(កុលកាតា)៖ ហេតុការណ៍ប្រជ្រៀតរត់ជាន់គ្នានៅក្នុងពិធីបុណ្យសាសនាមួយ ក្នុងទីក្រុងកុលកាតា (Kolkata) ភាគខាងកើតប្រទេសឥណ្ឌា បានបណ្តាលឱ្យមនុស្សយ៉ាងហោច ១៧ នាក់ស្លាប់បាត់បង់ជីវិត និងរាប់សិបនាក់រងរបួស កាលពីថ្ងៃសៅរ៍។ នេះបើតាមការចេញផ្សាយដោយទីភ្នាក់ងារសារព័ត៌មាន Reuters ដោយស្រង់របាយការណ៍ពីប្រព័ន្ធផ្សព្វផ្សាយក្នុងស្រុកឥណ្ឌា។

ទូរទស្សន៍ក្នុងស្រុកឥណ្ឌា បានឱ្យដឹងថា ឧបទ្ទវហេតុដ៏រន្ធត់នេះបានកើតឡើងនៅច្រកទ្វារចេញក្នុងតំបន់ Girish Park នៃទីក្រុង Kolkata ក្រោយពេលមានភ្លៀងធ្លាក់ខ្លាំង បណ្ដាលឱ្យអ្នកចូលរួមពិធីបុណ្យយ៉ាងណែនណាន់តាន់តាប់ បានសម្រុកប្រជ្រៀតគ្នាចេញពីទីតាំងប្រារព្ធពិធី។ ពិធីបុណ្យប្រចាំឆ្នាំ Durga Puja គឺជាពិធីបុណ្យសាសនាហិណ្ឌូដ៏ធំមួយក្នុងរដ្ឋ West Bengal ដែលតែងតែទាក់ទាញមនុស្សរាប់សែននាក់ឱ្យមកជួបជុំគ្នាគោរពបូជារូបសំណាកព្រះម៉ែទុគ៌ា (Goddess Durga) នៅតាមរោងឧបាសកបណ្តោះអាសន្ន។

ក្រោយកើតហេតុ ខុទ្ទកាល័យនាយករដ្ឋមន្ត្រីឥណ្ឌា លោក ណារិនដ្រា ម៉ូឌី (Narendra Modi) បានប្រកាសផ្ដល់ប្រាក់ឧបត្ថម្ភចំនួន ២០០,០០០ រូពី (ប្រមាណ ២,១០០ ដុល្លារអាមេរិក) ដល់គ្រួសារសពនីមួយៗ និង ៥០,០០០ រូពី សម្រាប់អ្នករងរបួសក្នុងម្នាក់ៗ។

គួរបញ្ជាក់ថា ហេតុការណ៍រត់ជាន់គ្នាក្នុងពិធីបុណ្យសាសនាធំៗនៅឥណ្ឌា តែងតែកើតឡើងជាញឹកញាប់ ដោយសារតែចំនួនអ្នកចូលរួមច្រើនលើសលប់ ខណៈការរៀបចំច្រកចេញចូល និងវិធានការគ្រប់គ្រងហ្វូងមនុស្សនៅតាមទីតាំងមួយចំនួននៅមានកម្រិតនៅឡើយ៕