(ភ្នំពេញ)៖ ការសិក្សាស្រាវជ្រាវវេជ្ជសាស្ត្រជាច្រើន បានឲ្យដឹងថា កាហ្វេជួយចំពោះខ្លាញ់រុំថ្លើម និងការពារមហារីកថ្លើម។

ការសិក្សាស្រាវជ្រាវវេជ្ជសាស្ត្រ ដែលបញ្ជាក់ពីផលប្រយោជន៍នេះ រួមមាន៖

១៖ ការសិក្សារបស់សាកលវិទ្យាល័យ Southampton (ចក្រភពអង់គ្លេស)
ការសិក្សាដ៏ធំមួយដែលបានវិភាគលើទិន្នន័យមនុស្សជាង ៤៩០,០០០ នាក់ ពី UK Biobank បានរកឃើញថា អ្នកដែលញ៉ាំកាហ្វេ (មិនថាជាតិកាហ្វេអ៉ីនធម្មតា ឬ Decaf ឡើយ) មានការកាត់បន្ថយហានិភ័យនៃការកើតជំងឺខ្លាញ់រុំថ្លើម និងជំងឺថ្លើមរ៉ាំរ៉ៃរហូតដល់ ២០% និងកាត់បន្ថយអត្រាស្លាប់ដោយសារជំងឺថ្លើមរហូតដល់ ៤៩% បើធៀបនឹងអ្នកមិនញ៉ាំកាហ្វេ។

២៖ ការសិក្សាបែប Meta-Analysis ក្នុងទស្សនាវដ្តី Gastroenterology
ការចងក្រងទិន្នន័យនៃការសិក្សាជាច្រើនបានបង្ហាញថា ការញ៉ាំកាហ្វេជាប្រចាំមានទំនាក់ទំនងយ៉ាងខ្លាំងទៅនឹងការថយចុះនៃសភាពក្រិនថ្លើម (Liver Fibrosis) ចំពោះអ្នកដែលមានជំងឺខ្លាញ់រុំថ្លើមប្រភេទមិនមែនមកពីគ្រឿងស្រវឹង (NAFLD)។

៣៖ សារធាតុសំខាន់ៗដែលត្រូវបានរកឃើញដោយអ្នកវិទ្យាសាស្ត្រ
អ្នកស្រាវជ្រាវបានបង្ហាញថា អត្ថប្រយោជន៍នេះមិនមែនបានមកពីជាតិកាហ្វេអ៉ីន (Caffeine) តែមួយមុខនោះទេ ប៉ុន្តែវាបានមកពីសារធាតុផ្សេងទៀតដូចជា៖

*Chlorogenic Acid: សារធាតុប្រឆាំងអុកស៊ីតកម្មដ៏ខ្លាំងក្លា ជួយកាត់បន្ថយការរលាក និងភាពស៊ាំនឹងអាំងស៊ុយលីន (Insulin Resistance)។

*Kahweol និង Cafestol: ជួយជម្រុញដល់ការផលិតសារធាតុ Glutathione ដែលជាសារធាតុបន្សាបជាតិពុលដ៏សំខាន់នៅក្នុងថ្លើម៕