(ឌូបៃ)៖ រដ្ឋមន្ត្រីការបរទេសអ៊ីរ៉ង់ លោក Abbas Araqchi បានបញ្ជាក់ប្រាប់ប្រព័ន្ធផ្សព្វផ្សាយក្នុងស្រុកនៅថ្ងៃអាទិត្យនេះថា សំណើរបស់អ៊ីរ៉ង់ក្នុងការបើកច្រកសមុទ្រហ័រមូស (Hormuz) ឡើងវិញក្នុងពេល ៧ ថ្ងៃ ដែលបានដាក់ជូនសហរដ្ឋអាមេរិក នៅតែមានសុពលភាពដដែល។ នេះបើតាមការចេញផ្សាយដោយទីភ្នាក់ងារសារព័ត៌មាន Reuters នៅថ្ងៃអាទិត្យ ទី១៨ ខែតុលា ឆ្នាំ២០២៦។

ថ្លែងក្នុងកិច្ចប្រជុំអង្គការសហប្រតិបត្តិការឥស្លាម (OIC) ក្នុងរដ្ឋធានីបាកដាដ លោក Araqchi បានគូសបញ្ជាក់ថា អ៊ីរ៉ង់កំពុងពិនិត្យការឆ្លើយតបរបស់អាមេរិក ប៉ុន្តែប្រសិនបើវ៉ាស៊ីនតោនមានភាពស្មោះត្រង់ នោះផ្លូវឈានទៅបើកច្រកសមុទ្រហ័រមូសឡើងវិញ គឺច្បាស់ណាស់។ លោកបន្ថែមថា បើអាមេរិកយល់ព្រមតាមលក្ខខណ្ឌរបស់អ៊ីរ៉ង់ ច្រកសមុទ្រនេះនឹងបើកដំណើរការឡើងវិញក្នុងពេល ៦ ថ្ងៃ ហើយការចរចានឹងបន្តនៅថ្ងៃបន្ទាប់។ លក្ខខណ្ឌស្នូលទាំង ៧ របស់ក្រុងតេអេរ៉ង់ រួមមាន ការដកការបិទខ្ទប់កំពង់ផែអ៊ីរ៉ង់ ការលុបចោលទណ្ឌកម្មលើការនាំចេញប្រេង និងការបញ្ឈប់ជម្លោះយោធានៅគ្រប់សមរភូមិទាំងអស់ក្នុងតំបន់។

ចំណុចខ្វែងគំនិតគ្នាចម្បងបំផុត គឺវ៉ាស៊ីនតោនទទូចចង់ដោះស្រាយបញ្ហាកម្មវិធីនុយក្លេអ៊ែរអ៊ីរ៉ង់ជាមុនសិន ដោយអនុប្រធានាធិបតីអាមេរិក លោក JD Vance ធ្លាប់បានបញ្ជាក់ថា ក្រុងតេអេរ៉ង់ត្រូវតែកាត់បន្ថយការចម្រាញ់សារធាតុអ៊ុយរ៉ាញ៉ូមឱ្យបានច្រើន ដើម្បីបញ្ចប់សង្គ្រាមរយៈពេល ៨ ខែនេះ។ ផ្ទុយទៅវិញ អ៊ីរ៉ង់ទាមទារឱ្យការចរចាផ្ដោតលើការបើកច្រកសមុទ្រហ័រមូស និងការស្ដារសន្តិសុខផ្លូវទឹកជាចម្បង។

គួរបញ្ជាក់ថា មុនពេលសង្គ្រាមផ្ទុះឡើង ច្រកសមុទ្រយុទ្ធសាស្ត្រហ័រមូស គឺជាផ្លូវដឹកជញ្ជូនប្រេង និងឧស្ម័នធម្មជាតិរាវ (LNG) ប្រមាណ ២០% នៃពាណិជ្ជកម្មពិភពលោក ប៉ុន្តែកិច្ចចរចាស្វែងរកសន្តិភាពបានជាប់គាំង បន្ទាប់ពីបទឈប់បាញ់បណ្តោះអាសន្នកាលពីខែមិថុនា បានដួលរលំទៅវិញ៕