(ភ្នំពេញ)៖ រដ្ឋាភិបាលកូរ៉េខាងត្បូង បានផ្តល់ជំនួយឥតសំណង២០លានដុល្លារ ចូលរួមអភិវឌ្ឍសហគមន៍ជនបទក្នុងខេត្តចំនួន៣ជាប់ព្រំដែនប្រទេសថៃរួមមាន ប៉ៃលិន បាត់ដំបង និងបន្ទាយមានជ័យ។

សហគមន៍ជនបទបានក្លាយជាគំរូនៃភាពធន់ និងការកែប្រែថ្មី ដោយសារកិច្ចសហ​ការ និងការយល់ដឹងរបស់គម្រោង «ភូមិសន្តិភាព» គាំទ្រជំនួយឥត​សំណង​ប្រមាណ ២០លានដុល្លារពីសាធារណៈរដ្ឋកូរ៉េ គ្រប់គ្រងដោយទីភ្នាក់ងារ​សហប្រតិបត្តិការអន្តរ​ជាតិកូរ៉េ (KOICA) បានអនុវត្តន៍កម្មវិធីដូចខាងក្រោម៖

+ គំនិតផ្តួចផ្តើមគម្រោងភូមិសន្តិភាព៖

ក្រោមកម្មវិធី​ឧបត្ថម្ភ​របស់​រដ្ឋា​ភិបាល​កូរ៉េ គំនិតផ្តួច​ផ្តើមភូមិសន្តិភាព មានគម្រោង​ពីរ​ដែលផ្តោតលើខេត្តបាត់ដំបង បន្ទាយមានជ័យ និង​ប៉ៃលិន ដែលជាខេត្តគោលដៅ​សំខាន់ៗ​នៅភាគពាយ័ព្យនៃប្រទេសកម្ពុជា។

គម្រោងទីមួយបានចាប់ផ្តើមនៅឆ្នាំ២០២១ ផ្តោតលើការបោសសម្អាតមីន និង​ជំនួយ​ដល់ជនរងគ្រោះ ដោយសហការជាមួយអាជ្ញាធរកម្ពុជា គ្រប់គ្រងសកម្មភាព​កំចាត់​មីន និងសង្គ្រោះជនពិការដោយសារមីន (CMAA) ដើម្បីធ្វើឱ្យដីមានសុវត្ថិភាព​សម្រាប់​ការរស់នៅ និងការដាំដុះ។ គម្រោងទីពីរបានចាប់ផ្តើមនៅឆ្នាំ២០២២ ដោយ​មាន​កិច្ចសហការជាមួយក្រសួងអភិវឌ្ឍន៍ជនបទ (MRD) ដើម្បីអនុវត្តការកែលម្អ​ហេដ្ឋារចនាសម្ព័ន្ធជនបទឱ្យបានទូលំទូលាយ ការបង្កើនប្រាក់ចំណូលតាមរយៈ​កសិ​កម្ម និងការកសាងសមត្ថភាពសហគមន៍។

+ កិច្ចសហការរវាងសន្តិភាព និងការអភិវឌ្ឍន៍៖ វិធីសាស្រ្តដ៏មានប្រសិទ្ធភាព

គំនិត​ផ្តួចផ្តើមរបស់រដ្ឋាភិបាលកូរ៉េនេះ អនុវត្តវិធីសាស្ត្រ «ការផ្សារភ្ជាប់រវាងសន្តិភាព និងការអភិវឌ្ឍន៍» ដែលទទួលស្គាល់ថាសន្តិភាពយូរអង្វែង មិនអាចកាត់ផ្តាច់ពីវិបុល ភាព ការលើកកម្ពស់សមត្ថភាពសហគមន៍ និងការគ្រប់គ្រងដែនដីប្រកបដោ​យ​ប្រសិទ្ធ​​ភាពនោះទេ។

ខាងក្រោមនេះ គឺជាសសរស្តម្ភសំខាន់ៗទាំងបីនៃទស្សនៈវិជ្ជារបស់គំនិតផ្តួចផ្តើមនេះ៖
* ការអភិវឌ្ឍគ្រប់ជ្រុងជ្រោយតាមខ្សែស្រប៖ ការបោសសម្អាតមីន និងការស្តារដី​គ្រោះ​ថ្នាក់ គឺត្រូវ​បានរួមបញ្ចូលគ្នាយ៉ាងរលូនជាមួយ​ការអភិវឌ្ឍ​ហេដ្ឋារចនាសម្ព័ន្ធ​សំខាន់​ៗ។ ប្រព័ន្ធធារាសាស្ត្រ និងផ្លូវថ្នល់ត្រូវបានបង្កើតឡើងយ៉ាងឆាប់រហ័ស បន្ទាប់ពី​ប្រតិ​បត្តិការបោសសម្អាតមីន ដើម្បីធ្វើឱ្យដីមានសុវត្ថិភាព ហើយអាចប្រើប្រាស់សម្រាប់​ផលិត​កម្មបានភ្លាមៗ។ ដូចគ្នានេះដែរ ការរៀបចំប្រព័ន្ធបន្សុទ្ធទឹកស្អាតក្នុងសហគមន៍ សាលាមត្តេយ្យសិក្សា និងមណ្ឌលសុខភាព អាចដោះស្រាយបញ្ហា​ចាំបាច់និងតម្រូវ​ការ​យូរអង្វែង ព្រមទាំងធានាថា សុវត្ថិភាពជាកាតាលីករចំពោះភាពលូតលាស់​ដែល​ឈានទៅដល់ភាពមានស្ថេរភាពដ៏រឹងមាំ។

* ការអភិវឌ្ឍគ្រប់ជ្រុងជ្រោយតាមខ្សែបញ្ឈ៖ វឌ្ឍនភាព ត្រូវតែធ្វើឡើងស្របគ្នាជា​មួយ​នឹងការវិនិយោគលើធនធានមនុស្ស និងស្ថាប័ន។ វិធីសាស្រ្តរបស់ទីភ្នាក់ងារកយកា គឺពង្រឹងសមត្ថភាពមូលដ្ឋានតាមរយៈការបណ្តុះបណ្តាលជាក់លាក់ស្តីពីអភិបាលកិច្ចភូមិដ្ឋានការគ្រប់គ្រងគម្រោងដែលជំរុញដោយភូមិ និងផ្ថល់ចំណេះដឹង​ផ្នែកហិរញ្ញវត្ថុ​របស់​សហគមន៍។ ការបង្កើតគណៈកម្មាធិការគ្រប់គ្រងទឹក ក្រុមប្រឹក្សាសហគមន៍ និង​ពង្រឹងសមត្តិភាពគណៈកម្មាធិការអភិវឌ្ឍន៍ភូមិ (VDCs) ធ្វើឱ្យប្រជាពលរដ្ឋក្លាយ​ជា​ម្ចាស់នៃការអភិវឌ្ឍន៍សហគមន៍របស់ពួកគេ។ រចនាសម្ព័ន្ធទាំងនេះ គឺជាឆ្អឹងខ្នង​នៃ​គណ​នេយ្យភាព និងនិរន្តរភាព ដែលអាចឱ្យសហគមន៍កំណត់ទិសដៅផ្ទាល់ខ្លួន លើស​ពីការគាំទ្រពីខាងក្រៅ។

* វិធីសាស្ត្រដែលដឹកនាំដោយសហគមន៍៖ ភាពជោគជ័យនៃគម្រោងនេះ គឺអាស្រ័យ លើ​ការចូលរួមយ៉ាងសកម្មរបស់ប្រជាពលរដ្ឋក្នុងមូលដ្ឋាន។ ទីភ្នាក់ងារកយកា ផ្ដល់​ការ​សម្របសម្រួលលើតម្រូវការ កិច្ចសហការ និងការវាយតម្លៃ​សមត្ថភាព​ជាមួយនឹង​ប្រជា​ពលរដ្ឋ ដែលជួយជំរុញអន្តរាគមន៍ក្នុងការអភិវឌ្ឍភូមិ។ សម្រាប់វិធីសាស្រ្តនេះ ចាប់​តាំងពីការកំណត់តម្រូវការរបស់សហគមន៍ រហូតដល់ការអនុវត្ត ភូមិអាចស្វែង​រក​តម្រូវការរបស់ពួកគេ ហើយអនុវត្តគម្រោងដោយខ្លួនឯង ដូច្នេះវាជួយជំរុញ​ភាពជា​ម្ចាស់ ការទទួលខុសត្រូវរួម និងសាមគ្គីភាពសង្គមដ៏រឹងមាំនៅក្នុងសហគមន៍។

+ ការ​ផ្លាស់​ប្តូរនៅក្នុងសហគមន៍៖ ហេដ្ឋារចនាសម្ព័ន្ធជនបទ ជីវភាពរស់នៅ សុខុមាល​ភាព​សង្គម និងបរិយាកាសធុរកិច្ច

ផលជះនៃគម្រោង​អភិវឌ្ឍន៍​ចម្រុះនេះ បានធ្វើឱ្យ​មាន​ការផ្លាស់ប្តូរគួរឱ្យកត់សម្គាល់ ដែលប្រជាពលរដ្ឋក្នុង​តំបន់បាន​ទទួលស្គាល់​យ៉ាង​ពិតប្រកដ។ ខាងក្រោមនេះ​គឺជាសមិទ្ធផលនានាដែលគម្រោងបានបង្កើតឡើង៖

* សុវត្ថិភាពក្នុងការរស់នៅ និងទទួលយកសេវានានា៖ ការបោសសម្អាតមីនលើផ្ទៃដី​ជា​ច្រើនហិកតា បានបើកច្រកសម្រាប់ការដាំដុះ និងការតាំងទីលំនៅ។ ការ​លើក​កម្ពស់​គុណភាពផ្លូវថ្នល់ និងប្រព័ន្ធធារាសាស្រ្ត បានតភ្ជាប់ភូមិដាច់ស្រយាលនានា ជាមួយ​មណ្ឌល​ស្រុក និងទីផ្សារ ដែលកាត់បន្ថយពេលវេលាធ្វើដំណើរ និងលើកកម្ពស់​ជីវិត​ប្រចាំថ្ងៃរបស់គ្រួសាររាប់ពាន់ខ្នងផ្ទះ។

* សុខភាព និងអនាម័យកាន់តែប្រសើរឡើង៖ ការសាងសង់មណ្ឌលសុខភាពថ្មី ដូច​ជានៅក្នុងស្រុកម៉ាឡៃ នឹងនាំឱ្យសេវាសុខាភិបាលមូលដ្ឋានខិតទៅជិត​លំនៅដ្ឋាន​ប្រជា​ពលរដ្ឋដែលជាអ្នកត្រូវការសេវា និងធានាបាននូវការផ្គត់ផ្គង់ទឹកស្អាតដែលមាន​ស្ថិរ​ភាព​​សម្រាប់ការទទួលទាន ព្រមទាំងធ្វើឱ្យសុខុមាលភាពកាន់តែប្រសើរ និងកាត់​បន្ថយ​ភាពងាយរងគ្រោះ។

* ពង្រឹងសេវាផ្សព្វផ្សាយកសិកម្ម៖ កិច្ចសហការរបស់ទីភ្នាក់ងារកយការជាមួយដៃគូ បច្ចេកទេស ដូចជាអង្គការភ្នាក់ងារអភិេវឌ្ឍន៍សេដ្ឋកិច្ច និងកសិកម្មជនបទ (REA​DA) ដែលជាអង្គការក្រៅរដ្ឋាភិបាលក្នុងស្រុកមានមូលដ្ឋាននៅខេត្តសៀមរាប បាននាំ​មកនូវវិធីសាស្រ្តកសិកម្មទំនើបដល់កសិករគ្រប់រូប សូម្បីតែអ្នកផលិតខ្នាតតូចបំផុត។ ការ​បណ្តុះបណ្តាលគ្របដណ្តប់លើការដាំដុះដំណាំ ការគ្រប់គ្រងសត្វល្អិតចង្រៃ ការ​គ្រប់​គ្រងផលដំណាំ និងការទទួលបានទីផ្សារ។ សហគមន៍កសិករត្រូវបានពង្រឹង​ដោយ​ការរៀបចំកិច្ចសន្យាកសិកម្ម និងការបង្កើតមជ្ឈមណ្ឌលប្រមូលផ្តុំថ្មី ដែលពេល​នេះ​អនុញ្ញាតឱ្យកសិករខ្នាតតូចអាចជ្រៀតចូលទៅកាន់ទីផ្សារបានយ៉ាងទូលំទូលាយ បង្កើន​ប្រាក់ចំណូលគ្រួសារ និងអភិវឌ្ឍសេដ្ឋកិច្ចកសិកម្មប្រកបដោយភាពធន់។ កសិ​ករម្នាក់បានចែករំលែកថា «នៅទីនេះ យើងមានដី ឧបករណ៍ថ្មីៗ និងសហ​គមន៍ដ៏​រួប​រួមមួយ។ ការបណ្តុះបណ្តាលផ្នែកកសិកម្មអនុញ្ញាតឱ្យយើងរកប្រាក់ចំណូល និងរៀន​សូត្របន្ថែម ហើយពួកយើងកាន់តែរឹងមាំជាមួយគ្នាជាងពេលណាៗទាំងអស់»។

* ការពង្រឹងភាពជាដៃគូនៅក្នុងវិស័យឧស្សាហកម្មនិងក្រុមអ្នកស្រាវជ្រាវ៖ ការគាំទ្រ របស់ទីភ្នាក់ងារកយកា សម្រាប់សាកលវិទ្យាល័យក្នុងស្រុក ដូចជាសាកលវិទ្យាល័យ ជាតិបាត់ដំបង (NUBB) និងសាកលវិទ្យាល័យជាតិមានជ័យ តាមរយៈការពង្រឹង សមត្ថភាពស្រាវជ្រាវ បានជំរុញកិច្ចសហការយ៉ាងសកម្មរវាងឧស្សាហកម្មកសិកម្ម និង​ក្រុមអ្នកស្រាវជ្រាវ។ ឧទាហរណ៍ជាក់ស្តែងមួយ គឺការស្រាវជ្រាវស៊ីជម្រៅ​របស់​សាកល​វិទ្យាល័យទៅលើប្រសិទ្ធភាពលើការអនុវត្តកសិកម្មល្អ (CamGAP) ដែល​ជាប្រព័ន្ធធានាសុវត្ថិភាពម្ហូបអាហារជាតិរបស់កម្ពុជាសម្រាប់វិស័យកសិកម្ម ដែលមាន​ប្រសិទ្ធ​ភាពចំពោះកសិករខ្នាតតូច។

* ការលើកទឹកចិត្តដល់អាជីវកម្មបង្កើតថ្មី (Startup) ក្នុងស្រុក៖ តាមរយៈការចូលរួម ក្នុងមូលនិធិរួមសម្រាប់មជ្ឈមណ្ឌលបណ្តុះអាជីវកម្មបង្កើតថ្មីក្នុងវិស័យកសិកម្មជាមួយសាកលវិទ្យាល័យជាតិបាត់ដំបង (NUBB) និង Khmer Enterprise ក្រុមនិស្សិត​មួយចំនួនបានទទួលឱកាសដើម្បីបង្ហាញគំនិតអាជីវកម្មរបស់ពួកគេ។ លើសពីនេះ ដំណើរទស្សនកិច្ចសិក្សាទៅកាន់ទីតាំងគម្រោងកសិកម្មដែលគាំទ្រដោយ ទីភ្នាក់ងារ​កយ​ការ ត្រូវបានរៀបចំឡើងសម្រាប់អ្នកទទួលបានពានរង្វាន់ ដើម្បីផ្តល់ឱ្យពួក​គេនូវ​ឱកាសដ៏ពិសេសមួយដើម្បីសង្កេតមើលដោយផ្ទាល់ពីដំណើរការរីកចម្រើន និងការ​អភិ​វឌ្ឍន៍​របស់អាជីវកម្មបង្កើតថ្មីពិតប្រាកដ។

+ ការពង្រឹង​សមត្ថភាព និងសាមគ្គីភាពសង្គម

គន្លឹះនៃប្រសិទ្ធភាពរបស់គម្រោងភូមិសន្តិភាព គឺផ្តោតលើមូលធនសង្គម និងភាពជា​អ្នកដឹកនាំក្នុងមូលដ្ឋាន។ អ្នកតំណាងសហគមន៍ដែលត្រូវបានជ្រើសរើស ត្រួតពិនិត្យ​ការ​បែងចែកដីធ្លី ការថែទាំហេដ្ឋារចនាសម្ព័ន្ធ និងការដោះស្រាយវិវាទក្នុងសហគមន៍។ សិក្ខាសាលាកសាងសមត្ថភាពជាទៀងទាត់បានផ្តល់ឱ្យគណៈកម្មាធិការទាំងនេះនូវឧបករណ៍ ដើម្បីគ្រប់គ្រងបញ្ហាប្រឈមដ៏ស្មុគស្មាញ ធានាការដាក់បញ្ចូល និងរៀបចំ​ផែន​ការសម្រាប់ការរីកចម្រើននាពេលអនាគត។ អ្វីដែលសំខាន់នោះ គំរូទាំងនេះ​ជួយ​រក្សាគ្រួសារឱ្យនៅជាមួយគ្នា និងពង្រឹងសមត្ថភាពយុវជន និងស្ត្រី ដែលជួយដល់​ការ​ពង្រឹងរចនាសម្ព័ន្ធសង្គមបន្ថែមទៀត។

លោកស្រី Choi Moon Jung នាយិកាការិយាល័យ ទីភ្នាក់ងារកយកាប្រចាំប្រទេស​កម្ពុជា បានបរិយាយអំពីគំនិតផ្តួចផ្តើមនេះថា «ជាមូលដ្ឋានគ្រឹះសម្រាប់ភាព​ធន់​របស់​សហគមន៍ និងវឌ្ឍនភាពយូរអង្វែង។ តាមរយៈការតភ្ជាប់សន្តិភាព ការអភិវឌ្ឍន៍ និង​អភិបាលកិច្ចមូលដ្ឋានដែលមានសមត្ថភាព យើងជួួយជំរុញឱ្យភូមិ​ឆ្ពោះទៅ​រក​អនា​គត​ដ៏ភ្លឺស្វាងប្រកបដោយទំនុកចិត្ត»។

+ ផលជះជាតួលេខ

* ផ្ទៃដីចម្ការមីន ៦៣គីឡូម៉ែត្រក្រឡា ស្ថិតនៅភាគពាយ័ព្យនៃប្រទេសកម្ពុជា ត្រូវបាន​បោសសម្អាត និងផ្លាស់ប្តូរទៅជាដីកសិកម្មប្រកបដោយ​ផលិតភាព​សម្រាប់ប្រជា​ពល​រដ្ឋជាង ២០០,០០០នាក់។
* ជនរងគ្រោះដោយសារមីន ៥១៥ នាក់ បានទទួលការបណ្តុះបណ្តាលវិជ្ជាជីវៈ
* គ្រួសារជាង ២,៤០០ នៅទូទាំងភូមិគោលដៅចំនួន៣០ បានទទួលការគាំទ្រ ដោយផ្ទាល់សម្រាប់ការបង្កើតប្រាក់ចំណូល និងការកែលម្អហេដ្ឋារចនាសម្ព័ន្ធ។
* រៀបចំកិច្ចប្រជុំជុំវិញវិស័យកសិកម្មជាមួយអ្នកពាក់ព័ន្ធចំនួន ១០០លើក ដែលមាន​ដូចជា កសិករ ឈ្មួញកណ្តាល អ្នកចែកចាយ និងអ្នកលក់រាយ។
* គាំទ្រការត្រួតពិនិត្យគុណភាពទឹកចំនួន ៦០០ដង ដោយមន្ទីរ​អភិវឌ្ឍន៍​ជនបទ​ខេត្ត។

+ សេចក្តីសន្និដ្ឋាន៖ គំរូអភិវឌ្ឍន៍ជនបទថ្មី

ការគាំទ្រដ៏ទូលំទូលាយរបស់​រដ្ឋា​ភិបាលកូរ៉េនៅភាគពាយ័ព្យនៃប្រទេសកម្ពុជា បាន​ត្រួសត្រាយផ្លូវសម្រាប់ការរៀបចំគំរូនៃការអភិវឌ្ឍន៍សហគមន៍ជនបទប្រកបដោយប្រសិទ្ធិភាព។ សេចក្តីប្រកាសរបស់ក្រសួងអភិវឌ្ឍន៍ជនបទ (MRD) កាលពីពេល​ថ្មីៗ​នេះ ស្តីពីគោលនយោបាយ «ភូមិគំរូ» នៅទូទាំងប្រទេស គឺបានមកពីសមិទ្ធផល​នៃ​គំនិត​ផ្តួចផ្តើមនេះ។ នៅពេលគម្រោងនេះនឹងត្រូវបញ្ចប់នៅឆ្នាំ២០២៦ ការគាំទ្រកម្រិត​គោលនយោបាយទាន់ពេលវេលាពីសំណាក់រដ្ឋាភិបាលកម្ពុជា អាចជាកត្តាជំរុញ​ឱ្យ​មាន​ការអភិវឌ្ឍន៍ជនបទនៅទូទាំងប្រទេសកម្ពុជា៕