹងចាប់ផ្តើមអភិវឌ្ឍ​នៅ​ទីតាំងដានព្រះអង្គ (ចង្កេះ​ភ្នំ​ខ្នង​ផ្សារ​) ដោយបន្ត​កសាងហេដ្ឋា​រចនា​សម្ព័ន្ធចាំបាច់ រួមមាន​មណ្ឌល​ព័ត៌មានជាមួយ​នឹង​ទី​សង្គ្រោះបន្ទាន់ ហាង​លក់វត្ថុ​អនុ​ស្សាវរីយ៍ ភោជនីយដ្ឋាន ចំណត​រថ​យន្តទេស​ចរណ៍​-ទោ​ចក្រ​​យានយន្ត អាងស្តុកទឹក អណ្តូង​ទឹកសម្រាប់អ្នក​ថ្មើរជើង​ប្រើ​ប្រាស់ បន្ទប់ងូតទឹក​ប្រុស​-ស្រី បន្ទប់​អនា​ម័យប្រុស​-ស្រី-​ជនពិការ និងជាពិសេស​កន្លែង​អង្គុយលម្ហែ បណ្តែត​អារម្មណ៍​គយ​គន់​ទេសភាព និង​ស្រូប​ខ្យល់អាកាស​ដ៏ល្អបរិសុទ្ធពី​ធម្ម​ជាតិបៃតង។

បើតាមលោក អ៊ាង សុផល្លែត ក្រៅពីការរៀបចំហេដ្ឋារចនាសម្ព័ន្ធនានា សម្រួលដល់ការ​ទៅ​លេងកម្សាន្ត និងលំហែរបស់អ្នកទេសចរណ៍ហើយនោះ លោកក៏នឹងយកអ្នកជំនាញ​លើវិស័យទេសចរណ៍ចុះអប់រំ បណ្តុះបណ្តាលលើការបដិសណ្ឋារកិច្ចជូនដល់ប្រជា​សហ​គមន៍ ដើម្បីពួកគាត់អាចផ្តល់សេវាបានកាន់តែប្រសើរដល់អ្នកទេសចរណ៍ ហើយអាច​ទាញយកចំណូលទ្រទ្រង់ដល់ជីវភាព។

លោក អ៊ាង សុផល្លែត បានបង្ហាញសុទិដ្ឋិនិយមថា បន្ទាប់ពីការអភិវឌ្ឍន៍ហេដ្ឋារចនា​សម្ព័ន្ធសម្រេចជាស្ថាពរតាមផែនការ តំបន់ទេសចរណ៍ធម្មជាតិភ្នំខ្នងផ្សារនឹងទទួលបាន​អ្នក​​ទេសចរណ៍កាន់តែច្រើន ហើយប្រជាសហគមន៍នឹងត្រូវបានលើកកម្ពស់ជីវភាព ស្របតាមបំណងប្រាថ្នារបស់សម្តេចមហាបវរធិបតី ហ៊ុន ម៉ាណែត។

សូមបញ្ជាក់ថា ភ្នំខ្នងផ្សារតំបន់ទេសចរណ៍ធម្មជាតិដ៏ល្បាញល្បីនាទឹកដីស្រុកឱរ៉ាល់​ ខេត្ត​កំពង់​ស្ពឺ ហើយសាងភាពល្បីរន្ទឺគ្រប់ទីកន្លែងព្រោះតែសម្រស់ដងគិរីបព្វតាដ៏ស្រស់បំព្រង។ ភ្នំខ្នង​ផ្សារ ជាតំបន់ព្រៃភ្នំដ៏ធំមួយ មានទីតាំងប្រសព្វមុម៣ នៃខេត្តកំពង់ស្ពឺ កោះកុង និងពោធិ៍​សាត់ សម្បូរទៅដោយព្រៃឈើក្រាស់ ជ្រលងភ្នំទាបខ្ពស់ៗ វាលស្រល់ដ៏ស្រស់​ស្អាត និងសម្បូរ​ទៅដោយសត្វព្រៃកម្រជាច្រើនប្រភេទ។ មានចម្ងាយប្រមាណ​១៦៥គីឡូ​ម៉ែត្រ ពីរាជ​ធានីភ្នំពេញ ភ្នំខ្នងផ្សារជាទីឋានធម្មជាតិ ដែលបានអន្ទងដួងចិត្តអ្នកទេសចរ​ជិតឆ្ងាយឱ្យទៅលេងកម្សាន្តមិនចេះជិនណាយនោះឡើយ៕