FN KH App Logo
Fresh News
FN MEDIA CO., LTD.
GET -- on the App Store
INSTALL

លោក ត្រាំ ថាកិច្ចប្រជុំកំពូលជាមួយលោក ស៊ី និងលោក ពូទីន កំពុង «បង្កើតប្រវត្តិសាស្ត្រ»

19-11-2026 19:10

(សិនជិន)៖ ប្រធានាធិបតីចិន សហរដ្ឋអាមេរិក និងរុស្ស៊ី បានបើកកិច្ចប្រជុំកំពូលត្រីភាគីដែលមិនធ្លាប់មានពីមុនមកនៅប្រទេសចិន នាថ្ងៃព្រហស្បតិ៍នេះ ដោយលោក ដូណាល់ ត្រាំ បានអះអាងថា មេដឹកនាំទាំង ៣ កំពុង «បង្កើតប្រវត្តិសាស្ត្រ»។ នេះបើតាមការចេញផ្សាយដោយទីភ្នាក់ងារសារព័ត៌មាន AFP។

កិច្ចប្រជុំបិទទ្វារនៅវិមាន Kylin ក្នុងទីក្រុងសិនជិន រវាងលោក ត្រាំ លោក ស៊ី ជីនពីង និងលោក វ្ល៉ាឌីមៀ ពូទីន នៅក្រៅវេទិកាកិច្ចប្រជុំកំពូល APEC បានបញ្ចប់ទៅក្រោយរយៈពេល ១ ម៉ោង ២០ នាទី ដោយនៅពេលចាប់ផ្ដើម មេដឹកនាំទាំង ៣ បានថ្លែងបើកពាក់ព័ន្ធនឹងបញ្ហាសំខាន់ៗរួមមានអាវុធនុយក្លេអ៊ែរ សន្តិសុខស្បៀង ថាមពល និងសង្គ្រាមនៅអ៊ុយក្រែន។ លោក ត្រាំ បានគូសបញ្ជាក់ថា «ក្នុងនាមជាមហាអំណាចនុយក្លេអ៊ែរធំជាងគេទាំង ៣ លើពិភពលោក សហរដ្ឋអាមេរិក រុស្ស៊ី និងចិន ស្ថិតក្នុងជំហរពិសេសដើម្បីពិភាក្សាពីការកាត់បន្ថយចំនួនអាវុធនុយក្លេអ៊ែរលើផែនដី» ខណៈលោក ស៊ី បានអំពាវនាវឱ្យរួមគ្នា «ការពារសន្តិភាព និងស្ថិរភាពពិភពលោក» ហើយលោក ពូទីន បានលើកឡើងថា «ប្រទេសយើងទាំង ៣ មានផលប្រយោជន៍ស្របគ្នាជាច្រើនក្នុងការដោះស្រាយជម្លោះតំបន់ រួមទាំងជម្លោះនៅអ៊ុយក្រែន»។ ទោះជាយ៉ាងណា អ្នកវិភាគរំពឹងថាកិច្ចប្រជុំនេះផ្ដោតលើនិមិត្តរូបជាងលទ្ធផលជាក់ស្ដែង ហើយក្រុមអ្នករិះគន់ រួមទាំងមេដឹកនាំគណបក្សប្រជាធិបតេយ្យព្រឹទ្ធសភាអាមេរិក លោក ឆាក់ ស្ហ៊ូមើ (Chuck Schumer) បានព្រមានថា ជំនួបនេះផ្ដល់វេទិកាឱ្យលោក ពូទីន ធ្វើឱ្យសង្គ្រាមឈ្លានពានអ៊ុយក្រែនមើលទៅដូចជាស្របច្បាប់។

គួរបញ្ជាក់ថា មុនជំនួបត្រីភាគីនេះ លោក ត្រាំ និងលោក ពូទីន បានជួបពិភាក្សាទ្វេភាគីជាលើកដំបូងចាប់តាំងពីខែសីហា ឆ្នាំ២០២៥ មក ហើយលោក ត្រាំ ក៏បានជួបជាមួយលោក ស៊ី ជាលើកទី ៣ ក្នុងឆ្នាំនេះផងដែរ បន្ទាប់ពីលោក ស៊ី បានបំបែកពិធីការទូតអស់ជាច្រើនទសវត្សរ៍ ដោយចេញទៅទទួលស្វាគមន៍លោក ត្រាំ ផ្ទាល់នៅឯព្រលានយន្តហោះ។ ចំណែកសំណុំរឿងកាត់បន្ថយអាវុធនុយក្លេអ៊ែរវិញ ទីក្រុងប៉េកាំងនៅតែប្រកាន់ជំហរថា អាមេរិក និងរុស្ស៊ីត្រូវតែកាត់បន្ថយឃ្លាំងអាវុធនុយក្លេអ៊ែរដ៏ធំរបស់ខ្លួនជាមុនសិន បន្ទាប់ពីសន្ធិសញ្ញានុយក្លេអ៊ែរទ្វេភាគីរវាងទីក្រុងវ៉ាស៊ីនតោន និងទីក្រុងមូស្គូបានផុតកំណត់កាលពីខែកុម្ភៈ៕