FN KH App Logo
Fresh News
FN MEDIA CO., LTD.
GET -- on the App Store
INSTALL

បារ៉ែន ស្ទាក់ចាប់ការវាយប្រហារតាមអាកាសរបស់អ៊ីរ៉ង់ ខណៈទីក្រុងតេហេរ៉ង់អះអាងថាបានវាយប្រហារមូលដ្ឋានទ័ពអាមេរិក

15-11-2026 18:38

(ម៉ាណាម៉ា)៖ កងកម្លាំងការពារដែនអាកាសបារ៉ែន បានស្ទាក់ចាប់ និងបំផ្លាញការវាយប្រហារតាមផ្លូវអាកាសរបស់អ៊ីរ៉ង់នៅថ្ងៃអាទិត្យនេះ ចំពេលដែលទីក្រុងតេហេរ៉ង់អះអាងថា បានវាយប្រហារមូលដ្ឋានទ័ពអាមេរិកមួយកន្លែងក្នុងប្រទេសឈូងសមុទ្រមួយនេះ។ នេះបើតាមការចេញផ្សាយដោយទីភ្នាក់ងារសារព័ត៌មាន Reuters នៅថ្ងៃអាទិត្យ ទី១៥ ខែវិច្ឆិកា ឆ្នាំ២០២៦។

យោធាបារ៉ែនបានបញ្ជាក់ថា ប្រព័ន្ធការពារដែនអាកាសរបស់ខ្លួនបានស្ទាក់ចាប់ការវាយប្រហារទាំងនោះមុនពេលធ្លាក់ដល់គោលដៅ ក្រោយអាជ្ញាធរចេញសារព្រមានឱ្យពលរដ្ឋរកកន្លែងជ្រកកោន ដោយចោទទីក្រុងតេហេរ៉ង់ថាកំពុងបន្ត «វិធីសាស្ត្រឈ្លានពានជាប្រព័ន្ធ»។ ដោយឡែក កងឆ្មាំបដិវត្តន៍អ៊ីរ៉ង់អះអាងថា ខ្លួនបានបញ្ជូនដ្រូន ៦គ្រឿងទៅវាយប្រហារប្រព័ន្ធរ៉ាដាអាមេរិកនៅមូលដ្ឋាន Al-Rifaa ដើម្បីសងសឹកចំពោះ «សកម្មភាពឈ្លានពានរបស់អាមេរិក» ប៉ុន្តែអាជ្ញាធរអាមេរិក និងបារ៉ែន មិនទាន់បញ្ជាក់ពីការអះអាងនេះនៅឡើយទេ។

គួរបញ្ជាក់ថា នេះជាការស្ទាក់ចាប់លើកដំបូងរបស់បារ៉ែនគិតចាប់តាំងពីខែកញ្ញាមក ខណៈកិច្ចចរចាបញ្ចប់សង្គ្រាមជិត ៩ខែរវាងអាមេរិក-អ៊ីស្រាអែល និងអ៊ីរ៉ង់ នៅតែគ្មានដំណោះស្រាយ។ ទោះបីជាលោក ដូណាល់ ត្រាំ បង្ហើបថាអាចនឹងផ្អាកការវាយប្រហារលើអ៊ីរ៉ង់ប្រសិនបើគ្មានការបង្កហេតុថ្មីក៏ដោយ ក៏ក្រុមហ៊ូទីនៅយេម៉ែន និងសម្ព័ន្ធមិត្តដឹកនាំដោយអារ៉ាប៊ីសាអូឌីត នៅតែបន្តវាយប្រហារតបតគ្នាដដែល ដោយនៅថ្ងៃអាទិត្យនេះ កម្លាំងការពារដែនអាកាសអារ៉ាប៊ីសាអូឌីតបានស្ទាក់ចាប់មីស៊ីលផ្លោង ២គ្រាប់បាញ់សំដៅទីក្រុងរីយ៉ាដ និងដ្រូន ៣គ្រឿងនៅខេត្តភាគខាងកើត៕