(ប៉ារីស)៖ មេដឹកនាំសិស្សសាលានៅប្រទេសបារាំង បានប្តេជ្ញាបន្តការតវ៉ារបស់ពួកគេ ទោះបីរដ្ឋាភិបាលបានផ្តល់សម្បទានពាក់ព័ន្ធនឹងវិស័យអប់រំក៏ដោយ ដោយបន្តដាក់សម្ពាធលើ ប្រធានាធិបតី លោក Emmanuel Macron ខណៈចលនាបាតុកម្មនេះ កំពុងរីករាលដាលទៅដល់សហជីព ក៏ដូចជាសកម្មជនដទៃទៀត ហើយបង្កើនភាពចលាចល និងការខូចខាតសេដ្ឋកិច្ចកាន់តែធ្ងន់ធ្ងរ។ នេះបើតាមការចេញផ្សាយដោយ ទីភ្នាក់ងារព័ត៌មាន AFP នាថ្ងៃអង្គារ ទី២៧ ខែតុលា ឆ្នាំ២០២៦។

វិធានការដែលរដ្ឋាភិបាលបារាំង បានប្រកាសរួមមាន ការប្តេជ្ញាកំណត់ចំនួនសិស្សក្នុងថ្នាក់រៀនមួយចំនួន នៅតាមសាលាវិទ្យាល័យ ឥណទានទឹកប្រាក់ចំនួន ៤ពាន់លានអឺរ៉ូ (៤,៥ ពាន់លានដុល្លារ) សម្រាប់ជួសជុល និងកែលម្អសាលារៀន ព្រមទាំងការផ្លាស់ប្តូរនៅត្រឹមឆ្នាំ២០២៨ នៃប្រព័ន្ធជ្រើសរើសនិស្សិតចូលសាកលវិទ្យាល័យ ដែលពួកសិស្សមើលឃើញថា មានភាពអយុត្តិធម៌។

លោក Louis Letoublon ដែលជាតំណាងមួយរូបរបស់ក្រុមសិស្សកម្រិតវិទ្យាល័យ បាននិយាយដូច្នេះថា «មិនមែនរាល់ការទាមទាររបស់យើង សុទ្ធតែត្រូវបានបំពេញនោះទេ។ យើងនឹងបន្តតវ៉ាឱ្យបានយូរតាមដែលចាំបាច់»។ ការលើកឡើងបែបនេះ គឺបន្ទាប់ពីរូបលោក និងមេដឹកនាំសិស្សដទៃទៀត ចេញពីកិច្ចប្រជុំជាមួយមន្ត្រីរដ្ឋាភិបាលនៅទីក្រុងប៉ារីស។

ចលនាបាតុកម្ម បានពង្រីកវិសាលភាពលើសពីបញ្ហាវិស័យអប់រំ ដោយទាក់ទាញការចូលរួមពីសហជីព និងសកម្មជនចលនាអាវកាក់ពណ៌លឿង ជាដើម។ ស្ថានការណ៍នេះ កំពុងក្លាយជាការសាកល្បងដ៏ធំមួយ សម្រាប់រដ្ឋាភិបាលសំឡេងភាគតិចរបស់លោក Macron។ រដ្ឋាភិបាលរបស់លោក មានលទ្ធភាពតិចតួចប៉ុណ្ណោះ ក្នុងការបង្កើនការចំណាយ ដើម្បីបន្ធូរបន្ថយភាពចលាចលនេះ ដោយសារបំណុលជាតិជិតឈានដល់ ១២០ភាគរយ នៃផលិតផលក្នុងស្រុកសរុប (GDP) ទៅហើយ។ ទន្ទឹមនឹងនេះ ភាពវឹកវរកំពុងជួយបង្កើនការគាំទ្រ ចំពោះលោកស្រី Marine Le Pen ដែលជាបេក្ខជននាំមុខមកពីគណបក្សស្តាំនិយមជ្រុល មុនការបោះឆ្នោតប្រធានាធិបតី នៅឆ្នាំ២០២៧។

គួរបញ្ជាក់ថា ការតវ៉ាដែលដំបូងឡើយ ផ្តើមចេញពីការមិនពេញចិត្តរបស់ក្រុមសិស្សសាលា មិនទាន់បង្ហាញសញ្ញាថា នឹងបញ្ចប់នៅឡើយទេ បន្ទាប់ពីអំពើហិង្សា បានផ្ទុះឡើងនៅតាមទីក្រុងជាច្រើន កាលពី៩ថ្ងៃមុន ដែលបង្កការព្រួយបារម្ភថា រដ្ឋាភិបាលបានបាត់បង់ការគ្រប់គ្រង លើស្ថានការណ៍តាមដងផ្លូវ។ លោក Macron បានទទួលស្គាល់ថា ភាពចលាចលទំនងជានឹងកើតមានបន្ថែមទៀត នៅចុងសប្តាហ៍នេះ មុនថ្ងៃបាតុកម្មទូទាំងប្រទេសក្នុងទ្រង់ទ្រាយធំ ដែលគ្រោងធ្វើនៅថ្ងៃទី៥ ខែវិច្ឆិកា។ រដ្ឋមន្ត្រីក្រសួងមហាផ្ទៃបារាំង លោក Laurent Nunez បានឱ្យដឹងថា មនុស្សចំនួន ១៤៣៥នាក់ត្រូវបានចាប់ខ្លួនទូទាំងប្រទេស ក្នុងអំឡុងការធ្វើបាតុកម្មកាលពីថ្ងៃសៅរ៍សប្តាហ៍មុន៕