(ភ្នំពេញ)៖ តើអ្នកដឹងទេថា មានប្រទេសមួយចំនួនលើពិភពលោក ដែលចំនួនប្រជាជនស្ត្រីច្រើនជាងបុរសយ៉ាងគួរឱ្យកត់សម្គាល់? ក្នុងចំណោមនោះ ប្រទេសនៅអឺរ៉ុបខាងកើត និងអតីតសហភាពសូវៀត មានវត្តមានច្រើនជាងគេ។

យោងតាមការប៉ាន់ប្រមាណប្រជាជនឆ្នាំ២០២៦ (គិត្រឹមខែកក្កដា) ដែលផ្អែកលើទិន្នន័យរបស់អង្គការសហប្រជាជាតិ ប្រទេសឯករាជ្យទាំង១០ ដែលមានសមាមាត្រស្ត្រីខ្ពស់ជាងគេ រួមមាន៖

*១. ម៉ុលដាវី៖ មានបុរស ១,៣៦១,២៨២នាក់ និងស្ត្រី ១,៥៩៩,៩៧២នាក់។ ស្ត្រីលើសបុរស ២៣៨,៦៩០នាក់។

*២. រុស្ស៊ី៖ មានបុរស ៦៦,៤៥៩,២៥០នាក់ និងស្ត្រី ៧៦,៩៣៥,២០៨នាក់។ ស្ត្រីលើសបុរស ១០,៤៧៥,៩៥៨នាក់។

*៣. អាមេនី៖ មានបុរស ១,៣៥៩,៥៣៤នាក់ និងស្ត្រី ១,៥៧១,៣៨១នាក់។ ស្ត្រីលើសបុរស ២១១,៨៤៧នាក់។

*៤. ឡាតវី៖ មានបុរស ៨៥២,៨៥២នាក់ និងស្ត្រី ៩៨៣,០៨៣នាក់។ ស្ត្រីលើសបុរស ១៣០,២៣១នាក់។

*៥. អ៊ុយក្រែន៖ មានបុរស ១៨,៤០៦,៤៣៤នាក់ និងស្ត្រី ២១,១២៩,៤១៤នាក់។ ស្ត្រីលើសបុរស ២,៧២២,៩៨០នាក់។

*៦. បេឡារុស៖ មានបុរស ៤,១៦២,៦៨៥នាក់ និងស្ត្រី ៤,៧៧៤,៣៣៣នាក់។ ស្ត្រីលើសបុរស ៦១១,៦៤៨នាក់។

*៧. ហ្សកហ្ស៊ី៖ មានបុរស ១,៧៧៤,៧០៦នាក់ និងស្ត្រី ២,០២៩,៩៣៥នាក់។ ស្ត្រីលើសបុរស ២៥៥,២២៩នាក់។

*៨. តុងហ្គា៖ មានបុរស ៤៨,៧៧៥នាក់ និងស្ត្រី ៥៤,៥១៦នាក់។ ស្ត្រីលើសបុរស ៥,៧៤១នាក់។

*៩. លីទុយអានី៖ មានបុរស ១,៣២១,៧០៨នាក់ និងស្ត្រី ១,៤៧៥,៦៣០នាក់។ ស្ត្រីលើសបុរស ១៥៣,៩២២នាក់។

*១០. ស៊ែប៊ី៖ មានបុរស ៣,១៤៥,៧២៨នាក់ និងស្ត្រី ៣,៤៩៦,២៣៦នាក់។ ស្ត្រីលើសបុរស ៣៥០,៥០៨នាក់។

ហេតុអ្វីបានជាស្ត្រីមានចំនួនច្រើនជាងបុរស?

មូលហេតុសំខាន់មួយ គឺស្ត្រីមានអាយុសង្ឃឹមរស់ជាមធ្យមវែងជាងបុរស។ ជាពិសេស នៅប្រទេសមួយចំនួននៃអឺរ៉ុបខាងកើត គម្លាតអាយុសង្ឃឹមរស់រវាងបុរស និងស្ត្រីមានកម្រិតខ្ពស់។

ក្រៅពីនេះ កត្តាដូចជា អត្រាមរណភាពរបស់បុរស បញ្ហាសុខភាព ការប្រើប្រាស់គ្រឿងស្រវឹង គ្រោះថ្នាក់ សង្គ្រាម និងការធ្វើចំណាកស្រុក ក៏អាចជះឥទ្ធិពលដល់សមាមាត្រប្រជាជនតាមភេទផងដែរ។

គួរបញ្ជាក់ថា ចំនួនស្ត្រីច្រើនជាងបុរសក្នុងប្រជាជនសរុប មិនមានន័យថាស្ត្រីមានចំនួនច្រើនជាងបុរសក្នុងគ្រប់ក្រុមអាយុនោះទេ។ ជាទូទៅ ទារកប្រុសមានចំនួនច្រើនជាងទារកស្រីបន្តិច ប៉ុន្តែភាពខុសគ្នាអាចប្រែប្រួលនៅពេលឈានដល់វ័យចំណាស់៕

ប្រភព៖ United Nations, World Population Prospects 2024 និង World Population Pyramid (ការប៉ាន់ប្រមាណឆ្នាំ២០២៦)