(សេអ៊ូល)៖ ក្រសួងការពារជាតិកូរ៉េខាងត្បូងបានឱ្យដឹងនៅថ្ងៃពុធ ទី៤ ខែវិច្ឆិកា ឆ្នាំ២០២៦ ថាកូរ៉េខាងជើងបានបាញ់តេស្តអាវុធមួយចូលក្នុងសមុទ្រនៃឆ្នេរភាគខាងកើតរបស់ខ្លួន ដែលនេះអាចជាការសម្ញែងសាច់ដុំយោធាចុងក្រោយបំផុតមួយរបស់ទីក្រុងព្យុងយ៉ាង។ នេះបើតាមការចេញផ្សាយដោយទីភ្នាក់ងារសារព័ត៌មាន Reuters។

កូរ៉េខាងជើងនៅក្នុងឆ្នាំ២០២៦ បានបាញ់សាកល្បងអាវុធជាបន្តបន្ទាប់ ក្នុងនោះរួមមានទាំងការធ្វើតេស្តបាញ់មីស៊ីលមួយគ្រាប់ដែលហោះបានចម្ងាយលើស ៩០០គីឡូម៉ែត្រ ព្រមទាំងមីស៊ីលល្បឿនលឿនជាងសំឡេង។ ការធ្វើតេស្តអាវុធរបស់កូរ៉េខាងជើងនៅថ្ងៃពុធនេះដែរអាចជាការធ្វើតេស្តមីស៊ីលជាលើកទី៤ ក្នុងរយៈពេលមួយខែមកនេះ និងកើតឡើងតែប៉ុន្មានម៉ោងប៉ុណ្ណោះក្រោយប្អូនស្រីមេដឹកនាំកូរ៉េខាងជើង លោក គីម ជុងអ៊ុន គឺលោកស្រី គីម យ៉ូជុង បានច្រានចោលកិច្ចសន្ទនាជាមួយទីក្រុងវ៉ាស៊ីនតោន រហូតទាល់តែសហរដ្ឋអាមេរិកបោះបង់ចោលនូវអ្វីដែលលោកស្រីហៅថាជាគោលនយោបាយអរិភាព។

បើតាមលោក Lee Choon-geun ជាអ្នកជំនាញមីស៊ីល និងជាសមាជិកក្រុមប្រឹក្សាភិបាលនៃវិទ្យាស្ថាន Korea Advanced Institute of Science and Technology (KAIST) ការធ្វើតេស្តបាញ់មីស៊ីកជាញឹកញាប់របស់កូរ៉េខាងជើងនៅក្នុងឆ្នាំ២០២៦នេះ ក៏បានសន្មត់បានដែរថាទីក្រុងព្យុងយ៉ាងប្រហែលជិតសម្រេចបានទាំងស្រុងនូវការត្រៀមលក្ខណៈសម្រាប់ ការផលិតមីស៊ីលទ្រង់ទ្រាយធំ ក្នុងនោះរួមមានទាំងអាវុធសម្រាប់នាំចេញទៅឱ្យរុស្ស៉ី។

អ្នកជំនាញរូបនេះបន្ថែមថានៅមុនការផលិតទ្រង់ទ្រាយធំ និងការអភិវឌ្ឍ ជាធម្មតាគេចាំបាច់ត្រូវការធ្វើតេស្តជាមុនសិន ហើយសម្រាប់កូរ៉េខាងជើង ពួកគេប្រហែលជាកំពុងសម្លឹងរក ការនាំចេញគ្រាប់មីស៊ីលទៅកាន់រុស្ស៉ី ដូច្នេះព្យុងយ៉ាងចាំបាច់ធ្វើតេស្តបាញ់ជាច្រើនមុននឹងដឹកជញ្ជូនចេញយកទៅលក់៕