ការរអាក់រអួលជើងហោះហើរនៅអាមេរិក នឹងបន្តដល់យប់ថ្ងៃអាទិត្យ (ម៉ោងនៅអាមេរិក) ខណៈអាជ្ញាធរកំពុងស្ដារប្រព័ន្ធឡើងវិញ
15-11-2026 21:24
(វ៉ាស៊ីនតោន)៖ ប្រធានរដ្ឋបាលអាកាសចរណ៍សហព័ន្ធអាមេរិក (FAA) លោក Bryan Bedford បានឱ្យដឹងកាលពីថ្ងៃសៅរ៍ម្សិលមិញថា កាលវិភាគហោះហើរនៅសហរដ្ឋអាមេរិកនឹងមិនអាចវិលទៅរកភាពប្រក្រតីវិញបានទេ រហូតដល់យប់ថ្ងៃអាទិត្យ (ម៉ោងនៅអាមេរិក) ខណៈប្រព័ន្ធអាកាសចរណ៍កំពុងស្ដារឡើងវិញបន្តិចម្ដងៗពីការបិទជើងហោះហើរទូទាំងប្រទេស។ នេះបើតាមការចេញផ្សាយដោយទីភ្នាក់ងារសារព័ត៌មាន Reuters។
បើតាមគេហទំព័រតាមដានជើងហោះហើរ FlightAware គិតត្រឹមយប់ថ្ងៃសៅរ៍ ក្រុមហ៊ុនអាកាសចរណ៍នានាបានលុបចោលជើងហោះហើរនៅអាមេរិកជាង ៦,៤០០ជើង និងពន្យារពេលជាង ៨,០០០ជើង បន្ទាប់ពីលុបចោលប្រមាណ ៩,២០០ជើង និងពន្យារពេល ៧,៥០០ជើងកាលពីថ្ងៃសុក្រ ព្រមទាំងបានលុបចោលជើងហោះហើរចំនួន ៨៧៥ជើងរួចជាស្រេចសម្រាប់ថ្ងៃអាទិត្យ។ លោក Bedford បានសុំទោសចំពោះការរំខាននេះ ដោយអះអាងថាប្រព័ន្ធនៅតែមានស្ថិរភាព ខណៈរដ្ឋមន្ត្រីក្រសួងដឹកជញ្ជូន លោក Sean Duffy បានបញ្ជាក់កាលពីថ្ងៃសៅរ៍ថា បញ្ហានេះកើតឡើងក្រោយក្រុមហ៊ុនផ្គត់ផ្គង់បច្ចេកទេស L3Harris ដំឡើងឧបករណ៍បញ្ជូនទិន្នន័យ (Router) ថ្មីនៅទីតាំងដាច់ស្រយាល។ លោក Duffy បានថ្លែងក្នុងសន្និសីទសារព័ត៌មានដូច្នេះថា «យើងកំពុងពិនិត្យមើលថាតើបញ្ហានេះបណ្ដាលមកពីកំហុសអ្នកប្រើប្រាស់ កំហុសអ្នកដំឡើងរបស់ក្រុមហ៊ុន L3Harris ឬក៏ដោយសារពួកគេដំឡើងឧបករណ៍ដែលមានបញ្ហា»។
គួរបញ្ជាក់ថា បទបញ្ជាផ្អាកការហោះហើរទូទាំងប្រទេសរយៈពេលជិត ៥ម៉ោងកាលពីថ្ងៃសុក្រ គឺជាការបិទជើងហោះហើរទូទាំងសហរដ្ឋអាមេរិកយូរបំផុតគិតចាប់តាំងពីព្រឹត្តិការណ៍វាយប្រហារថ្ងៃទី១១ ខែកញ្ញា ឆ្នាំ២០០១ មក ដែលជំរុញឱ្យសេតវិមានកោះប្រជុំបន្ទាន់ និងឱ្យស្ថាប័នសហព័ន្ធស៊ើបអង្កេតភ្លាមៗថាតើជាការវាយប្រហារតាមអ៊ីនធឺណិតឬយ៉ាងណា។ សហជីពអ្នកជំនាញសុវត្ថិភាពអាកាសចរណ៍ (PASS) បានឱ្យដឹងថា បញ្ហានេះកើតឡើងលើឧបករណ៍ Router ចំនួន ២គ្រឿងនៅរដ្ឋ Arkansas និងរដ្ឋ Texas ដែលទើបធ្វើបច្ចុប្បន្នភាពកាលពីថ្ងៃសុក្រ ចំណែកក្រុមហ៊ុន L3Harris បានបញ្ជាក់ថាខ្លួនកំពុងសហការយ៉ាងពេញទំហឹងជាមួយការស៊ើបអង្កេតរបស់ FAA ក្រោយភាគហ៊ុនរបស់ក្រុមហ៊ុនធ្លាក់ចុះប្រមាណ ៤ភាគរយ៕


