FN KH App Logo
Fresh News
FN MEDIA CO., LTD.
GET -- on the App Store
INSTALL

ទាហានអាមេរិកម្នាក់ទៀត ត្រូវបានចាប់ខ្លួននៅកោះ Okinawa ប្រទេសជប៉ុន ពីបទសង្ស័យបើកបរក្រោមឥទ្ធិពលគ្រឿងស្រវឹង

15-11-2026 15:05

(តូក្យូ)៖ ប៉ូលិសជប៉ុនបានចាប់ខ្លួនមន្ត្រីទ័ពអាកាសអាមេរិកម្នាក់ កាលពីថ្ងៃសៅរ៍ ទី១៤ ខែវិច្ឆិកា ឆ្នាំ២០២៦ ក្រោមការសង្ស័យថា បានបើកបរក្រោមឥទ្ធិពលគ្រឿងស្រវឹង នៅកោះ Okinawa។ វាជាករណីថ្មីចុងក្រោយមួយទៀត ដែលបាននិងកំពុងធ្វើឱ្យភាពតានតឹង រវាងប្រទេសសម្ព័ន្ធមិត្តទាំងពីរ កាន់តែស្មុគស្មាញ។ នេះបើតាមការចេញផ្សាយដោយ ទីភ្នាក់ងារព័ត៌មាន AFP។

ការចាប់ខ្លួននេះកើតឡើងត្រឹមមួយសប្តាហ៍ប៉ុណ្ណោះ បន្ទាប់ពីទីក្រុងតូក្យូ និងទីក្រុងវ៉ាស៊ីនតោន ទើបតែបានព្រមព្រៀងគ្នាលើវិធានការ ក្នុងគោលដៅទប់ស្កាត់បទល្មើសដែលបង្កឡើងដោយកងទ័ពអាមេរិកនៅលើកោះ Okinawa ចាប់តាំងពីករណីឃាតកម្មមួយ ដែលត្រូវបានចោទប្រកាន់ថាពាក់ព័ន្ធនឹងទាហានម៉ារីនអាមេរិកម្នាក់ បានបង្កឱ្យផ្ទុះការខឹងសម្បារយ៉ាងខ្លាំង។ កាលពីដើមខែវិច្ឆិកានេះ ទាហានម៉ារីនអាមេរិកម្នាក់ ក៏ត្រូវបានចាប់ខ្លួននៅកោះ Okinawa ក្រោមការសង្ស័យថា បានបើកបរក្រោមឥទ្ធិពលគ្រឿងស្រវឹងផងដែរ។

កាលពីសប្តាហ៍មុន មន្រ្តីអាមេរិកបាននិយាយថា ខ្លួននឹងពង្រីកការអនុវត្តបម្រាមគោចរដល់ពលទាហានឋានៈទាប រហូតដល់ថ្ងៃទី៧ ខែធ្នូ ហើយហាមឃាត់ទាហានទាំងអស់មិនឱ្យផឹកគ្រឿងស្រវឹងនៅក្រៅកន្លែងស្នាក់នៅរបស់ខ្លួន ចន្លោះចាប់ពីពាក់កណ្តាលអធ្រាត្រ ដល់ម៉ោង៥ព្រឹក។អ្នកនាំពាក្យប៉ូលិសខេត្ត Okinawa បានឱ្យដឹងថា «វាមិនទាន់ច្បាស់នៅឡើយទេថា តើជនសង្ស័យរូបនេះបានល្មើសនឹងបម្រាមគោចរ ដែលដាក់ចេញដោយមន្ត្រីអាមេរិកឬយ៉ាងណា»។

គួរបញ្ជាក់ថា យោធាអាមេរិកមានកងកម្លាំងប្រមាណ ៥៤០០០នាក់ឈរជើងនៅក្នុងប្រទេសជប៉ុន ដែលភាគច្រើនស្ថិតនៅលើកោះ Okinawa។ បទល្មើសបង្កឡើងដោយទាហានអាមេរិក បានក្លាយជាបញ្ហាដ៏រសើប និងជាប្រភពនៃភាពតានតឹងក្នុងទំនាក់ទំនងរវាងសម្ព័ន្ធមិត្តទាំងពីរ ដែលមានកិច្ចសហប្រតិបត្តិការសន្តិសុខជិតស្និទ្ធ៕