អាស៊ាន និងចិន មិនទាន់អាចបិទបញ្ចប់កិច្ចចរចាលើក្រមប្រតិបត្តិសមុទ្រចិនខាងត្បូងបាននៅឡើយទេ
15-11-2026 22:10
(ម៉ានីល)៖ រដ្ឋមន្ត្រីការបរទេសហ្វីលីពីន លោកស្រី Ma. Theresa Lazaro បានថ្លែងនៅថ្ងៃអាទិត្យនេះថា អាស៊ាន និងចិន មិនទាន់អាចបិទបញ្ចប់កិច្ចចរចាលើក្រមប្រតិបត្តិសមុទ្រចិនខាងត្បូង (COC) ដែលអូសបន្លាយជាយូរមកហើយនោះបាននៅឡើយទេ ក្រោមអាណត្តិប្រធានអាស៊ានរបស់ហ្វីលីពីន បើទោះបីជាភាគីទាំងពីរឈានដល់កិច្ចព្រមព្រៀងបណ្ដោះអាសន្នប្រមាណ ៨០ភាគរយនៃសេចក្ដីព្រាងរួចហើយក៏ដោយ។ នេះបើតាមការចេញផ្សាយដោយទីភ្នាក់ងារសារព័ត៌មាន Reuters។
ថ្លែងក្នុងសន្និសីទសារព័ត៌មាននាកិច្ចប្រជុំកំពូលអាស៊ានដែលមានសមាជិក ១១ប្រទេសនៅទីក្រុងម៉ានីល លោកស្រី Lazaro បានបញ្ជាក់ដូច្នេះថា «មិនទាន់មានការបិទបញ្ចប់នៅឡើយទេ» ដោយលោកស្រីបន្ថែមថា បញ្ហាសំខាន់ៗមួយចំនួននៅមិនទាន់ដោះស្រាយរួច រួមទាំងសំណួរថាតើក្រមប្រតិបត្តិនេះនឹងមានកាតព្វកិច្ចផ្លូវច្បាប់ឬយ៉ាងណា។ លោកស្រីបានបន្ថែមទៀតថា «ប្រទេសអាស៊ានបូករួមទាំងចិន ក៏មានទស្សនៈផ្សេងគ្នាជុំវិញរបៀបដោះស្រាយបញ្ហាទាំងនេះផងដែរ»។
គួរបញ្ជាក់ថា កិច្ចចរចាលើក្រមប្រតិបត្តិសមុទ្រចិនខាងត្បូងរវាងអាស៊ាន និងចិន បានអូសបន្លាយអស់រយៈពេលជាង ២ទសវត្សរ៍មកហើយ ខណៈហ្វីលីពីនក្នុងនាមជាប្រធានអាស៊ានបច្ចុប្បន្ន ធ្លាប់បានប្ដេជ្ញាពន្លឿនកិច្ចពិភាក្សាដើម្បីបញ្ចប់ក្រមប្រតិបត្តិនេះឱ្យបាននៅឆ្នាំ២០២៦ នេះ។ បណ្ដាប្រទេសជិតខាងរបស់ចិននៅអាស៊ីអាគ្នេយ៍ ចង់ឱ្យក្រមប្រតិបត្តិនេះផ្អែកលើច្បាប់អន្តរជាតិ ដែលពួកគេតែងតែចោទប្រកាន់ទីក្រុងប៉េកាំងថាមិនគោរព ខណៈចិនទាមទារអធិបតេយ្យភាពស្ទើរតែលើសមុទ្រចិនខាងត្បូងទាំងមូល ប៉ុន្តែទីក្រុងប៉េកាំងតែងអះអាងថា សកម្មភាពរបស់ខ្លួននៅក្នុងដែនទឹកនោះគឺស្របច្បាប់ និងប្រកបដោយវិជ្ជាជីវៈ៕

