(ម៉ាឌ្រីដ)៖ នាយករដ្ឋមន្ត្រីអេស្ប៉ាញ លោក Pedro Sanchez និងប្រធានាធិបតីបារាំង លោក Emmanuel Macron កាលពីថ្ងៃពុធ បានបង្ហាញការសាទរចំពោះបំណងរបស់អង់គ្លេសក្នុងការវិលចូលសហភាពអឺរ៉ុប (EU) វិញ ព្រមទាំងបានព្រមព្រៀងគ្នាថា អឺរ៉ុបត្រូវតែពង្រឹងការការពារពាណិជ្ជកម្មរបស់ខ្លួនទប់ទល់នឹងចិន។ នេះបើតាមការចេញផ្សាយដោយទីភ្នាក់ងារសារព័ត៌មាន Reuters នៅថ្ងៃទី៣០ ខែកញ្ញា ឆ្នាំ២០២៦។

ការលើកឡើងនេះ ធ្វើឡើងក្រោយនាយករដ្ឋមន្ត្រីអង់គ្លេស លោក Andy Burnham បានបង្ហើបពីលទ្ធភាពនៃការវិលចូល EU វិញក្នុងបទសម្ភាសន៍មួយ ដោយលោក Macron ចាត់ទុកថាជា «ដំណឹងដ៏ល្អ» និងជា «ការសម្រេចចិត្តត្រឹមត្រូវ» ខណៈលោក Sanchez ថា អេស្ប៉ាញ «បើកដៃស្វាគមន៍ជានិច្ច»។

មេដឹកនាំទាំងពីរក៏បានទាមទារឱ្យមានភាពបត់បែនក្នុងកិច្ចចរចាថវិកា EU នៅខែតុលាខាងមុខផងដែរ។ ប្រទេសទាំងពីរ បារម្ភពីសម្ពាធរបស់ប្រទេសផ្ដល់វិភាគទានធំៗដូចជា អាល្លឺម៉ង់ និងហូឡង់ ដែលចង់កាត់បន្ថយថវិកាសហភាពអឺរ៉ុបរាប់រយពាន់លានអឺរ៉ូ ព្រោះអាចប៉ះពាល់ដល់ថវិកាជួយកសិករ និងបង្កើនវិសមភាពសង្គម។

ទាក់ទងនឹងការប្រកួតប្រជែងពីចិន មេដឹកនាំទាំងពីរបានសង្កត់ធ្ងន់ពីភាពចាំបាច់ក្នុងការតម្រូវឱ្យក្រុមហ៊ុនចិនផ្ទេរបច្ចេកវិទ្យាក្នុងវិស័យសំខាន់ៗ ដូចជារថយន្តជាដើម។ លោក Macron បានបញ្ជាក់ថា៖ «យើងត្រូវតែការពារក្រុមហ៊ុនរបស់យើងពីការប្រកួតប្រជែងមិនស្មើភាព... បើយើងមិនរួបរួមគ្នាជាធ្លុងមួយទេ អឺរ៉ុបគ្មានផ្លូវជោគជ័យឡើយ» ៕