វិមានក្រឹមឡាំង ថាជំនួបត្រីភាគីរវាងលោក ពូទីន លោក ស៊ី និងលោក ត្រាំ នៅចិន នឹងជះឥទ្ធិពលធំធេងដល់កិច្ចការពិភពលោក
16-11-2026 21:53
(មូស្គូ)៖ វិមានក្រឹមឡាំងបានថ្លែងនៅថ្ងៃចន្ទនេះថា ជំនួបត្រីភាគីដែលគ្រោងនឹងធ្វើឡើងនៅប្រទេសចិននាថ្ងៃព្រហស្បតិ៍សប្ដាហ៍នេះ រវាងប្រធានាធិបតីរុស្ស៊ី លោក វ្ល៉ាឌីមៀ ពូទីន ប្រធានាធិបតីចិន លោក ស៊ី ជីនពីង និងប្រធានាធិបតីអាមេរិក លោក ដូណាល់ ត្រាំ នឹងជះឥទ្ធិពលយ៉ាងខ្លាំងដល់កិច្ចការពិភពលោក។ នេះបើតាមការចេញផ្សាយដោយទីភ្នាក់ងារសារព័ត៌មាន Reuters។
ជំនួយការវិមានក្រឹមឡាំង លោក Yuri Ushakov បានប្រាប់អ្នកសារព័ត៌មានថា មេដឹកនាំទាំងបីនឹងជួបប្រជុំគ្នានៅនិវេសនដ្ឋានផ្លូវការរបស់មេដឹកនាំចិន ស្របពេលដែលប្រទេសចិនធ្វើជាម្ចាស់ផ្ទះរៀបចំកិច្ចប្រជុំកំពូលនៃវេទិកាសហប្រតិបត្តិការសេដ្ឋកិច្ចអាស៊ី-ប៉ាស៊ីហ្វិក (APEC) នៅទីក្រុងសិនជិន (Shenzhen)។ លោក Ushakov បានគូសបញ្ជាក់ដូច្នេះថា «សារៈសំខាន់ និងនិមិត្តរូបនៃជំនួបនេះ មិនអាចមើលស្រាលបានឡើយ ព្រោះនេះជាជំនួបលើកដំបូងបង្អស់ក្នុងប្រវត្តិសាស្ត្រ។ ភាគីទាំងអស់បានឯកភាពគ្នាថា ជំនួបនេះគួរតែរៀបចំឡើងក្រោមស្មារតីនៃការយោគយល់គ្នាទៅវិញទៅមក និងសម្ព័ន្ធភាពរវាងប្រទេសទាំងបីក្នុងអំឡុងសង្គ្រាមលោកលើកទី២ ដោយផ្ដោតលើកិច្ចសហប្រតិបត្តិការក្នុងការបង្កើតអង្គការសហប្រជាជាតិ»។ លោកបានបន្ថែមទៀតថា ភាគីទាំងបីបានត្រៀមខ្លួនរួចជាស្រេចដើម្បីបើកកិច្ចពិភាក្សាប្រកបដោយផ្លែផ្កា និងស៊ីជម្រៅ ដែលនឹងជះឥទ្ធិពលយ៉ាងសំខាន់ដល់ការវិវត្តនៃស្ថានការណ៍អន្តរជាតិទាំងមូល។
គួរបញ្ជាក់ថា នៅថ្ងៃចន្ទនេះដែរ អ្នកនាំពាក្យក្រសួងការបរទេសចិន លោកស្រី Mao Ning ក៏បានលើកឡើងផងដែរថា ជំនួបទល់មុខគ្នាជាលើកដំបូងបង្អស់រវាងប្រមុខរដ្ឋចិន រុស្ស៊ី និងអាមេរិកនេះ «មានសារៈសំខាន់ជាប្រវត្តិសាស្ត្រ» សម្រាប់ការថែរក្សាសន្តិភាពពិភពលោក និងការលើកកម្ពស់ស្ថិរភាពយុទ្ធសាស្ត្រក្នុងទំនាក់ទំនងរវាងមហាអំណាចធំៗ ខណៈអគ្គលេខាធិការអង្គការសហប្រជាជាតិ លោក Antonio Guterres បានប្រកាសនៅទីក្រុងម៉ានីលថា អង្គការសហប្រជាជាតិត្រៀមខ្លួនជាស្រេចដើម្បីគាំទ្ររាល់កិច្ចប្រឹងប្រែងរំសាយអាវុធនុយក្លេអ៊ែរដែលអាចកើតចេញពីកិច្ចប្រជុំកំពូលត្រីភាគីនេះ៕


