លោក ត្រាំ ថាអាចនឹងជួបមេដឹកនាំកូរ៉េខាងជើង លោក គីម ជុងអ៊ុន នៅប្រទេសចិន
16-11-2026 23:02
(វ៉ាស៊ីនតោន)៖ ប្រធានាធិបតីអាមេរិក លោក ដូណាល់ ត្រាំ បានថ្លែងនៅថ្ងៃចន្ទនេះថា លោកអាចនឹងជួបជាមួយមេដឹកនាំកូរ៉េខាងជើង លោក គីម ជុងអ៊ុន នៅប្រទេសចិន ក្នុងអំឡុងដំណើរទស្សនកិច្ចរបស់លោកមកកាន់តំបន់អាស៊ីបូព៌ានាសប្ដាហ៍នេះ ដែលនឹងធ្វើដំណើរឆ្លងកាត់ប្រទេសហ្វីលីពីន និងចិន។ នេះបើតាមការចេញផ្សាយដោយទីភ្នាក់ងារសារព័ត៌មាន Reuters។
ថ្លែងប្រាប់អ្នកសារព័ត៌មាននៅសេតវិមានមុនពេលចេញដំណើរ លោក ត្រាំ បានបង្ហើបដូច្នេះថា «លោកប្រធានាធិបតី ស៊ី ជីនពីង បានមកទីនេះកាលពីមួយខែមុន ហើយយើងក៏នឹងជួបជាមួយប្រធានាធិបតីរុស្ស៊ី លោក វ្ល៉ាឌីមៀ ពូទីន ដែរ ហើយយើងក៏អាចនឹងជួបលោក គីម ជុងអ៊ុន ផងដែរ... ដូច្នេះវានឹងជារឿងល្អ» ដោយលោកបញ្ជាក់ថាជំនួបណាមួយជាមួយលោក គីម នឹងធ្វើឡើងនៅប្រទេសចិន។
គួរបញ្ជាក់ថា ការប្រកាសដ៏គួរឱ្យភ្ញាក់ផ្អើលនេះកើតឡើងខណៈកន្លងមក មន្ត្រីជាន់ខ្ពស់អាមេរិកធ្លាប់អះអាងថាលោក ត្រាំ មិនទាន់មានផែនការបន្ទាន់ដើម្បីជួបមេដឹកនាំកូរ៉េខាងជើងនៅឡើយទេ ទោះបីជាលោកធ្លាប់បង្ហាញចំណាប់អារម្មណ៍ចង់ជួបម្ដងទៀតក្នុងអាណត្តិបច្ចុប្បន្នក៏ដោយ។ ក្នុងអាណត្តិទី១ របស់លោកចន្លោះឆ្នាំ២០១៧ ដល់ឆ្នាំ២០២១ លោក ត្រាំ ធ្លាប់ជួបលោក គីម ជុងអ៊ុន ចំនួន ៣លើក រួមទាំងជំនួបនៅតំបន់គ្មានកងទ័ពរវាងកូរ៉េទាំងពីរផងដែរ ខណៈក្នុងសប្ដាហ៍នេះ លោកក៏គ្រោងជួបប្រជុំត្រីភាគីជាមួយលោក ស៊ី ជីនពីង និងលោក ពូទីន នៅទីក្រុងសិនជិន អំឡុងកិច្ចប្រជុំកំពូល APEC ផងដែរ៕
