(ភ្នំពេញ)៖ លោកសន្តិបណ្ឌិត នេត សាវឿន ឧបនាយករដ្ឋមន្ត្រី និងជាប្រធានអាជ្ញាធរជាតិប្រយុទ្ធប្រឆាំងគ្រឿងញៀន នៅរសៀលថ្ងៃទី១៤ ខែតុលា ឆ្នាំ២០២៥នេះ បានទទួលជួបសម្តែងការគួរសម និងពិភាក្សាការងារជាមួយលោក Dato’ Seri Zahid Hamidi ឧបនាយករដ្ឋមន្ត្រី រដ្ឋមន្ត្រីក្រសួងអភិវឌ្ឍន៍ជនបទ និងតំបន់ និងជាប្រធានគណៈកម្មាធិការរដ្ឋមន្ត្រីលុបបំបាត់គ្រឿងញៀនម៉ាឡេស៊ី (Cabinet Committee on Eradication of Drugs-JKMD)។ ជំនួបនេះ បានធ្វើឡើងនៅនៅសាលសវនាការលោកសន្តិបណ្ឌិត នាអគារមិត្តភាព នៃទីស្ដីការគណៈរដ្ឋមន្ត្រី។

ជាកិច្ចចាប់ផ្ដើម លោកសន្ដិបណ្ឌិត នេត សាវឿន ឧបនាយករដ្ឋមន្ដ្រី បានស្វាគមន៍យ៉ាងកក់ក្ដៅ ចំពោះលោក Dato’ Seri Dr. Amad Zahid Hamidi ឧបនាយករដ្ឋមន្រ្តី រដ្ឋមន្ដ្រីក្រសួងអភិវឌ្ឍន៍ជនបទ និងតំបន់ម៉ាឡេស៊ី ដែលបានបំពេញទស្សនកិច្ចការងារនៅប្រទេសកម្ពុជា និងបានចូលជួបសម្ដែងការគួរសម និងពិភាក្សាការងារជាមួយ សម្ដេចតេជោ ហ៊ុន សែន ប្រធានព្រឹទ្ធសភា និងសម្ដេចមហាបវរធិបតី ហ៊ុន ម៉ាណែត នាយករដ្ឋមន្ដ្រីនៃកម្ពុជា ព្រមទាំងបានបង្ហាញទំនាក់ទំនង និងចំណងមិត្តភាព ៦៨ឆ្នាំ រវាងកម្ពុជា-ម៉ាឡេស៊ី។

ឧបនាយករដ្ឋមន្ដ្រី នេត សាវឿន ជាថ្មីម្ដងទៀត តាមរយៈលោក Dato’ Seri Dr. Amad Zahid Hamidi បានថ្លែងអំណរគុណដល់នាយករដ្ឋមន្ដ្រីម៉ាឡេស៊ី ដែលក្នុងនាមជាប្រធាន ASEAN ប្ដូរវេន ក្នុងកិច្ចខិតខំប្រឹងប្រែងសម្របសម្រួលឲ្យមានបទឈប់បាញ់រវាងកម្ពុជា-ថៃ។

ក្នុងនាមជាប្រធានអាជ្ញាធរជាតិប្រយុទ្ធប្រឆាំងគ្រឿងញៀន ឧបនាយករដ្ឋមន្ដ្រី នេត សាវឿន បានគូសបញ្ជាក់ថា សម្រាប់កម្ពុជា ក៏មិនខុសពីប្រទេសដ៏ទៃបញ្ហាគ្រឿងញៀន មិនទាន់ថមថយដោយសារកម្ពុជា នៅជិតតំបន់ត្រីកោណមាស ប៉ុន្ដែយន្តការរបស់រាជរដ្ឋាភិបាលកម្ពុជា ក្នុងអាណត្តិទី៧ គឺកំណត់អាទិភាពលើការងារប្រយុទ្ធប្រឆាំងគ្រឿងញៀន ក្នុងនោះមានទាំងវិធានការផ្សព្វផ្សាយអប់រំ អនុវត្តច្បាប់ និងជំរុញកិច្ចសហប្រតិបត្តិការអន្ដរជាតិផងដែរ។

លោកសន្ដិបណ្ឌិត បានជម្រាបជូនភាគីម៉ាឡេស៉ី អំពីយុទ្ធសាស្ដ្រក្នុងការប្រយុទ្ធប្រឆាំងគ្រឿងញៀនរបស់រាជរដ្ឋាភិបាលកម្ពុជា ដោយរួមមាន ការបង្កើតគណៈកម្មការអន្ដរស្ថាប័ន និងប្រជាពលរដ្ឋក្នុងសង្គមទាំងមូល និងការប្រើប្រាស់យុទ្ធសាស្ដ្រផ្សព្វផ្សាយអប់រំ បន្ថែមពីលើការអនុវត្តច្បាប់ សំដៅពង្រឹង និងបង្កើនប្រសិទ្ធភាពការប្រយុទ្ធប្រឆាំងគ្រឿងញៀន។ ក្នុងក៏មានការប្រើប្រាស់ប្រព័ន្ធបច្ចេកវិទ្យាឌីជីថល ដើម្បីបង្កើនការយល់ដឹង និងការរាយការណ៍ពីប្រជាពលរដ្ឋមកកាន់សមត្ថកិច្ច។

ជាមួយគ្នានោះ លោក Dato’ Seri Dr. Amad Zahid Hamidi ឧបនាយករដ្ឋមន្រ្តី រដ្ឋមន្ដ្រីក្រសួងអភិវឌ្ឍន៍ជនបទ និងតំបន់ម៉ាឡេស៊ី បានថ្លែងអំណរគុណដល់លោកសន្ដិបណ្ឌិត ឧបនាយករដ្ឋមន្ត្រី ដែលជាអតីតអគ្គស្នងការនគរបាលជាតិ ដែលបានជម្រាបជូនពីបញ្ហាគ្រឿងញៀននៅកម្ពុជា។ ក្នុងនាមលោកជាប្រធានគណៈកម្មាធិការរដ្ឋមន្ត្រី លុបបំបាត់គ្រឿងញៀនម៉ាឡេស៊ី (Cabinet Committee on Eradication of Drugs-JKMD) និងជាអតីតរដ្ឋមន្ត្រីក្រសួងមហាផ្ទៃគ្រប់គ្រង លើការងារប្រយុទ្ធប្រឆាំងគ្រឿងញៀន និងការងារអន្តោប្រវេសន៍ ហើយលោកបានដឹងច្បាស់ពីបញ្ហានេះ ដែលបញ្ហាគ្រឿងញៀន គឺចាត់ទុកជាបញ្ហាសកលដែលយើងត្រូវរួមគ្នាដោះស្រាយ។

ឧបនាយករដ្ឋមន្ដ្រីម៉ាឡេស៉ី បានទទួលស្គាល់ថា បញ្ហាគ្រឿងញៀន គឺជាបញ្ហាសកល ហើយបច្ចុប្បន្នគ្រឿងញៀនមិនប្រពៃណី ត្រូវបានប្រែក្លាយមកជាគ្រឿងញៀនសំយោគវិញ។ នៅម៉ាឡេស៊ី ជាប្រទេសមានរដ្ឋច្រើន ហើយមានរដ្ឋប៉ែកខាងកើតមានរដ្ឋមួយចំនួន ពាក់ព័ន្ធនឹងគ្រឿងញៀនច្រើនជាងគេ ហើយម៉ាឡេស៉ី មានអ្នកញៀនគ្រឿងញៀនភាគច្រើន អាយុក្រោម៣៥ឆ្នាំ។

លោក Dato’ Seri Dr. Amad Zahid Hamidi បានចែករំលែកបទពិសោធន៍ថា ប្រទេសម៉ាឡេស៊ី បានកែប្រែវិធីសាស្ត្រ ក្នុងការស្ដារនីតិសម្បទាអ្នកញៀនគ្រឿងញៀន ដោយប្រើវិធីសាស្ដ្របន្សាប តាមរយៈលើកកម្ពស់ផ្លូវអារម្មណ៍របស់អ្នកញៀនគ្រឿងញៀន និងបណ្ដុះបណ្ដាលពួកគេឲ្យមានជំនាញវិជ្ជាជីវៈ ដើម្បីអាចចូលរួមក្នុងសង្គមវិញ និងកំណត់ឲ្យស្ថិតក្រោមការគ្រប់គ្រងរបស់ក្រុមប្រឹក្សាការងារម៉ាឡេស៊ី។

បន្ថែមពីនេះ ឧបនាយករដ្ឋមន្ដ្រី នេត សាវឿន បានស្នើម៉ាឡេស៉ី បន្ដទំនាក់ទំនងគ្នាទៅវិញទៅមក ក្នុងការរួមចំណែកប្រយុទ្ធប្រឆាំងគ្រឿងញៀន និងផ្លាស់ប្ដូរគណៈប្រតិភូគ្នា សំដៅចែករំលែកបទពិសោធន៍លើការងារប្រយុទ្ធប្រឆាំងគ្រឿងញៀន។ លើសពីនេះ លោកសន្ដិបណ្ឌិត ឧបនាយករដ្ឋមន្ដ្រី ក៏បានស្នើដល់ម៉ាឡេស៉ី ផ្ដល់ជំនួយជាបទពិសោធន៍ និងបច្ចេកទេស ដល់ប្រទេសកម្ពុជាផងដែរ។

ជាការឆ្លើយតប លោក Dato’ Seri Dr. Amad Zahid Hamidi បានឯកភាពតាមការលើកឡើងរបស់លោកសន្ដិបណ្ឌិត នេត សាវឿន ឧបនាយករដ្ឋមន្ដ្រី ពិសេសឯកភាពចំពោះការបន្ដកិច្ចសហប្រតិបត្តិការលើការងារប្រយុទ្ធប្រឆាំងគ្រឿងញៀន ព្រមទាំងការស្ដារនីតិសម្បទាអ្នកញៀនគ្រឿងញៀន និងបានយល់ឃើញដូចគ្នាថា អ្នកប្រើប្រាស់គ្រឿងញៀន គឺសុទ្ធតែជាជនរងគ្រោះ៕