(អាដែន)៖ ការវាយប្រហារដោយមីស៊ីលពីសំណាក់ក្រុមប្រដាប់អាវុធហ៊ូទី (Houthi) លើជំរំហ្វឹកហ្វឺនកងកម្លាំងសន្តិសុខរដ្ឋាភិបាលយេម៉ែន ក្នុងខេត្តសាប់វ៉ា (Shabwa) នៅថ្ងៃចន្ទនេះ បានសម្លាប់មនុស្សយ៉ាងហោច ១៨ នាក់ ខណៈការប្រយុទ្ធគ្នាក្នុងប្រទេសនេះកំពុងកើនកម្ដៅយ៉ាងខ្លាំង។ នេះបើតាមការចេញផ្សាយដោយទីភ្នាក់ងារសារព័ត៌មាន Reuters នៅថ្ងៃចន្ទ ទី១៩ ខែតុលា ឆ្នាំ២០២៦ ដោយស្រង់ប្រភពពីរដ្ឋាភិបាល និងមន្ត្រីពេទ្យយោធា។

ប្រភពពីមន្ត្រីរដ្ឋាភិបាលយេម៉ែន បានឱ្យដឹងថា ក្រុមហ៊ូទីបានបាញ់មីស៊ីលបាលីស្ទិកចំនួន ៣ គ្រាប់ សំដៅលើកងកម្លាំងសន្តិសុខ អំឡុងពេលកំពុងធ្វើសមយុទ្ធហ្វឹកហ្វឺន នៅក្នុងខេត្តតំបន់ឆ្នេរ Shabwa ដែលជាតំបន់សម្បូរធនធានថាមពល។ ការវាយប្រហារនេះ ធ្វើឡើងចំពេលកងទ័ពរដ្ឋាភិបាលយេម៉ែន គាំទ្រដោយសម្ព័ន្ធភាពអារ៉ាប៊ីសាអូឌីត បានបើកប្រតិបត្តិការវាយដណ្តើមយកទឹកដីក្បែរច្រកសមុទ្រយុទ្ធសាស្ត្របាប់អែលម៉ាន់ដេប (Bab el-Mandeb) មកវិញ ខណៈក្រុមហ៊ូទីកំពុងឡោមព័ទ្ធទីក្រុងតាអុីស (Taiz) ដែលជាទីតាំងរឹងមាំចុងក្រោយរបស់កងកម្លាំងរដ្ឋាភិបាលនៅតំបន់ខ្ពង់រាបភាគខាងត្បូង។

សង្គ្រាមនៅយេម៉ែន បានប្រែក្លាយជាសមរភូមិជួរមុខមួយទៀត នៃជម្លោះរវាងអាមេរិក-អ៊ីស្រាអែល និងអ៊ីរ៉ង់ ខណៈក្រុមហ៊ូទីបានបង្កើនការវាយប្រហារសងសឹកលើអារ៉ាប៊ីសាអូឌីតជាញឹកញាប់ ដោយបានកំណត់គោលដៅលើព្រលានយន្តហោះអន្តរជាតិរដ្ឋធានីរីយ៉ាដ និងទីស្នាក់ការកណ្តាលរបស់ក្រុមហ៊ុនប្រេងយក្ស Saudi Aramco ក្នុងរយៈពេលប៉ុន្មានសប្តាហ៍ចុងក្រោយនេះ។

គួរបញ្ជាក់ថា សង្គ្រាមស៊ីវិលនៅយេម៉ែន បានផ្ទុះឡើងតាំងពីឆ្នាំ២០១៤ នៅពេលក្រុមហ៊ូទីវាយដណ្តើមកាន់កាប់រដ្ឋធានីសាណា (Sanaa) ហើយទោះបីជាធ្លាប់មានបទឈប់បាញ់ឆ្នាំ២០២២ ក៏ដោយ ក៏ជម្លោះបានផ្ទុះឡើងសារជាថ្មីនៅឆ្នាំនេះ។ បច្ចុប្បន្ន យេម៉ែនកំពុងប្រឈមនឹងវិបត្តិមនុស្សធម៌ដ៏ធ្ងន់ធ្ងរបំផុតមួយលើពិភពលោក ខណៈទីភ្នាក់ងារជំនួយនានាបានព្រមានពីស្ថានភាពជីវភាពរបស់ប្រជាពលរដ្ឋដែលកំពុងដុនដាបយ៉ាងធ្ងន់ធ្ងរ៕